Tóstal na Gaeilge 2013
Feabhra 8, 2013
Ba mhór ag Comhdháil Náisiúnta na Gaeilge tú a bheith i láthair ag Tóstal na Gaeilge 2013 a bheidh ar siúl ar an 16 Feabhra 2013, san óstán Hilton, Plás Charlemont, Baile Átha Cliath 2.
“Beart de réir Briathair” an téama a bheidh ag Tóstal na Gaeilge 2013. Osclófar an plé le píosa cainte ó Chomhfhreagraí Polaitíochta an Irish Times, Harry McGee, maidir le beartais an Rialtais i leith na Gaeilge, agus ansin díreoidh dhá phainéal éagsúil ar na beartais is déanaí atá curtha chun cinn ag an Rialtas faoi Acht na Gaeltachta 2012. Um thráthnóna pléifear freagrachtaí an Stáit i leith na Gaeilge.
Is é seo an deis is mó do phobal na Gaeilge teacht le chéile agus plé a dhéanamh ar mhórcheisteanna an lae i dtaobh na Gaeilge, na Gaeltachta agus na sochaí Gaelaí. Tá clár cuimsitheach curtha le chéile do Thóstal na bliana seo, le scoth na gcainteoirí ag díriú isteach ar cheisteanna móra na Gaeilge in atmaisféar oscailte.
Tá gach eolas faoi chlár agus faoi chainteoirí Thóstal na Gaeilge ar fáil ag www.gaelport.com/tostal2013.
Chun d’áit ag Tóstal na Gaeilge 2013 a chur in áirithe, déan teagmháil le le Máire Ní Phuirséil, 01 679 4780 / maire@comhdhail.ie.
Seachtain Oidhreachta Náisiúnta 2013
Feabhra 7, 2013
7 Lúnasa 2013 – 25 Lúnasa 2013
Beidh an Seachtain Oidhreachta Náisiúnta ar siúl ón 17-25 Lúnasa 2013.
Is féile bliantúil í seo a eagraíonn an Chomhairle Oidhreachta. Bíonn imeachtaí oidreachta de gach cineál ar siúil le linn na seachtaine agus is é cuspóir na féile ná ceiliúradh a dhéanamh ar oidhreacht shaibhir na tíre.
D’fhreastail na sluaite ar imeachtaí Sheachtain Oidreachta Náisiúnta anuraidh. Beidh neart imeachtaí cultúrtha agus oidhreachta ar siúl ar fud na tíre, ina measc beidh margaí meánaoiseacha, siúlóidí stairiúla, ceol traidisiúnta, damhsa, léachtaí stairiúil, imeachtaí ar an gcosta, ceardlainne, margaí bia,
taispeántais tuíodóireachta agus ceardaíochta mar aon le go leor eile.
Tá na himeachtaí ar fad saor in aisce.
Ta liosta de imeachtaí ar fad ar fud na tíre ar fáil ar: www.heritageweek.ie
Foilsithe ar Gaelport.com
Dianchúrsa Gaeilge don Ardteist – Intensive Irish course for Leaving Cert. Students in Loughrea
Feabhra 7, 2013
Gaeilge don Ardteistiméireacht!
Dé Máirt, 12 Feabhra, ó 09:30 – 13:40in
Ba mhaith le Gaeilge Locha Riach a fhógairt go bhfuil siad ag clárú mic léinn do dhianchúrsa Ardteiste atá eagraithe do lucht meánscoile. Beidh an dianchúrsa seo ar siúl in ionad Ghaeilge Locha Riach, Baile Locha Riach, le linn an bhriseadh lár-théarma. Táille €20 atá ar an chúrsa agus is gá áit a chur in áirithint roimh ré.
Beidh an cúrsa seo dírithe ar an siollabas Gnáthleibhéil agus Ardleibhéil araon. Díreofar aird ar nodanna don scrúdú cainte, don cluastuiscint, don scríbhneoireacht agus don chúrsa liteartha ar fad idir fhilíocht agus prós. Gaeilgeoir ó dhúchas agus múinteoir cáilithe dara leibhéal a bheidh i mbun an chúrsa.
Tá na huimhreacha teoranta agus tá an cúrsa féin ag braith ar éileamh.
Má tá suim ag éinne áit a chur in áirithe nó tuilleadh eolais a fháil, ní gá ach teagmháil a dhéanamh leis an oifig, Gaeilge Locha Riach, ag 091 870718 nó ag oifig@lochariach.com.
