35 páiste nua ag clárú i scoil gan aitheantas, Gaelscoil Ráth Tó
Samhain 8, 2010
Chláraigh 35 páiste nua le tosú i nGaelscoil Ráth Tó i Meán Fómhair 2011 ag cruinniú cur in aithne sa scoil Déardaoin, 02 Samhain 2010, in ainneoin go bhfuil an scoil fós ag fanacht le haitheantas oifigiúil a fháil ón Roinn Oideachais agus Scileanna.
Tháinig tuistí agus páistí ar cuairt chuig Gaelscoil Ráth Tó chun bualadh leis an bpríomhoide Tricia Ní Mhaolagáin agus chun eolas a fháil faoin scoil.
Fógróidh An Roinn Oideachais agus Scileanna liosta ceantracha ina mbeidh scoileanna nua á mbunú go luath; tá muintir Ráth Tó ag súil go mbeidh siad ar an liosta sin agus go mbronnfar aitheantas ar Ghaelscoil Rath Tó, a d’oscail gan aitheantas ná tacaíocht stáit i Meán Fómhair na bliana seo.
Léiríonn an slua a d’fhreastail ar an gcruinniú agus an t-éileamh leanúnach ó theaghlaigh d’oideachas lánGhaeilge i Rath Tó go bhfuil géarghá freastal ar mhianta thuismitheoirí an cheantair trí aitheantas a thabhairt do Ghaelscoil Ráth Tó láithreach.
Dúirt Tricia Ní Mhaolagáin, Príomhoide Ghaelscoil Ráth Tó: “Chaill fiche páistí a bhí ar liosta na scoile an deis oideachas lánGhaeilge a bheith acu toisc nár ceadaíodh Gaelscoil Ráth Tó i mbliana.
“An bhfuil glúin eile de pháistí Ráth Tó chun an deis sin a chailliúint arís, nó bhfuil an Roinn Oideachais agus Scileanna chun an rud cheart a dhéanamh agus tacú le Gaelscoil Ráth Tó trí aitheantas a thabhairt di?
Feis & Blood
Samhain 5, 2010
Seó nua de chuid TG4 atá ar thóir an teaghlach is siamsiúil in Éirinn
Ó The Clancy Brothers go Crystal Swing, tá teaghlaigh na hÉireann ag cur siamsaíocht ar fáil dúinn ar feadh na mblianta. D’éirigh go hiontach le teaghlaigh na hÉireann ina gcuid seánraí áirithe, cibé an papcheol ó The Corrs nó damhsa sean-nós ó na Cunninghams atá i gceist.
Tá sé in am anois teaghlach nua a fháil a chuirfidh siamsaíocht ar fáil don tír.
Thar 13 eipeasód, beidh seó nua de chuid TG4 FEIS & BLOOD, ar thóir teaghlach tréitheach nua.
Ní ghlacfar ach le baill den theaghlach céanna amháin i ngach iarratas agus ní mór do bheirt ar a laghad a bheith páirteach ann.
Mar sin, más rud é go bhféadfadh do theaghlach a bheith mar an Clannad nua, mó más maith leat a bheith ag canadh agus ag damhsa le do dheartháir, do dheirfiúr, do thuismitheoirí nó le do sheantuismitheoirí, ba mhaith linn cloisteáil uait. B’fhéidir go mbeith leat a bheith ag canadh Ceol Tíre le do neacht? Nó an gcaitheann tú tráthnónta Dé Domhnaigh ag déanamh bhur leagan féin de Riverdance le do chol ceathracha? Nó b’fhéidir go dtaitníonn leat a bheith ag seinm ceol le d’uncail? Cuma cad í an tallann ach déan teagmháil linn agus cuir isteach ar thriail.
Conas iarratas a dhéanamh:
Logáil isteach go simplí ar láithreán gréasáin TG4, http://www.tg4.ie/feis / www.tg4.ie agus cliceáil ar FEIS & BLOOD agus líon isteach an fhoirm iarratais. Mar rogha air sin, is féidir leat 01-284 3877 a glaoch agus fiafraigh do Chríona nó do Shiobhán.
Chomh luath agus a bheith iarratas curtha isteach agat, déanfar teagmháil leat chun freastal ar an triail is gaire duitse.
