Tráth na gCeist – Gaelscoil Thaobh na Coille
Aibreán 5, 2011
Eagraíodh Tráth na gCeist idirscoile ar an Luan an 7 Márta mar chuid d’imeachtaí ‘Seachtain na Gaeilge’. Daltaí R5 & R6 ó Ghaelscoil Thaobh na Coille, An Chéim, Scoil Lorcáin, Baile na Manach & Gaelscoil Phádraig, Baile Bhreac a bhí i láthair. 210 dalta ar fad a d’fhreastal ar an imeacht seo a reachtáileadh i Halla Ghaelscoil Thaobh na Coille. Eagraíodh na daltaí i bhfoirne de seisear. Foirne measctha idirscoile a bhí i gceist, triúr dalta ó Scoil Lorcáin, beirt dhalta ó Ghaelscoil Thaobh na Coille & dalta amháin ó Ghaelscoil Phádraig. 35 foireann ar fad a bhí in iomaíocht agus bhí na daltaí ag cur aithne ar a chéile agus iad ag iarraidh teacht ar na freagraí cearta. 8 mbabhta ar fad a bhí i gceist agus idir gach babhta chuir daltaí ó na scoileanna agus na ranganna éagsúla mír beag ar an ardán. Léiríodh an-mheascán tallainne ‘sna míreanna seo idir amhránaíocht ranga, taispeántas gleacaíochta, amhránaíocht aonair, ceol uirlise agus rl. Bronnadh spot duaiseanna freisin ar dhaltaí a bhí tar éis eolas a bhailiú ar na daltaí eile a bhí ar an bhfoireann leo nó a bhí in ann ceisteanna faoi na scoileanna éagsúla a bhí ag glacadh páirte sa tráth na gceist a fhreagairt. Bronnadh na spot dhuaiseanna deirneacha ar an gcéad fhoireann a mhalartaigh a gcuid geansaithe scoile! Buíochas leis an Múinteoir Maoilíosa Ó Dubhthaigh & An Múinteoir Aoife Ní Chearnaigh as na ceisteanna a chur le chéile & buíochas speisialta le Maoilíosa as a bheith ina fhear a’ tí don lá. Buíochas freisin leis an Múinteoir Niamh Ní Chriadháin ó Scoil Lorcáin a bhí freagrach as na ceisteanna do na spot duaiseanna a eagrú. Bhí an-lá go deo ag na daltaí agus na múinteoirí araon!
