SPRAOI ag Tuistí agus Leanaí don Samhradh
Bealtaine 21, 2013
Tiocfaidh SPRAOI, an grúpa dátheangach Tuistí/Leanaí, le chéile arís an Satharn seo chugainn, 25 Bealtaine ag 11 a chlog ar maidin.
Bunaíodh SPRAOI an samhradh seo caite agus tagann an grúpa le chéile gach dara Dé Sathairn in Ionad Phobal Darach Úr.
Bíonn tae agus caife do na tuismitheoirí agus comhrá dátheangach ar siúl acu fhad is a bhíonn na páistí ag spraoi. Cuirtear fíorchaoin fáilte roimh éinne go bhfuil suim acu Gaeilge a labhairt lena bpáistí agus iad i suíomh spraíúil, neamhfhoirmiúil. Ní gá a bheith líofa sa Ghaeilge ach díreach suim agus sásta triail a bhaint aisti!
Costas €3 an chlann a bhíonn le n-íoc agus bíonn tae/caifé/brioscaí chomh maith le sú do na páistí san áireamh sa chostas sin. Eagraithe i gcomhar le Comhluadar Teo tá an grúpa SPRAOI oiriúnach d’éinne le páistí suas go 5 bliana d’aois. Tiocfaidh an grúpa le chéile ar an 25ú Bealtaine, 8ú & 22ú Meitheamh agus an 6ú agus 20ú Iúil. Tá gach eolas ar fáil ó Emma i nGlór Cheatharlach ar (085) 1340047. Bígí linn agus beidh fáilte roimh cách!
www.carlow-nationalist.ie
Naíonra Cheatharlach
Bealtaine 21, 2013
Ag druidim le deireadh scoilbliana eile ag gach leibhéal den oideachas ó réamhscolaíocht go bunscolaíocht, iarbhunscolaíocht go tríú leibhéal ní foláir tosnú ag réiteach gan mhoill don chéad scoilbhliain eile.
Sin mar atá ag Naíonra Cheatharlach agus clárú faoi lán seoil do Mhí Mheán Fómhair. Tá an naíonra i mbaile Cheatharlach lonnaithe i nGráig Chuilinn agus tá roinnt áiteanna fágtha ann don téarma nua.
Soláthraíonn Naíonra Cheatharlach an bhliain réamhscoile saor in aisce faoin Scéim um Chúram agus Oideachas Luath-Óige nó ECCE. De réir na scéime áirithe seo cuirtear bliain réamhoideachais ar fáil saor do gach páiste sar a fhreastalaíonn sé/sí ar an mbunscoil. Faoi stiúir na stiúrthóirí cáilithe sa naíonra foghlaimíonn an páiste an Ghaeilge go nádúrtha i dtimpeallacht chairdiúil. Tugann sé seo deis don pháiste an dara teanga a shealbhú trí mhódh an tsúgartha agus is é seo an cur chuige is oiriúnaí mar mhódh foghlama do pháistí óga. Is buntáiste iontach é seo don pháiste roimh dhul ar aghaidh chuig bunscoil ar bith gan trácht ar bhunscoil trí mheán na Gaeilge. Tá sé cruthaithe go mbíonn éifeacht dhearfach ar chumas foghlamtha páiste má bhíonn an dara teanga aige nó aici ag aois an-óg. Chomh maith leis an nGaeilge bíonn gach deis curtha ar fáil ag foireann an naíonra chun forbairt iomlán an pháiste idir fhorbairt fhisiciúil, intleachtúil,chruthaitheach, aeisteitiúil, shóisialta, mhothúchánach agus teanga a chur i gcrích.
Bunaíodh Naíonra Cheatharlach chomh fada siar le 1980 faoi threoir an Chomhchoiste Réamhscolaíochta agus thar breis is tríocha bliain tá na céadta páiste tar éis a gcéad bhlaiseadh den Ghaeilge a fháil i dtimpeallacht dearfach agus spraíúil na naíonraí.