Tar éis na trialacha, tabharfar cuireadh do na teaghlaigh is siamsúla a bheith páirteach sa chlár. Má thugtar cuireadh duit a bheith páirteach sa tsraith, is í an chéad chéim eile ná clár an chéad bhabhta a thaifeadadh i mBaile Átha Cliath.
Beidh na cláir don chéad bhabhta á dtaifeadadh ar an 4,5,6,11,12 agus 13 Eanáir 2011. Má roghnaítear don chlár tú, beidh ort teacht go Baile Átha Cliath ar cheann AMHÁIN de na dátaí sin.
Mar a oibríonn an tsraith:
Beidh roinnt teaghlach éagsúil páirteach i ngach ceann de na 10 gclár céad bhabhta. I ngach ceann de na cláir sin, roghnófar teaghlach amháin le teacht ar ais don bhabhta ceathrú ceannais. Agus mar sin, tar éis na cláir chéad bhabhta, beidh 10 iomaitheoir fágtha sa bhabhta ceathrú ceannais.
I gcláir 11, 12 agus 13 beifear ag fáil réidh leis na hiomaitheoirí ceathrú ceannais teaghlach i ndiaidh teaghlaigh go dtí nach mbeidh fágtha ach buaiteoir na sraithe.
Beidh painéal na moltóirí, a bheidh comhdhéanta de 3 shaineolaí i réimse na siamsaíochta, ag coinneáil súil ghéar ar na teaghlaigh. Tá painéal na moltóirí freagrach as an teaghlach buacach a roghnú as an deich gclár chéad bhabhta. Déanfaidh siad na cinntí tábhachtacha chomh maith i gcláir 11, 12 agus 13, agus roghnóidh siad buaiteoir na sraithe.
An bhfuil bua na siamsaíochta ag do theaghlach? An bhfuil an siamsaíocht go smior i do chuid fola?
Cath na gClubanna Scoile!
Samhain 4, 2010
Roinnt mhaith dea-scéalta cloiste agam faoin nGaeilge agus cur chun cinn na Gaeilge le tamall beag anuas.
Is breá liom scéalta mar seo a chloisteáil agus tá áthas orm i gcónaí poiblíocht a thabhairt dóibh Ar an gcéad dul síos caithfidh mé a rá go bhfuil neart scéalta dearfacha ann ó thaobh na Gaeilge de na laethanta de ach ag an am céanna níl gach rud geal sa gháirdín. Bíodh sin mar atá fógraíodh go hoifigiúil le déanaí go bhfuil tús á chur le comórtas nua Gaeilge d’iar-bhunscoileanna ar bhonn uile-Éireann. Is comhfhiontar é an comórtas seo idir Glór na nGael agus Foinse, an nuachtán Gaeilge. Caithfidh mé a adhmháil gur breá liom comórtaisí dá leithéid.
Iarrfar ar scoileanna Cumann Gaelach na Mac Léinn a bhunú agus beifear ag súil go n-eagródh an Cumann Gaelach sraith imeachtaí Gaeilge lasmuigh den seomra ranga i gcaitheamh na bliana. Iarrfar ar gach scoil plean imeachtaí bliana a sheoladh chuig Glór na nGael, tráth a ndéanfar gearrliosta de na pleananna is fearr. Ag fógairt dhuaischiste an chomórtais, dúirt Ceannasaí Ghlór na nGael, Lorcán Mac Gabhann go ndéanfar moltóireacht ar na hiarratais is fearr agus bronnfar duaiseanna fiúntacha ar na buaiteoirí. Tabharfaidh Oifigeach na Mac Léinn, Aodhán Ó Dea, cuairt timireachta ar na scoileanna a chláraíonn, chun an comórtas a mhíniú agus na daltaí a spreagadh. Is cúis áthais do Foinse go mbeidh cur síos ar obair chumainn faoi leith le léamh in Foinse gach seachtain idir mí na Samhna agus mí an Mhárta.