Clár an lae
9.30-9.45
Fáiltiú & cur in aithne
9.45-10.45
An chúrsa liteartha – idir fhilíocht agus prós
10.50-11.30
An chluastuiscint
11.35-12.35
Gramadach agus scríbhneoireacht
12.40-13.40
An scrúdú cainte
Féile Bríde le Cleamairí Ard Mhacha
Feabhra 7, 2013
An deireadh seachtaine seo caite, rinne Cleamairí Ard Mhacha Féile Bríde a cheiliúradh i measc phobail éagsúla a gcontae. Bhí siad ag cleamaireacht ag Eaglais na hÉireann, Eaglais Naomh Maolmhaodhóg agus ag tobar Bhríde in Ard Mhacha.
Le cois an cheiliúrtha, rinneadh bailiúchán airgid do Naíscoil Shliabh Fuaid atá le hoscailt in Ard Mhacha i gceann míosa.
Reáchtalaíodh an ócáid i gcomhpháirt le Ciorcal Cómhra Ard Macha, Mens Sheds agus Ionad na Spioradáltachta Ceiltí in Ard Mhacha.
Téann traidisiún na gcleamaireachta siar 2,500 bliain ar an oileán seo. Bunaíodh Cleamairí Ard Mhacha 35 bliain ó shin nuair a tháinig seisear fear dífhostaithe le chéile a raibh ceol traidisiúnta ar a gcumas acu.
Rinne an seisear Cleamairí eile a thraenáil faoi scéim phobail ACT a bhí á eagrú sa cheantar ag an am.
Sna luathbhlianta, rinne siad drámaí a chur ar ardán do pháistí bhunscoile in Ard Mhacha. Mar a d’imigh na blianta, tháinig forbairt ar líon agus ar réimse a ndrámaí agua a gcoirmeacha ceoil.
Tá ionadaíocht déanta acu ar son na hÉireann ag féiltí éagsúla ar fud na cruinne. Níos giorra don bhaile, tá tograí trasphobail faoi lámh acu ar bhun leanúnach.
Féach an físeán anseo: Meon Eile
Comhdháil Meitheal na mBeag 2013
Feabhra 5, 2013
Beidh Comhdháil Mheitheal na mBeag ar siúl an 15 agus 16 Feabhra 2013 sa Taibhdhearc. Is é teideal na comhdhála i mbliana ná Cearta Cultúrtha an Pháiste, bunaithe ar Airteagal 31 de Coinbhinsiún na Náisiún Aontaithe um Chearta an Linbh.
Is scáthghrúpa agus áiseagraíocht é Meitheal na mBeag a fhreastalaíonn ar ealaíontóirí, oideachasóirí, comhlachtaí, ionaid ealaíon agus institiúidí a léiríonn dílseacht do chur i láthair agus d’fhorbairt na dtaibhealaíon páiste-lárnach trí Ghaeilge.
Seo grúpa daoine le paisean agus fuinneamh, idir ealaíontóirí agus múinteoirí, a chreideann go bhfuil sé tábhachtach go mbíonn rochtain ag páistí ar scoth na n-ealaíon. Idir amharclann agus ceol, filíocht agus fís-ealaíon, tá sé práinneach go bhfuil ealaíon den scoth ar fáil don aos óg, ar mhaithe leo mar dhaoine anois agus ar mhaithe le sláinte an tsochaí. Ba mhaith le Meitheal na mBeag cearta cultúrtha an pháiste a chur chun cinn go gníomhach.
Tá Meitheal na mBeag ag súil le fáilte a chur roimh Martin Drury ón gComhairle Ealaíon agus bunaitheoir ‘The Ark’, an lárionad cultúrtha do pháistí, mar spreagchainteoir na comhdhála. Beidh iar-Laureate na nÓg, Siobhán Parkinson, linn, chomh maith le Ceann na Roinne Ealaíon agus Corpoideachais i gColáiste Mhuire Gan Smál, Luimneach, Michael Finneran. Beidh guth idirnáisiúnta ag an gcomhdháil arís i mbliana agus Angus Macleod, Oifigeach Drámaíochta le Fèisean nan Gàidheal as Albain linn.