Más mian leat blas den Naíonra a thabhairt do pháiste is féidir leo páirt a ghlacadh i gCampa na nÓg 2013 a bheidh á reachtáil sa Naíonra i Mí Iúil. Beidh Campaí na nÓg ar siúl i Naíonra Ghráig Chuilinn ón 8-19ú Iúil i mbliana agus is féidir clárú do cheachtar den dá sheachtain. Eagrófar meascán d’imeachtaí oiriúnach do pháistí idir 4-6 bliana d’aois ó 10.00r.n.-1.00i.n. agus beidh obair ealaíne agus ceardaíochta, cluichí agus turasanna áitiúla ina measc. Tá costas €40 in aghaidh na seachtaine ar an gcampa seo.
Beidh seirbhís nua ar fáil i Naíonra Cheatharlach ó Mhí Mheán Fhómhair 2013 do pháistí idir dhá bhliain agus 11 mí go trí bliana d’aois (iadsan nách bhfuil ag déanamh an bhliain ECCE). Beidh seisiún tráthnóna ar fáil i Naíonra Gráigchuilinn ar tráthnóna an Mháirt, Chéadaoin agus Déardaoin ó 1.00-3.30i.n. ar chostas €9 an tseisiúin. Is deis iontach í seo chun blas an Naíonra a thabhairt do pháistí níos óige agus is féidir suim a léiriú trí theagmháil a dhéanamh le Lorraine nó Madeline.
Chun tuilleadh eolais a fháil nó chun áit a chur in áirithe is féidir dul i dteagmháil le Lorraine i Naíonra Ghráig Chuilinn ar 085 7377041 nó le Glór Cheatharlach ar 059 9158105.
Carlow Nationalist
Gaeilge an tSamhraidh 2013 i gCeatharlach
Aibreán 23, 2013
Sheol Glór Cheatharlach clár an tsamhraidh le déanaí atá lán d’imeachtaí oiriúnach do gach aoisghrúpa.
Am gnóthach a bheidh ann don Ghaeilge i gCeatharlach le clár iomlán ó Mhí Bealtaine go Mí Iúil. Cuirfear tús le sraith nua de na ranganna Gaeilge do dhaoine fásta an tseachtain dar tús 13 Bealtaine. Is í seo an cúigiú bhliain de na Cúrsaí do dhaoine fásta atá curtha ar fáil ag Gaelchultúr i gCeatharlach. Beidh trí leibhéal ar fáil an samhradh seo le Bunrang 2, Méanrang 1 agus Meánrang 2. Is cúrsaí deich seachtaine atá i gceist le ranganna oíche amháin sa tseachtain. Beidh an Bunrang ar an Luan agus na Meán leibhéil ar an Mháirt. Is ó 7.00-9.00i.n a bheidh na ranganna agus iad uile ar siúl in oifigí Chomhairle Chontae Cheatharlach ar Bhóthar Átha Í. Tá gach eolas ar www.gaelchultur.com agus is féidir clárú ar líne chomh maith.
I rith laethanta saoire an tsamhraidh eagrófar Coláiste Samhraidh do dhéagóirí, Campa Samhraidh do pháistí bunscoile agus Campa na nÓg do pháistí óga ó 5-7 mbliana d’aois. Is í seo an cúigiú bhliain as a chéile a reachtáilfear an Coláíste Samhraidh do dhéagóirí i gCeatharlach. Tabharfaidh sé seo rogha eile do dhaltaí gur mhian leo feabhas a chur ar a gcuid Gaeilge ach nach bhfuil fonn orthu trí seachtaine a chaitheamh i bhfad ó bhaile sa Ghaeltacht. Agus iad ag freastal ar Choláiste Samhraidh Cheatharlach bainfidh daltaí i rang 6 go scoláirí na hardteistiméireachta taitneamh as taithí Gaeltachta ó chompord a mbaile féin. Bhí ráth ollmhór ar an gcoláiste samhraidh ó 2009 agus táthar ag súil go mór le cúrsa 2013 chomh maith. Beidh an coláiste ar siúl ar feadh coicíse idir 9.30 r.n. agus 1.30 i.n. gach lá ó 1ú go 12ú Iúil. Cuirfear clár suimiúil ar fáil le ranganna agus imeachtaí in oiriúint do dhaltaí i rang 6 agus micléinn 1ú agus 2ú bliain i ngrúpa na sóisear agus daltaí níos sine i ngrúpa na sinsear. Is i nGaelcholáiste Cheatharlach a bheidh an coláiste samhraidh lonnaithe. I measc na n-imeachtaí a bheidh faoi chaibidil beidh ceachtanna Gaeilge agus seisiúin cainte, díospóireachtaí agus amhránaíocht, cluichí agus spórt chomh maith le rince céilí agus iad seo uile déanta trí mhéan na Gaeilge. Tabharfar deis do na daltaí spraoi agus spórt a bhaint as an gColáiste Samhraidh, casadh le cairde nua agus ag an am céanna cur lena gcuid líofachta sa teanga.