Fógrófar buaiteoirí an chomórtais le linn Sheachtain na Gaeilge 2011. Gach eolas faoin gcomórtas seo le fáil ó Aodhán, (086) 3102691 nó aodhan@glornangael.ie Tá súil agam go mbeidh iar-bhunscoileanna Mhaigh Eo sásta an dushlán a ghlacadh. Tá neart duaiseanna buaite ag áiteanna éagsúla sa chondae seo i gComórtas Ghlór na nGael tríd na mblianta. Bhuaigh Caisleán a’ Bharraigh agus Clár Chlainne Mhuiris an príomh gradam i 1973 agus 1976 ar ndoigh. Fógraíodh Pearsanna Mhaigh Eo 2010 anocht, Déardaoin, i gCaisleán a’ Bharraigh agus tá an-áthas orm go bhfuair Úna Ní Ghabhláin Gradam na Gaeilge. Tá an Gradam seo tuillte go maith ag Úna mar tá saothar saoil tugtha aici don teanga agus do chur chun cinn na Gaeilge. Tá Úna i lár an aonaigh le breis agus dhá scór bliain ag saothrú ar son na teanga. Déanaim comhghairdeas leí agus beidh tuilleadh agam ar an ábhar seo go luath arís.
Ag an ócáid chéanna fógraíodh go raibh Gradam buaite freisin ag Scoil Acla. Déanaim comhghairdeas leo chomh maith agus go speisialta do Sheán Mac Conmara, croí agus anam na scoile. Togha fear é Seán agus bhí bliain ar leith acu ansin in Acaill ag ceiliúradh an chéid. Bhí clár leathan imeachtaí ar bun acu san oileán le bliain anuas agus tá sár jab á dhéanamh acu. Scoil Samhraidh den chéad scoth í Scoil Acla faoin am seo agus níl a sárú le fáil sa tír. Go maire sibh bhur nuacht. Tá an-áthas orm freisin go bhfuil Raidió Rí Rá i gColáiste na Tríonóide i mBaile Átha Cliath ag dul ó neart go neart. Tá an-tóir ar an raidio seo ag an aos óg. Bhí forbairtí úra á phlé ag na craoltóirí óga a d’fhreastail ar chruinniú cinn bliana an raidio le déanaí. Tá an cairtstáisiún Gaeilge ar an aer le trí bliana anuas ag craoladh ar an idirlíon ar www.rrr.ie agus tá feidhmchláir iPhone agus Nokia cruthaithe ag an stáisiún chomh maith. Reáchtáladh an cruinniú mar chuid de dheireadh seachtaine traenála na mac léinn tríú leibhéal a d’eagraigh Conradh na Gaeilge i gcomhar le meitheal d’eagraíochtaí Gaeilge eile. Is féidir teagmháil a dhéanamh le Raidió Rí Rá trí ríomhphost a sheoladh chuig eolas@rrr.ie
The Connaught Telegraph – Mairtin O’Maicin
3 Samhain 2010
€5,000 do Chomórtas nua Meánscoileanna
Samhain 4, 2010
Tá comórtas nua fógartha ag Glór na nGael, comórtas do Mheánscoileanna na tíre ar fad, chun na scoileanna a spreagadh clár imeachtaí Gaeilge a eagrú sa scoil.
Is comhfhiontar é an comórtas seo idir Ghlór na nGael agus an nuachtán Gaeilge, Foinse. Iarrfar ar scoileanna Cumann Gaelach na Mac Léinn a bhunú agus beifear ag súil go n-eagróidh an Cumann Gaelach sraith imeachtaí Gaeilge lasmuigh den seomra ranga i gcaitheamh na bliana. Le cur isteach ar an gcomórtas caithfear plean imeachtaí bliana a sheoladh chuig Glór na nGael. Tabharfaidh Oifigeach na Mac Léinn cuairt timireachta ar na scoileanna a chláraíonn, ait a míneofar an comórtas agus déanfar na daltaí a spreagadh chomh maith. Déanfar gearrliosta ansin bunaithe ar na pleananna agus déanfar moltóireacht ar na hiarratais is fearr.
Beidh EUR5,000 mar luach saothar ag buaiteoir an comórtas náisiúnta agus bronnfar duais ar na buaiteoirí cúige chomh maith. Is turas ranga chuig Ionad Eachtraíochta Delphi atá mar dhuais i gcás Chúige Connacht. Is cúis áthais ag Foinse go mbeidh cur síos ar obair chumann faoi leith le léamh i bhFoinse gach seachtain go mí an Mhárta agus fógrófar buaiteoirí an chomórtais le linn Seachtain na Gaeilge 2011. Tá gach eolas le fáil ach teagmháil a dhéanamh le hAodhán Ó Deá ag 086-3102691 nó aodhan@glornangael.ie.