I rith na comhdhála beidh Meitheal na mBeag ag glaoch ar aighneachtaí ó ealaíontóirí píosa ealaíne a chruthú a rachfaidh ar chamchuairt ó chontae go contae. Beidh fáil ar an ealaín sna hallaí Cathrach i ngach contae i rith na bliana. Is é an aidhm a bheidh leis an bpíosa ealaíne seo ná go gceisteoidh na comhairlí contae an méid áiseanna de ghníomhaíochtaí cultúrtha a chuireann siadsan ar fáil do pháistí sa chontae.
I rith na comhdhála beidh léirithe de chuid Branar agus Graffiti, chomh maith le díospóireacht, neart cainte agus seans bualadh le daoine eile atá i mbun oibre san earnáil chéanna.
Leis an Reifreann Leanaí, comhdháil anuraidh bunaithe ar an obair atá ar siúl sna healaíona trí Ghaeilge a fhorbairt, agus an rath leanúnach atá ag na compántais áitiúla , leithéidí Branar agus Moonfish, ba cheart go mbeadh comhdháil na bliana seo thar a bheith suimiúil.
Tá failte roimh chuile dhuine chuig an gcomhdháil lena smaointí agus a dtuairimí a roinnt le daoine atá i rólanna comhchosúla timpeall na tíre.
Is féidir foirm chlárúcháin a fháil ar www.meithealnambeag.ie
Má tá tuilleadh faisnéise uait, déan teagmháil le:
Róisín Ní Chadhain, Bainisteoir na Comhdhála
Meithealnambeag@gmail.com / 091-562024
Meitheal na mBeag
www.meithealnambeag.ie
Cearta Cultúrtha an Pháiste – 15 & 16 Feabhra, An Taibhdhearc, Gaillimh
Óráidithe óga ag treabhadh chun cinn i ndíospóireachtaí Ghael Linn
Feabhra 5, 2013
Bhain dhá scoil éachtaí móra amach ag Craobh na hÉireann de Chomórtas Díospóireachta Uí Chadhain a bhí ar siúl I gColáiste na Tríonóide, Baile Átha Cliath, Dé Céadaoin, 30 Eanáir 2013.
Dea-scéal a bhí ann d’fhoireann Choláiste Eoin a ndeachaigh i gcoinne foirne ó Choláiste Rís, Dún Dealgan, Pobalscoil Ghaoth Dobhair, Coláiste Íde, Daingean Uí Chúis sa chraobh sóisearach agus a chroch leo an corn. Ba é an rún a bhí á phlé ná ‘Tá an stát seo rófhlaithiúil lena chúnamh don tríú domhan.’
I gcraobh na sinsear, ba é foireann de chuid Scoil Chuimsitheach Chiaráin, An Cheathrú Rua (Fionnuala de Bhailís, Síofra Ní Shé agus Muireann Ní Fhatharta) a roghnaíodh mar fhoireann bhuaiteach an chomórtais faoin rún díospóireachta: ‘Tá mórchinntí an rialtais seo ar leas an náisiúin’.
Chuaigh foirne ó Phobalscoil Chorca Dhuibhne, An Daingean, Pobalscoil Ghaoth Dobhair, Coláiste Eoin, Baile Átha Cliath i gcoinne a chéile ach ar deireadh chuaigh an corn go Gaillimh.
Bronnadh corn agus duais €1,000 ar na foirne buaiteacha agus duais €250 an fhoireann ar na foirne eile a bhí rannpháirteach sa chraobh.
Chomh maith leis sin, tugadh cuireadh d’fhoireann Choláiste Eoin, buaiteoirí an chomórtais shóisearaigh páirt a ghlacadh san fhéile cainte i ‘Ri Chéile’’ a reáchtálann Gael Linn gach bliain do chainteoirí óga Gaeilge/Gaidhlig i gcomhar le Comunn na Gaidhlig, Alba.
Iarchainteoirí sa chomórtas den chuid is mó a bhí sna moltóirí a bhí ar an bpainéal – An Dr. Róisín Ní Ghairbhí, Liam Mac an Mhaoir, Kevin de Barra, Máire Mhic Mhathuna agus an Dr. Regina Uí Chollatáin.
Is é an an Seanadóir Ó Clochartaigh a bhí mar aoichainteoir ar an oíche agus a thug ardmholadh do na foirne uilig. Thagair sé don ghéarchéim eacnamaíoch ina chuid cainte ach mhol sé a bheith dóchasach faoin todhchaí ainneoin na gcúrsaí a chuireann imní ar phobal na tíre faoi láthair.