‘Sé €200 táille iomlán an Choláiste Samhraidh. Chun áit a chur in áirithe caithfear foirm iarratais comhlánaithe agus éarlais €50 a chur ar aghaidh go luath. Beidh Campaí na nÓg ar siúl i Naíonra Ghráig Chuilinn ón 8-19ú Iúil i mbliana agus is féidir clárú do cheachtar den dá sheachtain. Eagrófar meascán d’imeachtaí oiriúnach do pháistí idir 4-6 bliana d’aois ó 10.00r.n.-1.00i.n. agus beidh obair ealaíne agus ceardaíochta, cluichí agus turasanna áitiúla ina measc. Tá costas €40 in aghaidh na seachtaine ar an gcampa seo. Gach eolas ó Lorraine ar (085) 7377041 nó ó oifig Glór Cheatharlach. Agus beidh Campa Samhraidh oiriúnach do pháistí níos sine idir 7 agus 10 mbliana d’aois ar siúl i nGaelscoil Cheatharlach ó 15-19 Iúil. Beidh 50 áit ar fáil agus clúdóidh an táille €50 imeachtaí uile an Champa. I measc na ngníomhaíochtaí beidh snámh, cluichí, ealaín, amhránaíocht, ceardaíocht, rince céilí agus roinnt turasanna i rith na seachtaine. Beidh an campa ar siúl ó 10r.n. – 2i.n. ón Luan 15ú go dtí an Aoine 19ú Iúil. Tá gach eolas faoi na himeachtaí samhraidh uile ar fáil Glór Cheatharlach, Sráid an Choláiste, Ceatharlach. Is féidir clárú ach glaoch ar 059 9158105, 085 1340047 nó rphoist a sheoladh chuig emma@glorcheatharlach.ie
Bígí linn do Shamhradh na Gaeilge 2013 i gCeatharlach!
www.carlow-nationalist.ie
SPRAOI ag Tuistí agus Leanaí
Márta 12, 2013
Tiocfaidh SPRAOI, an grúpa dátheangach Tuistí/Leanaí i gCeatharlach, le chéile do Sheachtain na Gaeilge ar an Satharn seo chugainn, 16ú Márta ag 11 a chlog ar maidin.
Bunaíodh SPRAOI an samhradh seo caite agus tagann an grúpa le chéile gach dara Dé Sathairn in Ionad Phobal Darach Úr.
Bíonn tae agus caife do na tuismitheoirí agus comhrá dátheangach ar siúl acu fhad is a bhíonn na páistí ag spraoi. Cuirtear fíorchaoin fáilte roimh éinne go bhfuil suim acu Gaeilge a labhairt lena bpáistí agus iad i suíomh spraíúil, neamhfhoirmiúil. Ní gá a bheith líofa sa Ghaeilge ach díreach suim agus sásta triail a bhaint aisti!
Costas €3 an chlann a bhíonn le n-íoc agus bíonn tae/caifé/brioscaí chomh maith le sú do na páistí san áireamh sa costas sin. Eagraithe i gcomhar le Comhluadar Teo tá an grúpa SPRAOI oiriúnach d’éinne le páistí suas go 5 bliana d’aois.Tá gach eolas ar fáil ó Emma i nGlór Cheatharlach ar (085) 1340047. Bígí linn do Sheachtain na Gaeilge ach go háirithe agus beidh fáilte roimh cách!
www.carlow-nationalist.ie
Seachtain na Gaeilge i gCeatharlach
Márta 5, 2013
Tá Mí an Mhárta buailte linn agus dá bhrí sin Seachtain na Gaeilge á cheiliúradh fud fad na tíre agus thar lear fiú.
