Griangraif: Céad lá ar scoil i nGaelscoil Chluain Dolcán agus i nGaelscoil Ros Eo
Lúnasa 28, 2015
Bailliúcháin pictúirí den chéad lá ar ais ar scoil i mbliana. Páistí nua i nGaelscoil Chluain Dolcán agus i nGaelscoil Ros Eo ina measc!
Folúntas: Gaelcholáiste Reachrann, Baile Átha Cliath
Lúnasa 27, 2015
Tá ionadaí do shaoire mháithreachais de dhíth i nGaelcholáiste Reachrann, Baile Átha Cliath. Tuilleadh eolais ag an nasc thíos:
http://educationposts.ie/adverts/second_level/employee/15683/
Físeán: Céad lá ar scoil i nGaelscoil na Giúise
Lúnasa 27, 2015
Breathnaigh ar fhíseán ón Irish Times den chéad lá ar scoil do slua mór páistí i nGaelscoil na Giúise, Baile Átha Cliath.
Guímid gach rath ar na páistí sa bhliain amach rompu!
Folúntas: Gael-Choláiste Chill Dara
Lúnasa 27, 2015
Tá Gael-Choláiste Chill Dara ag lorg múinteoir páirt-aimseartha. Tuilleadh sonraí ar fáil ag an nasc thíos:
http://educationposts.ie/adverts/second_level/employee/15598/
Folúntas: Scoil Naithí, Baile Átha Cliath
Lúnasa 27, 2015
Tá múinteoir páirt-aimseartha á lorg ag Scoil Naithí i mBaile Átha Cliath. Tuilleadh sonraí ar fail ag an nasc thíos:
http://educationposts.ie/adverts/primary_level/employee/23085/
Bunscoil Inis Meáin slán ó bhaol, a bhuíochas le Zurich Insurance
Lúnasa 27, 2015
Tá bunscoil Inis Meáin slán ó bhaol a dúnta, a bhuíochas le cúnamh airgeadais ón ollchomhlacht árachais, Zurich Insurance. D’fhág na hathruithe a rinneadh le deireanas ar rialacha na Roinne Oideachais nach gcuirfeadh an Roinn maoiniú ar fáil ach d’aon mhúinteoir amháin sa scoil.
Tá an maoiniú breise tugtha anois ag Zurich Insurance chun an dara múinteoir a fhostú sa scoil oileánda a bhfuil naonúr daltaí inti. Ní chuirfeadh an Stát an maoiniú ar fáil ach amháin dá mbeadh scór daltaí ag freastal ar an scoil.
Tá an naonúr sin idir ceithre bliana d’aois, a thosóidh sna naíonáin bheaga i mbliana, agus trí bliana déag d’aois, a chríochnóidh a gcuid bunscolaíochta an samhradh seo chugainn. Ba í Orlaith Breathnach an t-aon mhúinteoir amháin sa scoil agus an t-ualach uirthi aire a thabhairt do na gasúir ar fad sna ranganna idir na naíonáin bheaga agus rang a sé.
Chaill Scoil Náisiúnta Inis Meáin an dara hoide sa bhliain 2012 nuair nach raibh cláraithe inti ach seisear. Ní raibh an múinteoir sin ábalta glacadh le post ar bith eile a thairg an Roinn Oideachais di mar go mbeadh uirthi an t-oileán agus a clann a fhágáil.
Reáchtáladh cruinniú poiblí in Óstán Buswells i mBaile Átha Cliath i mí Iúil faoi chás na scoile. D’fhreastail idir chomhairleoirí contae, Theachtaí Dála agus Seanadóirí ó pháirithe éagsúla polaitíochta ar an gcruinniú. Thug an Teachta Dála, Derek Nolan (PLO), geallúint ag an am go labhródh sé leis an Aire Oideachais, Jan O’Sullivan faoin scoil.
