Gaelscoil Mhic Amhlaigh ar na sráideanna
Bealtaine 10, 2012
Tabharfaidh pobal Ghaelscoil Mhic Amhlaigh chuig na sráideanna maidin Shathairn seo chugainn, 12 Bealtaine, ar mhaithe lena bhfeachtas chun síneadh a fháil don scoil agus chun cóiríocht cheart a chur ar fáil do phaistí na scoile.
Baileoidh siad le chéile san Fhaiche Mhór ag 11.15r.n. le haghaidh imeacht beag spraíúil agus ansin beidh siúlóid acu síos tríd Shráid na Siopaí. Ag 12.00 meán lae, gar do shiopa bácús Griffins ag bun Shráid na Siopaí, cuirfidh siad críoch lena agóid trí 12 balún a scaoileadh san aer, mar chomhartha ar an 12 bliain atá an scoil ag fanacht ar an síneadh scoile.
Tá an scoil ag lorg tacaíochta ó phobal na Gaillimhe don fheachtas seo, mar is léir nach ceist airgid atá i gceist, mar go bhfuil airgead ag an Roinn Oideachais chun Gaelscoil úr nua a thógáil i gCnoc na Cathrach. Tá Gaelscoil Mhic Amhlaigh ag iarraidh ar an Roinn plé lena fadhbanna cóiríochta atá acu féin roimh thús a chur le tógáil scoil úr. Níl mórán nach n-aontódh leis an éileamh sin.
