An Plean Straitéiseach ag díriú ar bhunú scoileanna nua, tacú le scoileanna fad-bhunaithe & teagmháil a dhéanamh leis na pobail áitiúla
Samhain 17, 2008
De hAoine, 14 Samhain, 2008 – 1100
AN PLEAN STRAITÉISEACH AG DÍRIÚ AR BHUNÚ SCOILEANNA NUA, TACÚ LE SCOILEANNA FAD-BHUNAITHE AGUS TEAGMHÁIL A DHÉANAMH LEIS NA POBAIL ÁITIÚLA
D’fhoilsigh GAELSCOILEANNA TEO. ‘Plean Straitéiseach 2008-2011′ inniu. Is ag Comhdháil Bhliantúil agus Oideachais na heagraíochta i mBaile an Bhiataigh, Co na Mí a seoladh an plean le tacaíocht ó Fhoras na Gaeilge.
Bealach chun cinn atá sa Phlean Straitéiseach i dtreo soláthair beartaithe do bhreis agus 20 bunscoil agus 10 n-iar-bhunscoil lán-Ghaeilge faoi 2013. Anuas air seo, molann sé réimse beart chun cur le rath an 140 scoil lán-Ghaeilge ag an mbunleibhéal agus 39 ag an iar-bhunleibhéal sna 26 contae lasmuigh de na ceantair Gaeltachta ar bhonn gearrthréimhseach agus fadtréimhseach. Cuimsíonn an tríú ghné den phlean moltaí inar féidir leis na scoileanna dul i bhfeidhm ar an bpobal áitiúil chun an cultúr agus teanga i measc an phobail a chothú.
"Seasann fás an oideachais lán-Ghaeilge mar thiomna don éileamh agus don tacaíocht a léiríonn daoine sa phobal", a dúirt Uachtarán GAELSCOILEANNA TEO., Mícheál Ó Broin. "Léiríonn an plean a foilsíodh inniu na haidhmeanna atá le comhlíonadh ag an scoilphobal lán-Ghaeilge chun an díograis atá mar bhunchloch na scoileanna lán-Ghaeilge a chothú agus a fhorbairt."
"Tá dúshláin roimh an earnáil oideachais mar atá roimh na sochaí i gcoitinne. Seasaimid do thodhchaí na bpáistí nach bhfuil guth díreach acu féin. Agus an sprioc seo á bhaint amach, caithfimid a bheith soiléir faoin a bhfuil le déanamh chun an t-oideachas is fearr a sholáthar do ghlúin an lae inniu agus do ghlúin an lae amárach."
"Is é an fís atá leagtha amach againn sa Phlean Straitéiseah ná gaelscolaíocht d’ardchaighdeán a bhunú agus a bhuanú ar fud na tíre maraon le pobal agus cultúr na Gaeilge a fhorbairt agus a neartú."
"Sonraíonn an Plean Straitéiseach seo na céimeanna atá le glacadh againn chun fócas a thabhairt d’fhíorú na físe seo."
Críoch
Le haghaidh eolais sa bhreis nó chun agallamh le Mícheál Ó Broin a shocrú
Rob Hartnett
Stiúrthóir, Hartnett McClure PR ar (086) 3851955