Dúirt Orlaith Breathnach le Tuairisc.ie an lá i ndiaidh an chruinnithe go raibh dóchas aici go dtabharfadh an Roinn cluas éisteacha d’achainí a scoile agus go gceadófaí múinteoir breise.
Níor tháinig an Roinn chun fóirithinte ar an scoil, áfach, agus bhí gach cosúlacht ar an scéal nach mbeadh an dara múinteoir ann don bhliain seo scoile amach romhainn.
Tá an maoiniú geallta anois ag Zurich Insurance, áfach, faoin gclár Investing in Communities, a chinnteoidh múinteoir breise don scoil go ceann dhá bhliain.
Dúirt Patrick Manley, Príomhfheidhmeannach Zurich Insurance, go raibh ‘cás láidir’ ag an scoil agus go raibh sé tábhachtach don oileán agus don Ghaeilge.
“Aithníonn muid tábhacht na Gaeilge, riachtanais oideachais na ngasúr san oileán agus, go deimhin, todhchaí phobal an oileáin. Tá bród ar Zurich as a bheith in ann ár dtacaíocht a thabhairt don scoil,” a dúirt sé.
Dúirt sé freisin go raibh sé ag súil go gcuirfear réiteach buan i bhfeidhm amach anseo.
http://tuairisc.ie/bunscoil-inis-meain-slan-o-bhaol-a-bhuiochas-le-zurich-insurance/
Aonad nua Uathachais le hoscailt i nGaelscoil Bhaile Brigín
Lúnasa 27, 2015
Osclófar Gaelscoil Bhaile Brigín i gContae Átha Cliath maidin inniu don bhliain nua scoile ach i mbliana beidh seirbhís bhreise ar fáil do dhaltaí a bhfuil an t-uathachas orthu.
Tá aonad nua uathachais le hoscailt sa scoil agus múinteoir ceaptha ina mhúinteoir ranga air a dhéanfaidh freastal ar dhaltaí na scoile a bhfuil an t-uathachas ag gabháil dóibh.
Tá an foirgneamh a mbeidh dhá sheomra ranga agus seomra céadfaí ann fós á thógáil i láthair na huaire ach tá seomra ranga curtha ar fáil ag an scoil don mhúinteoir go dtí go gcuirfear an obair thógála i gcrích. Beifear in ann seisear dalta a thógáil i mbliana ach tá súil ag údaráis na scoile múinteoir eile a fhostú don aonad amach anseo agus a líon sin a mhéadú faoi dhó.
Dúirt Clodagh Ní Mhaoilchiaráin, príomhoide na scoile, le Tuairisc.ie gurbh é an rud ba mhó a spreag an scoil chun an tseirbhís a fhorbairt ná an t-éileamh ó thuismitheoir a raibh páistí leo ag freastal ar an scoil cheana féin ar a leithéid de sheirbhís agus a bhfuil uathachas ar pháistí eile sa teaghlach acu.
“Theastaigh ó na tuismitheoirí go mbeadh deartháireacha agus deirfiúracha na bpáistí a bhí sa chóras Gaelscolaíochta cheana féin in ann an deis chéanna oideachas trí mheán na Gaeilge a fháil. Theastaigh uainne go mbeadh muid in ann freastal ar an méid is mó páistí agus ab fhéidir linn agus cabhróidh an t-aonad nua leis sin.
“Tá pobal na scoile ar bís faoin aonad úr, agus tá muid ag súil go mór le tabhairt faoi ” a dúirt sí le Tuairisc.ie.
Beidh an áis ar fáil do dhaltaí a chomhlíonann na critéir éagsúla – daltaí a mbíonn deacrachtaí sóisialta acu nó fadhbanna eile a bhaineann leis an uathachas.