Tá clár iontach lán le himeachtaí spleodracha oiriúnach do gach aoisghrúpa curtha le chéile ag Glór Cheatharlach don fhéile mar chuid de chomóradh Bhliain na Gaeilge 2013. Cuirfear tús le Seachtain na Gaeilge beo ar an stáisiún raidió áitiúil Kclr96fm le heagrán speisialta den chlár Tobar an Cheantair ar an gCéadaoin, 6ú Márta idir 7.00 agus 8.00i.n. Cuirfear fáilte roimh chách ag Gaeilge le Chéile i dteach tábhairne Reddys ar an Déardaoin, 7ú Márta ag 9.00i.n. Seolfar clár na Féile Idirnáisiúnta Pan Cheilteach maidin Dé hAoine, 8ú Márta ag 11.00r.n.in Ostán Seven Oaks agus is liosta le háireamh atá le nochtadh.
Tá rogha leathan d’imeachtaí oiriúnach do pháistí bunscoile ar chlár na Seachtaine ina measc féile drámaíochta do bhunscoileanna nuair a léireoidh na páistí óga a ndrámaí ar stáitse na hamharclainne G.B. Shaw ar an Mháirt, 12ú Márta. Beidh ócáid san amharclann do dhaltaí iarbhunscoile chomh maith nuair a thaispeánfar an scannán Scéal na Gaeilge. Is scannán den scoth é seo eisithe ag Comhlacht Rosg agus a léiríodh ar TG4 anuraidh. Tugann an scannán léargas iomlán ar stair na tíre agus scéal na Gaeilge ó tugadh go hÉirinn ar dtús í go dtí an lá atá inniu ann. Is fiú go mór an scannán a fheiceail ar an Déardaoin, 14ú Márta ach ní foláir do mhúinteoirí áiteanna dá gcuid ranganna féin a chur in áirithe gan mhoill.
Tréigfidh daltaí na Gaelscoile a gcuid seomraí ranga ar an Aoine, 15ú Márta agus tabharfaidh siad aghaidh ar chlós na scoile le haghaidh Céilí Faoin Aer. Nach iontach an radharc a bheidh ann agus 500 páiste ag gabháil de Bhallaí Luimní agus Ionsaí na hInse faoi stiúir a múinteoirí. Ar ndóigh is é Lá Le Pádraig an fhéile mhór agus ní bheidh aon easpa imeachtaí ceiliúrtha i gCeatharlach ar an lá. Beannófar an tseamróg ag Aifreann as Gaeilge ag 11.00r.n. ins an Ardeaglais agus cuirfear tús le Mórshiúl na Féile ag 3.30i.n. Beidh Céilí Mór an oíche sin i gClub Iomána Bhaile Cheatharlach ag tosnú ag 9.00. Is é an rún atá ag Seachtain na Gaeilge ná deiseanna a chruthú d’fhoghlaimeoirí agus do chainteoirí líofa agus don phobal i gcoitinn chun an Ghaeilge a labhairt agus cuirfear míle fáilte roimh gach aon duine chuig na himeachtaí agus na hócáidí éagsúla a bheidh ar siúl i gCeatharlach i rith an ama. Iarrtar ar chuile dhuine idir óg agus fásta iarracht an-speisialta a dhéanamh an Ghaeilge a labhairt i rith na Seachtaine agus spraoi a bhaint as an cúpla focal a usáid i siopaí, scoileanna, san áit oibre, ar na sráideanna agus ar ndóigh i mbun siamsaíochta dóibh. Tugtar cuireadh do gach éinne a bheith páirteach agus taitneamh a bhaint as an bhFéile Ghaelach.