Galway Advertiser – Peadar Mac Fhlannchadha
4 Samhain 2010
No more Republic of average
Samhain 4, 2010
Deontas Aistriúcháin
Samhain 3, 2010
- An bhfuil suíomh gréasáin na scoile á uasdátú faoi láthair?
- An bhfuil pleananna, polasaithe nó nuachtlitir scoile á chur le chéile agaibh?
- An bhfuil sé deacair an saineolas agus an t-am a fháil rudaí a aistriú go Gaeilge?
Tá deontas aistriúcháin á sholáthar ag GAELSCOILEANNA TEO. (le tacaíocht ó Fhoras na Gaeilge). Beimid in ann aisíoc a dhéanamh ar admháil a fhaightear d’uasmhéid €100 d’obair aistriúcháin nó profála.
Ar an meán, gearrtar 10c in aghaidh an fhocail don aistriúchán agus €30 san uair le aghaidh profála. Is é an t-aon choinníoll a bhaineann le ceadú an deontais seo ná go mbainfear leas as painéal d’aistritheoirí gairmiúla Fhoras na Gaeilge.
Tá Aoine 26 Samhain luaite mar spriocdháta. Ní gá ach ríomhphost a chur chugainn le cur isteach ar an deontas: oifig@gaelscoileanna.ie.
Cláraigh do scoil do Bhuntáiste Breise na Gaeilge Uíbh Fhailí
Samhain 3, 2010
Ag leanúint le camchuairt Bhuntáiste Breise na Gaeilge, reáchtáiltear ócáid amárach i Halla na Saoirse, i mBaile Átha Cliath, agus ócáid ar an Tulach Mhór coicís ina dhiaidh sin, ar an 18 Samhain. Tá na seimineáir seo dírithe ar dhaltaí iar-bhunscoile sna ranganna sinsearacha in iar-bhunscoileanna ar fud na tíre.
Le linn na seimineár pléitear na buntáistí breise a thugann an Ghaeilge duit agus tú ag dul i mbun do ghairme beatha. Go dtí seo, tá seimineáir reáchtáilte ag an gComhdháil i gCill Airne, i mBaile Átha Cliath, i nGaillimh, i gCorcaigh, i gCaisleán an Bharraigh, i mBéal Feirste, agus i Leitir Ceanainn.
Bíonn cur i láthair na n-aoichainteoirí spreagúil, spleodrach, agus téann taithí na gcainteoirí i bhfeidhm ar an lucht éisteachta, agus iad ag roghnú a ngairmeacha beatha féin amach anseo.
I measc na n-aoichainteoirí a labhróidh amárach i mBaile Átha Cliath beidh láithreoir spóirt RTÉ, Evanne Ní Chuilinn, fear mór ceoil TG4 Eoghan Mac Diarmada, Stiúrthóir Chomhar na Múinteoirí Gaeilge, Anna Davitt, an réalta ceoil ón mbanna ‘The Frames’, Colm Mac an Iomaire, agus an aisteoir cáiliúil ó Fair City, Doireann Ní Chorragáin.
I measc na gcainteoirí a bheidh i láthair ar an Tulach Mhór, beidh iriseoir RTÉ/TG4, Irene Ní Nualláin, Oifigeach Forbartha le Comharchumann Ráth Chairn, Bríd Ní Chofaigh, láithreoir spóirt RTÉ, Evanne Ní Chuilinn, agus an múinteoir agus iománaí Thiobraid Árann, Darragh Egan.
Mar chuid den seimineár cuirtear fáilte roimh cheisteanna ó na daltaí, rud a spreagann díospóireacht spleodrach.
Beidh ionadaithe ó institiúidí tríú leibhéal i láthair freisin le seastán eolais, chun eolas a thabhairt do na daltaí scoile faoi na deiseanna oideachais atá ann dóibh trí mheán na Gaeilge.
Tá na spásanna ar fad don seimineár i mBaile Átha Cliath líonta faoin am seo, ach tá roinnt spásanna ar fáil go fóill don seimineár ar an Tulach Mhór. Má theastaíonn ó do scoil páirt a ghlacadh sa seimineár, bí i dteagmháil le Brígíd, ar 01 679 4780 / brighid@comhdhail.ie.
