90% sna Torthaí GCSE do dhaltaí Choláiste Feirste
Lúnasa 24, 2012
Tá Coláiste Feirste, an t-aon iarbhunscoil lánGhaeilge sna sé chontae, i ndiaidh an treocht i dtreo ísliú grádanna scrúduithe i scoileanna an tuaiscirt a shárú. Bhain 90% de na daltaí an tagarmharc de 5 nó níos mó GCSE amach i mbliana. Tá ardú suntasach fosta i líon na ndaltaí a ghnóthaigh grádanna A* agus A i réimse leathan ábhar. Ní bhfuair dalta ar bith níos lú ná 4 GCSE agus fuair cuid acu na barrghráid i 10 n-ábhar GCSE. Beidh tromlach mór na ndaltaí seo ag pilleadh ar an scoil an tseachtain seo chugainn chun tabhairt faoin staidéar sa Séú Foirm.
Dúirt Pádraig Mac Cathail, Ceann Bliana ar an ghrúpa daltaí seo, “Thar cheann fhoireann Eocharchéim 4 ba mhaith liom comhghairdeas ó chroí a dhéanamh leis na daltaí agus a dtuismitheoirí ar na gráid iontacha atá bainte amach acu. Ba mhór an pleisiúr dúinn bheith ag obair leis na Gaeil óga seo le dhá bhliain anuas. Ní amháin gur daltaí den scoth iad ach is daoine óga den chéad scoth iad atá i ndiaidh forbairt agus fás mar dhaoine aibí agus mar Ghaeil. Is iontach an lá é seo don scoilphobal s’againne.”
Bhí torthaí iontacha ag go leor daltaí áirithe. D’éirigh le Déaglán Mac Conmhaoil agus Nuala Meascaigh 10 ngrád A* nó A a bhaint amach. Bhí ráta pás 100% ag an Eolaíocht, an Fhraincis, an Drámaíocht, Staidéir Mhótar-Feithicil, Cúram Sláinte Sóisialta agus Tíreolaíocht. D’éirigh le Roinn na Matamaitice an ráta pas a mhéadú faoi dhó – éacht nach beag agus an Mhata mar mhór-sprioc forbartha i scoileanna Bhéal Feirste.
Rinne Príomhoide na scoile Micheál Mac Giolla Ghunna comhghairdeas le daltaí, tuismitheoirí agus foireann na scoile. “Leanann na torthaí seo na gráid iontacha a fuair daltaí Ardléibhéil an tseachtain seo caite. Léiríonn siad díograis agus dícheall na múinteoirí agus na ndaltaí le 5 bliana anuas. Ba mhaith liom an deis seo a thapú fosta le haitheantas a thabhairt do mhúinteoirí na mbunscoileanna a thug dúshraith den scothoideachas do na daltaí seo gur féidir linne anseo i gColáiste Feirste cur leis chun barrfheabhas a bhaint amach. Chuir muid plean feabhsaithe i bhfeidhm tamall de bhlianta ó shin agus is é príomhaidhm s’againn go mbainfidh gach dalta lán a n-acmhainneachta féin amach. Tá foireann iontach againn ag Eocharchéim 4 atá ag cur an phlean sin i bhfeidhm, idir mhúinteoirí agus cheannairí, agus is léir go bhfuil rath as cuimse ar a gcuid díograis. Tá dream eile de Ghaeil óga éirimiúla sároilte cothaithe againn do phobal na Gaeilge agus do phobal na cathrach seo.
“I ndiaidh scór bliain ar an tsaol tá Coláiste Feirste faoi lánbhláth anois. Is léir go bhfuil ciall agus ceart le cinneadh Roinn an Oideachais le déanaí £11.9 milliún a infheistiú sa suíomh s’againne. Le foirgneamh agus áiseanna spóirt úrscothacha is cinnte go mbeimid ag tógáil ar rath na scoile ar na blianta atá le teacht.”