Gach eolas faoi Sheachtain na Gaeilge ar fáil ó Glór Cheatharlach ar 059 9158105 nó 087 2857048.
www.carlow-nationalist.ie
Paráid na Féile Pádraig i gCeatharlach
Feabhra 27, 2013
Tá na socruithe don mhórshiúl ar Lá le Pádraig i mbaile Cheatharlach fógartha agus beifear ag súil le tacaíocht agus rannpháirtíocht forleathan i mbliana.
Tionólfar na rannpháirtithe ag 2.30i.n. agus cuirfear tús leis an mórshiúl ag 3.30i.n. Baileoidh na coisithe le chéile i gcarrchlós Penneys agus is ar Shráid na Boirne a dhéanfaidh na flótaí scuaine réidh don mhórshiúl. Iarrtar ar scoileanna, clubanna spóirt, grúpaí rince agus drámaíochta, eagrais dheonacha agus an lucht gnó tacú leis an bparáid agus páirt a ghlacadh sa chomóradh. ‘Sé téama na bliana seo ná Ceiliúradh Cheatharlach 2013 agus faoin téama áirithe seo luaitear an Fhéile Idirnáisiúnta Pan Cheilteach, Ceatharlach 800 agus Tóstal 2013. Beidh Banna na bPíobairí Ghleann Uisean ag soláthar ceoil . Siúlfaidh na Comhairleoirí áitiúla ag ceann na paráide agus ní bheidh aon seastán athbhreithnithe ann.
Mar sin le cinntiú go mbeidh mórshiúl den scoth ag baile Cheatharlach i mbliana cuirfear fáilte roimh gach tacaíocht. Iarrtar ar ghrúpaí clárú gan mhoill agus roimh an Luan, 11ú Márta ar a dhéanaí. Tá foirmeacha ar fáil ó Halla an Bhaile agus is féidir gach eolas a fháil ach glaoch ar 087 2857048.
www.carlow-nationalist.ie
Féile Drámaíochta na mBunscoileanna i gCeatharlach
Feabhra 27, 2013
Eagróidh Glór Cheatharlach Féile Drámaíochta do Bhunscoileanna in amhraclann G.B. Shaw ar an Mháirt, 12ú Márta i rith Sheachtain na Gaeilge.
Tá cuireadh tugtha do mhúinteoirí agus bunscoileanna uile timpeall an chontae drámaí a ullmhú agus a léiriú ar an stáitse ar an lá. Tá roinnt mhaith drámaí cláraithe cheana féin agus páistí i mbun cleachtaidh. Is cinnte go mbeidh sceitimíní ar na daltaí agus iad i mbun aisteoireachta ar stáitse na hamharclainne. Taispeántas a bhíonn i gceist san fhéile drámaíochta gach bliain leis an mbéim ar spraoi agus siamsaíocht seachas ar iomaíocht. Ní bhíonn comórtas ná duaiseanna san áireamh. Tá an ócáid oscailte do rang ar bith ó naíonaín bheaga go rang a sé. Is i rith am scoile a bheidh an fhéile ar siúl agus beidh fáilte roimh lucht féachana. Cead isteach saor. Tá gach eolas agus foirmeacha iarratais ar fáil ó Glór Cheatharlach ach glaoch ar 059 9158105, 085 1340047 nó rphost a sheoladh chuig eolas@glorcheatharlach.ie
www.carlow-nationalist.ie
Coláiste Samhraidh do dhéagóirí i gCeatharlach
Feabhra 19, 2013
Tá an-áthas ar Glór Cheatharlach a fhógairt go n-eagrófar Coláiste Samhraidh do dhéagóirí i gCeatharlach arís an samhradh seo.
Cuirfear tús leis an gcoláiste samhraidh ar an 1ú Iúil agus leanfaidh sé ar aghaidh go dtí an 12ú Iúil ó 9.30-1.00 i.n. gach lá Luan go hAoine . Mar is gnáthach beidh an cúrsa coicíse lonnaithe i nGaelcholáiste Cheatharlach.Tá clárú oscailte anois agus ‘sé €200 an táille.
