Comhdháil: Forbairt na Ceannasaíochta sa Bhunscoil lán-Ghaeilge
Is oth le GAELSCOILEANNA TEO. a chur in iúl duit go raibh orainn an chomhdháil a bhí beartaithe do mhí Lúnasa ar fhorbairt na ceannasaíochta a chur ar ceal i bhfianaise a laghad rannpháirtithe a bhí cláraithe. Ón aiseolas a fuair muid, tá an-fhiúntas leis an gclár féin ach ní fheileann an tseachtain sin (22-23 Lúnasa) agus daoine ar saoire an tsamhraidh go fóill. Faraor, ní raibh aon tsolúbthacht ann i dtaobh na ndátaí mar go raibh sé le bheith mar chuid de scoil samhraidh an RTU ó thuaidh.
Ba mhaith linn áfach triail a bhaint as é a rith arís, b’fhéidir sa bhfómhair, agus d’fháilteoimis go mór roimh aon mholtaí uait maidir le:-
- Tréimhsí/téarmaí feiliúnacha i ndialann an Phríomhoide/Leas-Phríomhoidí?
- Laethanta: an bhfeilfeadh lá iomlán Aoine agus Satharn éigin?
- Suíomh: an mbeadh BÁC nó suíomh eile lár tíre feiliúnach le haghaidh oiliúna uile-oileánda ó thaobh rochtana de?
Is féidir moltaí a sheoladh ar ríomhphost chuig blathnaid@gaelscoileanna.ie. Gabhaimid buíochas leo siúd a chláraigh don oiliúint agus tá súil againn go bhfeilfeadh cibé socrú nua a dhéanfar amach anseo duit.
Eolas maidir leis an gComhdháil:
An chéad chomhdháil uile-oileánda riamh ar fhorbairt na ceannasaíochta sna bunscoileanna lán-Ghaeilge. Comhthionscadal idir An Coiste Seasta Thuaidh Theas ar an nGaeloideachas; Ionad Réigiúnach Oiliúna agus an tSeirbhís um Fhorbairt Ghairmiúil do Mhúinteoirí.
Tá clár an-fhiúntach agus mealltach curtha le chéile againn ar riachtanais oiliúna a thagann chun cinn ó phríomhoidí go leanúnach agus tá súil againn go gcabhróidh an clár seo le ceannasaithe dul i ngleic leis na dúshláin agus na deiseanna atá ann san earnáil lán-Ghaeilge ar mhaithe lena bhforbairt ghairmiúil phearsanta féin agus forbairt a gcuid foirne.
Rannpháirtithe:
Príomhoidí/leasphríomhoide ó gach bunscoil lán-Ghaeilge ar bhonn 32 contae, Gaeltacht san áireamh mar aon le príomhoidí agus comhordaitheoirí na nAonad: Cuirfear áiseanna comhuaineacha ar fáil do phríomhoidí na nAonad.
Clár na Comhdhála:
- Ról na gCeannasaithe sa Scoil Lán-Ghaeilge
- Tarmligean dualgais – foireann bhainistíochta agus foireann iomlán
- Forbairt na meán-cheannasaíochta le róil agus freagrachtaí soiléire Ag cinntiú Ardchaighdeán Oideachais
- Ionduchtú agus meántóireacht do mhúinteoirí nua
- Forbairt Ghairmiúil an Mhúinteora
- Measúnú Uile Scoile agus Féinmheasúnú i dtreo barr fheabhais: tábhacht, impleachtaí agus feidhmiú éifeachtach
- Ceannasaíocht Teanga Shóisialta / Chumarsáide na scoile
- Polasaí na Gaeilge / sainmheon teanga na scoile a chaomhnú
- Cruinneas na bpáistí / na múinteoirí / na foirne
- Gaeilge sa chlós / lasmuigh den fhoghlaim fhoirmiúil
- Pleanáil uile scoile (cúrsaí curaclaim san áireamh)
- Cur chuige an tumoideachais
- Léitheoireacht an Bhéarla agus na Gaeilge sa scoil lán-Ghaeilge
- Ag Cothú Cultúir Dearfaigh
- Gaol a chothú idir an scoil agus an scoilphobal / mórphobal
- Cur chuige cumarsáide le páirtithe éagsúla
- Comhoibriú idir scoileanna