Ghlac os cionn 50 foireann páirt sna babhtaí éagsúla a bhí ar siúl ó mhí Dheireadh Fómhair seo caite ar fud na tíre.
Foilsithe ar Gaelport
Oíche clárúcháin do ranganna Gaeilge, Baile Locha Riach
Feabhra 5, 2013
“Seilbh caillte ag an bpobal” ar Straitéis 20 Bliain don Ghaeilge
Feabhra 5, 2013
“Is léir do Chonradh na Gaeilge go bhfuil seilbh ar an Straitéis 20 Bliain don Ghaeilge á cailliúint ag an bpobal,” dar le Donnchadh Ó hAodha, Uachtarán Chonradh na Gaeilge.
Bhí an Straitéis á plé go mion ag mic léinn agus ag ionadaithe ó ghrúpaí pobail ag ollchruinniú Chonradh na Gaeilge san Óstán Menlo i gcathair na Gallimhe, De hAoine 01 Feabhra 2013.
Ag labhairt ag an gcruinniú bhí an t-iriseoir Harry McGee ag plé cúrsaí Dála agus na bealaí ina imríonn grúpaí abhcóideachta tionchar ar pholasaithe an rialtais. Ba é Ceannasaí Ghlór na nGael Lorcán Mac Gabhann (ar chlé) a bhí mar chathaoirleach ar an gcruinniú.
Tá Conradh na Gaeilge ag moladh go gcuirfí Aonad Pleanála ar bun le cinntiú go mbeidh seilbh ag an bpobal agus ag na húdaráis ar An Straitéis 20 Bliain don Ghaeilge le chéile agus le cinntiú go mbeidh pleanáil chomhtháite, éifeachtach, éifeachtúil i gceist ón mbun aníos.
Chomh maith leis sin. léiríodh díomá ag an gcruinniú maidir le cinneadh na Roinn Oideachais agus Scileanna An Chomhairle um Oideachas Gaeltachta agus Gaelscolaíochta (COGG) a chur faoin gComhairle Náisiúnta Curaclaim agus Measúnachta (CNCM).
Dúirt Julian de Spáinn, Ard-Rúnaí Chonradh na Gaeilge gur “ionsaí eile ar institiúidí Gaeilge a bhfuil an-mhuinín ag pobal na Gaeilge agus Gaeltachta astu” a bhí sa chinneadh sin.
Foilsithe ar Gaelport.com
Comhdháil Chomhairle na Gaelscolaíochta 2013
Feabhra 5, 2013
Reáchtálfar Comhdháil Chomhairle na Gaelscolaíochta De hAoine, 15ú Márta 2013 i gColáiste Feirste – tuilleadh sonraí le theacht ar www.comhairle.org gan mhoill.
Treoirlínte nua Náisiúnta maidir le meabhairshláinte dhearfach a chur chun cinn agus féinmharú a chosc in iar-bhunscoileanna á bhfoilsiú
Eanáir 31, 2013
“Folláine in Iar-Bhunscoileanna” uirlis thábhachtach do scoileanna
Lainseáil an tAire Oideachais agus Scileanna, Ruairí Quinn T.D., an tAire Stáit le freagracht as Míchumas, Daoine Scothaosta, Comhionannas agus Meabhairshláinte, agus Stiúrthóir na hOifige Náisiúnta um Fhéinmharú a Chosc treoirlínte nua d’iar-bhunscoileanna don mheabhairshláinteagus chun féinmharú a chosc inniu (31ú Eanáir ).
Tá ról leithleach le glacadh ag iar-bhunscoileanna chun tacú le meabhairshláintedhearfach agus folláine daoine óga. Déanann siad é seo trí thimpeallachtaí comhbhácha a chruthú, trí oideachas a chur ar dhaoine óga maidir lena sláinte, agus trí thacaíocht a chur ar fáil dóibh siúd a bhfuil deacrachtaí ag cur as dóibh.