Dámhachtainí Fulbright 2013-2014
Lúnasa 24, 2012
Béidh an Coimisiún Fulbright ag oscailt an comórtas ar Dé hAoine (24.08.12) do Dhámhachtainí Fulbright 2013-2014 a thairgeann deontais do mhic léinn iarchéime, scoláirí agus daoine gairmiúla chun dul go dtí na Stáit Aontaithe le dul i mbun léachtóireachta, taighde nó staidéir ar feadh bliana. Anuas air seo, cuirtear réimse clár ar siúl do na buaiteoirí in Éirinn agus sna Stáit Aontaithe agus faigheann siad árachas agus víosa J-1. Tá tuilleadh eolais ar fáil ar www.fulbright.ie
Caithfidh cóip chrua chomh maith le cóip leictreonach de gach iarratas a bheith istigh faoi 3.00 i.n. 14 Samhain 2012.
Tá trí chineál dámhachtana ar fáil:
- Dámhachtainí Fulbright do Mhic Léinn : Suas go bliain acadúil de staidéar iarchéime nó taighde sna Stáit Aontaithe in aon réimse, na dána san áireamh. Baineann uasmhéid $20,000 leis na deontais. Is féidir le hiarrthóirí fanacht chun a gclár acadúil a chríochnú má tá sé níos faide ná bliain amháin.
- Dámhachtainí Fulbright do Scoláirí agus Daoine Gairmiúla :Tá deontais ar fáil, suas go €35,000 (An Ghaeilge) agus $20,000 (Dámhachtainí Ginearálta), don lucht léinn agus do dhaoine gairmiúla, le níos mó ná cúig bliana de thaithí, chun dul i mbun taighde agus/nó léachtóireachta sna Stáit Aontaithe ar feadh tréimhse idir trí mhí agus dhá mhí dhéag.
- Dámhachtainí Fulbright um Chúntóireachtaí Múinteoireachta i dTeangacha Iasachta (FLTA) :Is Dámhachtainí de thréimhse deich mí iad seo do mhúinteoirí Gaeilge chun deis a thabhairt dóibh barr feabhais a chur ar a gcuid scileanna múinteoireachta tríd a bheith ag múineadh in ollscoil sna Stáit Aontaithe chomh maith le ranganna iarchéime a thógáil.
Tá roinnt dámhachtainí urraithe ar fáil do mhic léinn agus do scoláirí i réimsí ar leith. Ina measc tá:
- Dámhachtain Fulbright – an Ghníomhaireacht um Chaomhnú Comhshaoil in Uisce, Athrú Aeráide agus Comhshaol Inbhuanaithe (Mac léinn agus Scoláire)
- Dámhachtain Fulbright – Foras na Mara in aon topaic a bhaineann le hEolaíocht / Gnó na Mara (Mac léinn agus Scoláire)
- Dámhachtain Fulbright – Fiontraíocht Éireann sa Nuálaíocht (Mac léinn amháin)
- Dámhachtain Fulbright –Teagasc i dTalmhaíocht, Bia, agus Foraoiseacht (Mac Léinn amháin)
- L.L.M ó Fulbright – Ollscoil Notre Dame sa Dlí Idirnáisiúnta um Chearta Daonna (50% de na táillí teagaisc íoctha) (Mac léinn amháin)
Ag labhairt ag an seoladh, dúirt Una Halligan, Cathaoirleach ar Choimisiún Fulbright in Éirinn, “Bliain i ndiaidh bliana, cuireann na taighdeoirí, na daoine gairmiúla agus na hiarchéimithe is fearr in Éirinn isteach ar Dhámhachtainí Fulbright. Níl aon amhras ach go mbeidh an bhliain seo mar an gcéanna. Tugann Dámhachtainí Fulbright na hÉireann deis do na buaiteoirí staidéar agus taighde a dhéanamh chomh maith le caidrimh a chruthú sna Stáit Aontaithe. Faigheann lucht Fulbright taithí fíorluachmhar ar féidir leo a roinnt le daoine eile nuair a thagann siad ar ais agus a thugann buntáiste dóibh sna réimsí éagsúla ina bhfuil siad. Mholfainn d’aon duine a bhfuil spéis acu sna Dámhachtainí féachaint ar ár suíomh chun tuilleadh eolais a fháil”.