Tá aonad dá leithéid i gcúpla scoil lánGhaeilge timpeall na tíre cheana féin; Scoil na Tulaí i gCois Fharraige agus Gaelscoil Chloich na Coillte in iarthar Chorcaí
http://tuairisc.ie/aonad-nua-uathachais-le-hoscailt-i-ngaelscoil-bhaile-brigin/
Oideachas lánGhaeilge oiriúnach do gach páiste, beag beann ar theanga baile
Lúnasa 26, 2015
Oideachas lán-Ghaeilge á phlé ar chlár Adhmhaidin
Lúnasa 26, 2015
Buntáistí na Gaelscolaíochta ar fáil do chách
Lúnasa 26, 2015
Oideachas lánGhaeilge oiriúnach do gach páiste, beag beann ar theanga baile, ar leibhéal cumais, ar chreideamh, ná ar chúlra cultúrtha nó eacnamaíochta
Agus 72% ó dheas agus 63% ó thuaidh den tuairim go mba cheart go mbeadh an Ghaelscolaíocht ar fáil dóibh siúd atá á lorg de réir shuirbhé Millward Brown agus thuarascáil an ESRI* a foilsíodh i mbliana araon, tá feachtas feasachta ar bun ag Conradh na Gaeilge i gcomhar le Gaelscoileanna Teo. chun tuismitheoirí a chur ar an eolas maidir leis na buntáistí a bhaineann le hoideachas lánGhaeilge a roghnú dá bpáistí.
Is léiriú iad torthaí Millward Brown agus an ESRI ar an dea-thoil atá ann go forleathan i leith oideachas lánGhaeilge, ach creideann Conradh na Gaeilge agus Gaelscoileanna Teo. go bhfuil dúshláin ann go fóill maidir le freastal ar ró-éileamh d’áiteanna i scoileanna lánGhaeilge, agus gurb as seo a eascraíonn míthuairimí faoin gcóras Gaelscolaíochta.
Níl ach 8% de na scoileanna ó dheas agus 2.5% de na scoileanna ó thuaidh ina scoileanna lánGhaeilge faoi láthair, agus deir Clare Spáinneach, Oifigeach Sinsearach Forbartha & Polasaí le Gaelscoileanna Teo.:
“Is é an bearna seo idir soláthar agus éileamh a chruthaíonn go leor de na míthuiscintí maidir leis an gcóras Gaelscolaíochta toisc go gcuireann sé an cuma ar an scéal nach bhfuil na scoileanna ar fáil nó in oiriúint do chách, nuair is a mhalairt ar fad atá fíor – fáiltítear roimh pháistí ó gach cúlra teanga, creidimh, cultúir, agus eacnamaíochta sna scoileanna lánGhaeilge, agus tá pobail na scoileanna lánGhaeilge ag leathnú de réir mar a leathnaíonn an soláthar.
“Freastalaíonn na scoileanna lánGhaeilge ar na pobail ina bhfuil siad suite, agus bíonn lucht bainistíochta airdeallach gur ghá fáilte ar leith a fhearadh roimh pháistí ó phobail go mb’fhéidir nach raibh baint acu leis an nGaeilge roimhe seo nó go traidisiúnta. Tá ionadaíocht láidir ag pobal Eaglais na hÉireann i nGaelscoil Nás na Ríogh i gContae Chill Dara mar shampla, mar aon le páistí gurb as an Nigéir, an tSíle, na hOileáin Fhilipíneacha, an Bhrasaíl, agus fiú Hawaii dá muintir.”
Sa chóras Gaelscolaíochta, tosaíonn daltaí ó gach cineál cúlra ar scoil ar comhchéim lena gcomhscoláirí, le teanga nua á foghlaim acu i dteannta a chéile. Is minic go mbíonn tuismitheoirí buartha nach mbeidh sé ar a gcumas cabhrú leis na páistí lena gcuid obair bhaile mura bhfuil Gaeilge líofa acu féin, ach is amhlaidh an scéal d’fhormhór na dtuistí le páistí sna scoileanna lánGhaeilge fud fad na tíre, agus déanann na scoileanna agus eagraíochtaí cosúil le Gaelscoileanna Teo. agus Conradh na Gaeilge araon iarracht gach tacaíocht a chur ar fáil do gach cineál tuismitheora sa chóras lánGhaeilge.