Beidh an coláiste samhraidh dírithe ar mhicléinn atá ag iarraidh feabhas a chur ar a gcuid scileanna labhartha agus scríofa sa Ghaeilge. Cuirfear fáilte roimh dhaltaí ó rang a sé go leibhéal na ahrdteistiméireachta. Beidh ranganna agus imeachtaí an chúrsa in oiriúint do dhaltaí i rang a sé agus do mhicléinn i mbliain 1 agus 2 i ngrúpa na sóisear leis na daltaí níos sine i ngrúpa na sinsear.
Chomh maith leis na ranganna foirmiúil gach lá beidh cluichí cainte, díospóireachtaí, amhránaíocht, cluichí, spórt agus damhsa ar an gclár. Cuirfear ranganna Gaeilge le meascán maith de chomhrá agus gramadach, plé agus díospóireacht in oiriúint do na daltaí. Ina theannta sin, beidh seans ag na micleinn tarraingt ar a gcuid eolais ginearálta ag tráth na gceist boird agus ar ndóigh bainfear taitneamh as na céilithe.
Is é seo an cúigiú bliain den choláiste samhraidh i mbaile Cheatharlach. Bhí rath ollmhór air anuraidh le hochtó dalta páirteach. Bhaineadar taitneamh agus tairbhe, sult agus spraoi as an gcoicís.
Beifear ag súil le héileamh mór arís i mbliana ach chun áit a chinntiú ní foláir foirm iarratais comhlánaithe maille le héarlais a bheith istigh go luath. Is féidir foirm a fháil anois ó Glór Cheatharlach, Sráid an Choláiste, Ceatharlach nó glaoch a chur ar (059) 9158105 nó (085) 1340047. Is féidir freisin ríomhphost a sheoladh chuig eolas@glorcheatharlach.ie.
www.carlow-nationalist.ie
Comhrá Gaeilge do mhicléinn i gCeatharlach
Eanáir 15, 2013
Eagróidh Glór Cheatharlach sraith nua den Chiorcal Comhrá Gaeilge Iarscoile do lucht na hardteistiméireachta an téarma seo.
Díreoidh an ciorcal ar mhicléinn atá ag lorg deiseanna breise chun Gaeilge a labhairt go neamhfhoirmiúil lasmuigh den seomra ranga. Cuirfidh scoláirí an-fháilte roimh gach deis chun feabhas a chur ar a gcuid Gaeilge go háirithe agus méadú mór go daichead fán gcéad de mharcanna iomlán an ábhair i scrúdú na hArdteistiméireachta ag dul don bhéaltriail.
Beidh an Ciorcal Comhrá ar siúl in Ionad Phobail New Oak, Ceatharlach gach Céadaoin tar éis scoile ó 4.30 go 5.30i.n. le tosú ar 23ú Eanair. Leanfaidh na seisiúin cainte seo ar aghaidh go dtí an Cháisc. An táille don téarma iomlán ná €20. Tá líon na rannpháirtithe teoranta agus ní foláir clárú go luath chun áit a chinntiú.
Chun clárú is féidir dul i dteagmháil le Glór Cheatharlach, Sráid an Choláiste, Ceatharlach ar eolas@glorcheatharlach.ie nó glaoch a chur ar 085 1340047 nó 059 9158105.
www.carlow-nationalist.ie
Cúrsaí Gaeilge an fhómhair le Gaelchultúr i gCeatharlach
Lúnasa 28, 2012
Le críoch an tsamhraidh buailte linn agus míonna an fhómhair ag síneadh amach romhainn is iomaí duine atá ag smaoineamh ar chlárú do chúrsa oíche.
Tá an-áthas ar Ghlór Cheatharlach a fhógairt go mbeidh cúrsaí Gaeilge do dhaoine fásta i gcomhar le Gaelchultúr ar fáil arís i mbliana.