Bronntar Dámhachtainí Fulbright gach bliain ar mhic léinn, scoláirí agus ar dhaoine gairmiúla chun dul i mbun staidéar iarchéime agus taighde in institiúidí tríú leibhéil, cultúrtha agus institiúidí eile nach iad sna Stáit Aontaithe. Sa bhliain 2012, bronnadh dámhachtainí ar 37 duine in Éirinn – an méid is mó riamh.
Moltar do dhaoine cur isteach ar na réimsí ar fad.
Chun tuilleadh eolais a fháil, téigh i dteagmháil le:
Joanne A. Davidson, Oifigeach Cumarsáide agus Eolais, Coimisiún Fulbright na hÉireann.
joanne.davidson@fulbright.ie
01.660.7670 / 087.258.1417
Applications open for grants to study, teach and research in US
Lúnasa 24, 2012
MSc i nGnó agus i dTeicneolaíocht an Eolais
Lúnasa 24, 2012
Tá Fiontar DCU ag taisicint scoláireachtaí de luach €2,000 don chúrsa MSc i nGnó agus i dTeicneolaíocht an Eolais.
Clár páirtaimseartha atá ann thar dhá bhliain atá dírithe ar chéimithe ar mhian leo postanna bainistíochta agus forbartha a bhaint amach sna hearnálacha príobháideacha agus poiblí, an t-oideachas san áireamh. Reáchtálfar ranganna ag an deireadh seachtaine.
Le haghaidh tuilleadh eolais is féidir dul i dteagmháil le Sally Mhic Dhomhnaill ag 01 7005614 nó ríomhphost a chur chuig fiontar@dcu.ie.
Is é 31 Lúnasa 2012 an spriocdháta le haghaidh iarratas.
Teaching courses may widen entry requirements
Lúnasa 24, 2012
North’s GCSE top grade percentage rises again
Lúnasa 24, 2012
The sum of Irish and maths
Lúnasa 23, 2012
Nursery proposal turned down
Lúnasa 23, 2012
An rás mallaithe
Lúnasa 23, 2012
CROBHINGNE: TÁ TORTHAÍ na hardteistiméireachta ar fáil arís agus rás na bpointí in airde láin.
An chaint chéanna bliain i ndiaidh bliana. Casadh beag an t-am seo toisc marcanna sa bhreis a bheith ar shumanna seachas mar a bhíodh.
An tAire a d’iarr na hathruithe agus atá anois ag iarraidh iad a chasadh siar, nó mar adeir siad sa bhéarlagair neodrach, “athbhreithniú” arís a dhéanamh orthu.
Máithreacha agus aithreacha an tsaoil ag glaoch ar an raidió agus ag breacadh chun na nuachtán um éagothroime an chórais.
Ní féidir a rá nach bhfuil smut mór den cheart acu. Is diabhalta agus is éagórach an córas é go mbeadh saol agus fáistine duine ag brath go hiomlán ar conas mar a rinne an duine sin ar aon lá cinniúnach amháin, fág gach a ndearna sé roimhe sin as an áireamh.
D’fhéadfadh sé a bheith ar an duine ba mheabhraí amuigh, agus é ag obair ó dhubh go dubh, agus a bhundún curtha amach go míbhéasach aige ar feadh sé mbliana fada allais, agus ar lá na sprice tinneas cinn a bheith aige, nó is measa ná é, go bhfuair a shinseanmháthair bás.
Is intuigthe go léir go n-éileofaí, dá réir sin, córas a thabharfadh san áireamh cumas duine san fhairsingeacht, seachas scrúdú a bheadh i dtaobh leis an aon iarracht amháin. Moltar meastóireacht leanúnach, tuairiscí ó mhúinteoirí, fillteáin reatha, litreacha molta, teastais dochtúra, fianaise fhad na haimsire…
Tá an moladh seo chomh ciallmhar sin gur chóir é a chur i bhfeidhm ar gach gné den saol a bhfuil iomaíocht éigin i gceist. Bhí an t-ádh le buíon na dteistiméireachtaí i mbliana go raibh na cluichí Oilimpeacha ar siúl tar éis allas na scríbhneoireachta, mar is deimhnitheach go mbeadh go leor ag féachaint orthu i mí an Mheithimh mar mhalairt ar na leabhair. Ní móide gur rith sé leo, áfach, go raibh rud éigin éagothrom ó bhonn aníos ag baint le na cluichí céanna úd.