Deir Brenda Ní Ghairbhí, Bainisteoir Sheachtain na Gaeilge agus Ardú Feasachta le Conradh na Gaeilge:
“Ní hamháin go mbíonn príomhoidí agus múinteoirí ranga an-airdeallach ar leibhéal Gaeilge na dtuismitheoirí trí chéile, ach is pobail bhríomhara, fháilteacha iad scoileanna lánGhaeilge áit a mbíonn tuismitheoirí ag tacú lena chéile ó gheataí na scoile go freastal ar ranganna oíche, agus eile.
“Thairis sin, níl faic níos tábhachtaí ná meon na dtuistí i leith na Gaelscolaíochta nuair a bhíonn rogha á déanamh acu maidir le hoideachas a bpáistí; má tá dearcadh dearfach, oscailte ag Mamaí nó ag Daidí i leith naíonra, Gaelscoile nó Gaelcholáiste, ní bhíonn bac ar pháiste ar bith buntáiste a bhaint as oideachas lánGhaeilge, is cuma cén teanga baile ná cén cumas foghlama atá acu.”
Is féidir go mbíonn imní ar roinnt tuismitheoirí ag an tús go mbeidh droch-thionchar ag an gcóras tumoideachais ar fhorbairt Bhéarla a bpáiste, ach léiríonn torthaí taighde an Fhorais Taighde ar Oideachas, 2011, go bhfuil daltaí i bhfad thar an meán náisiúnta i léitheoireacht an Bhéarla sna bunscoileanna lánGhaeilge, agus go bhfuil ag éirí leo thar an meán náisiúnta sa mhata leis.
Aithnítear na buntáistí acadúla a bhaineann leis an dátheangachas agus leis an gcóras tumoideachais go forleathan, agus déanann scoileanna lánGhaeilge freastal ar dhaltaí le riachtanais speisialta díreach mar a dhéanann scoileanna a fheidhmíonn trí Bhéarla. De réir gach fianaise, éiríonn ar a laghad chomh maith céanna le páistí le riachtanais speisialta sa chóras lánGhaeilge agus a n-éiríonn leo sna córais Bhéarla, agus aithnítear an córas luaththumoideachais iomlán mar an múnla is rathúla do dhaltaí le riachtanais speisialta
Tá aonad uathachais á oscailt i nGaelscoil Bhaile Brigín i gContae Átha Cliath i Meán Fómhair 2015 agus dar le Clodagh Ní Mhaoilchiaráin, Príomhoide Ghaelscoil Bhaile Brigín:
“Tá pobal na scoile ar bís faoin aonad uathachais úr, agus tá muid ag súil go mór le tabhairt faoi. Cabhróidh an t-aonad uathachais seo go mór le Gaelscoil Bhaile Brigín freastal ar an bpobal scoile atá againn, agus orthu siúd le neamhord ar speictream an uathachais (ASD) a bheidh ag teacht chugainn amach anseo ‘s a bhfuil a dtuistí ag iarraidh go bhfanfaidh siad sa chóras Gaelscolaíochta.”
Tá bunscoil amháin agus dhá iarbhunscoil lánGhaeilge nua le hoscailt thuaidh agus theas an fómhar seo, ach ní leor a bheidh ann le freastal ar riachtanais an phobail. Tá ró-éileamh ar áiteanna san iliomad scoil lánGhaeilge ar fud na tíre, agus tá Conradh na Gaeilge agus Gaelscoileanna Teo. ag éileamh ar na Rialtais soláthar na Gaelscolaíochta a mhéadú ag gach leibhéal chun leanúnachas sa chóras oideachais lánGhaeilge a chinntiú, agus chun freastal ar an mór-éileamh seo ón bpobal chun tumoideachas lánGaeilge a chur ar fáil.