Is í seo an ceathrú bhliain de na cúrsaí Gaelchultúir i gCeatharlach. Cuirfear tús leis na ranganna an tseachtain dar tús 24 Meán Fómhair agus rachaidh siad ar aghaidh thar deich seachtaine. Chun freastal cuí a dhéanamh ar fhoghlaimeoirí beidh rogha de chúrsaí ar fáil ag bun agus meán leibhéil. Beidh na Bunchúrsaí ar siúl oíche Luain agus na Meánchúrsaí ar an Mháirt leis na ranganna go léir ó 7:00-9:00i.n. in oifigí Chomhairle Chontae Cheatharlach ar Bhóthar Átha Í.
Daoine ar mhian leo freastal ar chúrsa agus nach bhfuil cinnte cén leibhéal a d’oirfeadh dóibh is féidir leo tabhairt faoi Thriail Ghaeilge ar Líne atá ar fáil saor in aisce ar shuíomh idirlín an chomhlachta www.gaelchultur.com. Tá clárú oscailte anois ar líne nó trí ghlaoch a chur ar 1890 252 900. Tá gach eolas ar an suíomh dátheangach nó is féidir na sonraí uile a fháil ó Glór Cheatharlach ar 085 1340047 nó scríobh chuig emma@glorcheatharlach.ie.
Grúpa nuabhunaithe tuistí agus leanaí as Gaeilge i gCeatharlach
Tá ag éirí go breá le Spraoi, an grúpa nua Tuistí/Leanaí a bunaíodh i gCeatharlach le déanaí. Tagann an grúpa le chéile gach maidin Mháirt ó 10-12 meánlae in Ionad Phobal New Oak. Bíonn cupán tae nó caife ar fáil do na tuismitheoirí agus comhrá dátheangach ar siúl acu fhad is a bhíonn na páistí ag súgradh. Tá rogha leathan de bhreagáin ann do na buachaillí agus cailíní.
Gabhann an grúpa buíochas ó chroí leis na heagrais Comhluadar Teo agus Coiste Chúram Leanaí Chontae Cheatharlach as urraíocht fhlaithiúil a chur ar fáil dóibh.
Is áit iontach é an tIonad Phobal New Oak le háiseanna atá an-oiriúnach do thuismitheoirí agus pháistí araon-fiú áit shúgartha lasmuigh le sleamhnáin agus trealamh le husáid nuair a bhíonn an aimsir go breá. Ar ndóigh baineann na páistí an-taitneamh as seo. Críochnaíonn an seisiún gach seachtain le cúpla amhrán Gaeilge agus is breá leis na páistí iad a chanadh agus na gíomhaíochtaí á dhéanamh acu.
Cuirtear fíórchaoin fáilte roimh éinne go bhfuil suim acu Gaeilge a labhairt lena bpáistí agus iad i suíomh spraíúil, neamhfhoirmiúil. Ní gá a bheith líofa sa Ghaeilge áfach-ach díreach suim agus a bheith sásta triail a bhaint aisti.
Tá costas €3 an chlann in aghaidh an lae i gceist le tae/caifé/brioscaí chomh maith le sú do na páistí san áireamh sa chostas sin. Tá an grúpa oiriúnach d’éinne le páistí suas go 4 bliana d’aois.
Tá gach eolas ar fáil ó Emma i nGlór Cheatharlach ar (085) 1340047. Bígí linn, scaip an scéal agus beidh fáilte roimh chách!
SULT an fhómhair i gCeatharlach
Tar éis bhriseadh an tsamhraidh fillfidh SULT, an oíche shóisialta trí Ghaeilge, ar Cheatharlach ar an Déardaoin 30 Meán Fómhair. Cuirfear céad míle fáilte roimh chách chuig Sult an fhómhair sa Teach Bar, Sráid na Tulaí ag 9.00i.n.
Tiocfaidh daoine le chéile ansin ar an Déardaoin deireannach de gach mí chun taitneamh a bhaint as caint, comhrá agus comhluadar trí Ghaeilge agus cuirfear fáilte roimh dhaoine nua i gcónaí.
Tabhair faoi deara an t-ionad nua agus Sult ag bogadh béal dorais ó Theach Dolmain go Teach Bar. Buail isteach le haghaidh dreas cainte. Bígí linn ar an Déardaoin seo chun SULT a bhaint as an nGaeilge.
www.carlow-nationalist.ie