Cuireann na Treoirlínte creat soiléir ar fáil, agus eolas ann do scoileanna agus do ghníomhaireachtaí atá ag tacú le scoileanna, faoin gcaoi le dul i ngleic le ceisteanna a bhaineann leis an meabhairshláintea chur chun cinn agus leis an bhféinmharú a chosc. Tá na Treoirlínte ceaptha do bhaill uile phobal na scoile, do na boird bainistíochta agus do na foirne bainistíochta in-scoile a ghlacann ról lárnach ceannasaíochta i gcur chun cinn na meabhairshláinte. Beidh siad úsáideach chomh maith do na comhpháirtithe reachtúla agus neamhreachtúla, tuismitheoirí, cumann tuismitheoirí, mic léinn, comhairlí mac léinn, pearsanra sláinte agus pearsanra eile atá ag iarraidh tuiscint a fháil ar an gcaoi is fearr le hoibriú i scoileanna agus in éineacht leo.
Is éard is ciall le cur chuige scoile uile ná cur chuige a théann thar an bhfoghlaim agus an teagasc sa rangsheomra chun dul i gcion ar gach gné de shaol na scoile. Orthu siúd a bhíonn gafa leis bíonn mic léinn, múinteoirí, Príomhoidí, foireann eile na scoile ar fad, pearsanra sláinte, bainisteoirí scoile, cuairteoirí scoile agus pobal mór na scoile a idirghníomhaíonn leis an scoil.
Meastar go mbíonn neamhoird mheabhairshláinte ar dhuine amháin as gach deichniúr páistí agus déagóirí, a théann i gcion ar a gcaidreamh daonna agus ar a scileanna chun déileáil le deacrachtaí ó lá go lá. Is iomaí fadhb mheabhairshláinte a thagann chun cinn le linn aois an pháiste agus na hógántachta.
Dúirt an tAire Oideachais agus Scileanna, Ruairí Quinn T.D., “Is éifeachtaí a fhoghlaimíonn daoine óga má tá siad sona, agus má bhraitheann siad go bhfuiltear ag tacú leo ar scoil. Tá sé ríthábhachtach teacht aniar agus folláine mhothúchánach a chothú iontu ar mhaithe lena ndul chun cinn ar scoil agus lena rathúlacht sa saol.
“Cúram mór sláinte poiblí don Rialtas is ea an fholláine a chur chun cinn agus an t-iompar féinmharaithe a chosc i measc daoine óga in Éirinn agus beidh na Treoirlínteseo ina n-uirlis thábhachtach chun cabhrú le scoileanna tacú lenár ndéagóirí.”
Dúirt an tAire Stáit le freagracht as Míchumas, Daoine Scothaosta, Comhionannas agus Meabhairshláinte: “Ceisteanna tromchúiseacha is ea féinmharú i measc na n-óg agus meabhairshláinte na n-óg gur gá dul i ngleic leo go práinneach. Tá sé ríthábhachtach go dtacóimis lenár ndaoine óga ina gcuid riachtanas sóisialta, mothúchánach agus meabhairshláinte chun a chinntiú go mbaineann siad a bpoitéinseal amch agus go bhfásann siad suas mar aosaigh sona, stuama.
“Ní mór dúinn a chinntiú go mbraithfear fadhbanna go luath agus go mbeidh idirghabháil thráthúil i gcás duine óig ar bith atá ag dul trí dheacrachtaí leis an meabhairshláinte, mar go bhfuil fhios againn gur as an idirghabháil thráthúil a thagann na torthaí sláinte is fearr agus go laghdaíonn sé an dóchúlacht go mbeidh míchumas fadtéarmach ann. Cuirim an-fháilte roimh na Treoirlínte tábhachtacha seo mar go mbeidh siad ina n-acmhainn thábhachtach do scoileanna agus iad ag tacú le meabhairshláinte dhearfach daoine óga.”
Glacann scoileanna ról ríthábhachtach chun meabhairshláinte dhearfach a chur chun cinn i measc daoine óga. Tugtar cuntas ar shamhail chur chuige scoile-uile in “Folláine in Iar-Bhunscoileanna: Treoirlínte do Chothú na Meabhairshláinte agus do Chosc an Fhéinmharaithe”. Chuaigh léirbhreithniú leathan ar an litríocht mar aon le próiseas comhairlithe i gcion ar an tsamhail sin.
Bhí páirtithe leasmhara ó na hearnálacha deonacha agus reachtúla ar a n-áirítear múinteoirí, Príomhoidí, comhairlí mac léinn, seirbhísí tacaíochta scoile, daoine óga agus gairmithe sláinte, gafa leis an dtúsphróiseas comhairlithe.