Tá na cluichí Oilimpeacha seo, agus beagnach gach saghas spóirt eile bunaithe ar an tuairim amaideach go mbaineann bua le feabhas faoi leith ar lá áirithe.
Níor ghá go mbeadh aon bhaint ag an lá áirithe atá sa treis le haon rud a chuaigh roimhe, gan amhras, agus dá réir sin, bronntar boinn óir agus airgid agus cré-umha ar dhaoine a ráiníonn gurb iad is fearr ag pointe áirithe, agus déantar dearmad glan ar na gaiscígh eile ab fhearr ná iad a tharla go glanseansúil nach raibh siad chomh maith leo ar lá úd na cinniúna.
Ní cheapaim féin gurb aon tslí loighiciúil í seo le comórtas cluichíochta a eagrú. Mo thuairim mhacánta féin, gur chóir na cluichí Oilimpeacha a mheas ar conas mar a éiríonn le lúthchleasaithe idir dhá mhórchomórtas. Dá réir sin, sa chás is go mbeadh duine ag caitheamh an chasúir fad fada áirithe ar feadh cheithre mbliana, ba cheart go meáfadh sin níos mó ná aon chaitheamh mór timpistiúil amháin agus an ghrian ag taitneamh.
Fairis sin, áfach, mura n-éireodh le duine seachas a chéile ar an lá spriocálta ba chuí go mbeadh córas achomhairc ann ina dtiocfadh gach duine ar ais chun an ráis a rith arís, nó na saighde a theilg, nó na léime a thabhairt, nó an chasúir a chaitheamh.
Ina theannta san, níl aon amhras ná gur chóir tuairimí agus tuairiscí na saineolaithe a chur san áireamh. Cuir i gcás an cóitseálaí proifisiúnta sin a thuig go raibh reathaire amháin thar barr agus a scoith gach duine thall is abhus oíche i ndiaidh oíche, níl aon chúis nach gcuirfí a bhreith sin suas is anuas leis an amaitéarach aon uaire a bhainfeadh bonn óir gan súil, gan choinne.
Bheadh sé fuiriste go leor teacht ar chóras a mheáfadh tuarascálacha chóitseálaithe seachas a chéile, córas a dháilfeadh pointí orthu de réir boscaí a thiceáilfí ar ghréasáin eolaíochtúla de réir na slata tomhais b’oibiachtúla amuigh.
Abair go rithfeadh duine 100 méadar faoi bhun 10 soicind – ní bheadh aon deimhne againn gur dhein sé riamh roimhe sin é, ná go ndéanfadh arís mura mbeadh tuarascálacha agus meastóireacht leanúnach againn ón aos oiliúna.
Ní hí an cheist, mar sin, na scrúduithe a reáchtáil níos cosúla leis na cluichí Oilimpeacha, ach na cluichí Oilimpeacha a reáchtáil níos cosúla leis na scrúduithe, mar atá siad á moladh.
Is beag é m’amhras ná go mbeadh foraois de bhoinn óir againn an chéad uair eile, ach na tuarascálacha a bheith i gceart.
www.irishtimes.com
Raidió yí-há
Lúnasa 22, 2012
CHEADAIGH AIRE Stáit na Gaeltachta, Dinny McGinley, deontas €27,000 don stáisiún idirlín, Raidió Rí-Rá, an tseachtain seo caite.
Tá Rí-Rá ag craoladh an cheoil is déanaí ó na cairteacha trí mheán na Gaeilge do dhaoine óga ó bhí Márta 2008 ann. Mhol McGinley an stáisiún as “an obair fhiúntach” agus “fís” a bhí acu freastal a dhéanamh ar riachtanais teanga dhaoine óga; bhí “an-mholadh” ag dul dóibh.
Dúirt cathaoirleach an stáisiúin, Traic Ó Braonáin, gur mhór leo an t-aitheantas agus an chabhair a thug an deontas dóibh cur lena gcuid seirbhísí. Ba é cuspóir Rí-Rá an mhuintir óga a spreagadh “leis an teanga a úsáid ar bhealach spraíúil, nuálaíoch lasmuigh den seomra ranga”.
www.irishtimes.com