Tá na Treoirlínte roinnte ina dtrí phríomhrannán:
- Tacaíocht Scoile do GACH DUINE: tugann sé cur chuige scoile-uile don mheabhairshláinte agus do chosc an fhéinmharaithe.
- Tacaíocht Scoile do Dhaoine Áirithe: díríonn sé go sainiúil ar líon beag daoine ógá nó grúpaí a shainaithint go luath, a bhfuil an baol ann go ngabhfaidís le pátrúin míshláintiúla iompraíochta, nó a bhfuil comharthaí luatha ag baint leo go bhfuil siad cheana féin ag saothrú deacrachtaí meabhairshláinte.
- Tacaíocht Scoile do Líon Beag Daoine: tugann sé cuntas ar an gcaoi gur féidir le scoileanna tacú le daoine óga a bhfuil riachtanais níos casta agus níos buaine acu a bhaineann lena bhfolláine mheabhairshláinte agus mothúchánach.
Tá na scoileanna i riocht leithleach chun iad siúd atá ag dul tríd an ngátar a shainaithint agus a thacú, agus chun timpeallacht a chruthú a spreagann daoine óga chun teagmhais nó fadhbanna ar bith atá ina n-ábhar buartha a thabhairt ar aire.
Is den tábhacht é a thuiscint nach bhfuil an mheabhairshláinteagus an fholláine ina bhfreagrachtaí ag an scoil amháin. Bíonn róil chomhlántacha ag tuismitheoirí agus ag pobal mór na scoile chomh maith, iad araon ag tacú lena chéile.
Dúirt Gerry Raleigh, Stiúrthóir na hOifige Náisiúnta um Fhéinmharú a Chosc ag an FSS a mhaoinigh forbairt na dTreoirlínte, “Cuirim fáilte roimh fhoilsiú na dTreoirlínte. Tugann na cáipéisí comhairle agus eolas do na gníomhaireachtaí seachtracha ar fad, an FSS san áireamh, faoin gcaoi lenar féidir linn go léir oibriú le scoileanna i mbealach sábháilte, fianaise-bhunaithe chun meabhairshláinte agus folláine na ndaoine óga go léir a thacú agus a fhorbairt.
Dúirt sé freisin: “Is léir ón bhfíric gur forbraíodh na Treoirlínte i gcomhpháirtíocht idir an ROS, an FSS agus an Roinn Sláinte nach féidir le haon ghníomhaireacht aonair an mheabhairshláintea chur chun cinn agus an féinmharú a chosc. Beidh orainn caidrimh éifeachtacha a fhorbairt idirgníomhaireachtaí má táimid chun dul i gcion ar na rátaí féinmharaithe i measc daoine óga in Éirinn.”
Is den tábhacht é go mbeadh scoileanna ar an eolas faoi na seirbhísí agus na tacaíochtaí atá ar fáil sa phobal. Is lú de dhóchúlacht atá ann go mbeidh fadhbanna meabhairshláinte ag daoine óga má bhíonn caidrimh mhaithe acu leis an scoil, agus is mó an dóchúlacht go mbeidh torthaí maithe oideachasúla acu. Cuimsíonn caidrimh mhaithe leis an scoil an caidreamh le piaraí, le haosaigh agus leis an bhfoghlaim.
Cuireann na Treoirlínte i láthair i mbealach comhtháite na heilimintí den dea-chleachtas gur ceart do scoileanna iad a bheith ar bun acu. Orthu seo, tá feidhmiú scoile-uile an OSPS agus plean don treoir scoile-uile ar a n-áirítear pleanáil chun déileáil le teagmhais ghéarchéimneacha. Tugtar cuntas chomh maith ar an bPróiseas Scoile um Chur Chun Cinn na Sláinte ag an FSS agus léiríonn na Treoirlínte an chaoi leis an bPróiseas sin a thabhairt isteach i scoileanna chun an dea-chleachtas atá ann cheana a chomhlánú.
Scaipfear na Treoirlínte ar scoileanna sna seachtainí amach romhainn.
Is féidir iad a íoslódáil ó: http://www.education.ie/ga/Foilseacháin/Tuarascálacha-Oideachais/Well_Being_PP_Schools_Guidelines_ir.pdf
Tá an Achoimrear fáil ag: http://www.education.ie/ga/Foilseacháin/Tuarascálacha-Oideachais/Well_Being_PP_Schools_Guidelines_Summary_ir.pdf
