An Chomhdháil ag Fáiltiú Roimh bhunú an 31ú Dáil
Márta 10, 2011
Déanann Comhdháil Náisiúnta na Gaeilge comhghairdeas le Enda Kenny, T.D., ar a thoghadh mar Thaoiseach inné sa Dáil. Treaslaíonn an Chomhdháil leis na hAirí Rialtais nua-cheaptha agus guímid gach rath orthu agus iad i mbun ghnó mar bhaill den Rialtas sa 31ú Dáil. Déanaimid comhghairdeas ach go háirithe leis an Aire Jimmy Deenihan, T.D., ar a cheapachán mar Aire Gnóthaí Ealaíon, Oidhreachta agus Gaeltachta.
Bhí súil ag an gComhdháil, agus na Ranna Rialtais á bhfógairt, nach mbeadh cúlú ón ngealltanas sa Straitéis 20 Bliain don Ghaeilge go mbeadh Aireacht shinsearach ar a mbeadh lárfhreagracht maidir le cúrsaí Gaeilge. Tréaslaíonn an Chomhdháil leis an Rialtas nua, as beart a dhéanamh de réir a briathar tríd an Roinn Gnóthaí Ealaíon, Oidhreachta agus Gaeltachta a bhunú, mar aon le freagrachtaí speisialta ar ghnóthaí Gaeltachta a bhronnadh ar Aire Stáit.
Dúirt Pádraig Mac Criostail, Stiúrthóir Chomhdháil Náisiúnta na Gaeilge: “Maidir le Clár an Rialtais 2011 – 2016, tá go leor rudaí dearfacha i leith na Gaeilge sa chlár sin. Tá Comhdháil Náisiúnta na Gaeilge ag tnúth le comhoibriú leis an Taoiseach, leis an Aire Deenihan, agus leis an Aire Stáit a bheidh freagrach as gnóthaí Gaeltachta, ar cheisteanna chur chun cinn na Gaeilge amach anseo. Féachfaidh an Chomhdháil chuige go ndíreoidh an Rialtas ar chur i bhfeidhm an Straitéis 20 Bliain don Ghaeilge, agus go neartófar seasamh na Gaeilge trí fheidhmiú Chlár an Rialtais sa tréimhse 2011-2016”.
Eagraíochtaí teanga ag cur fáilte roimh Chlár an Rialtais
Márta 10, 2011
“WE WILL take steps to improve the quality and the effectiveness of the teaching of Irish at second level. When these steps have been implemented, we will consider the question of whether Irish should be optional at Leaving Certificate.”
Sin a scríobhann Fine Gael agus Páirtí an Lucht Oibre i gClár an Rialtais a foilsíodh Dé Domhnaigh. Níl caint ar bith ann faoin Ghaeilge a bhaint mar ábhar riachtanach Ardteiste ach tá rún ag an chomhrialtas tabhairt faoi “a thorough reform of the Irish curriculum and the way in which Irish is taught at primary and second levels of education”.
Tá rún acu béim bhreise a chur ar chúrsaí cainte agus cluastuisceana agus 50 faoin gcéad de na marcanna a bhronnadh ar an scrúdú béil san Ardteist. Cuireann siad mar chuspóir rompu fosta sciar na mac léinn atá ag gabháil don ardleibhéal sa Ghaeilge san Ardteist a dhúbailt.
Scríobhann an dá pháirtí go dtabharfaidh siad tacaíocht don straitéis 20 bliain “and will deliver on the achievable goals and targets proposed” agus go ndéanfaidh siad infheistíocht sa Ghaeltacht i gcruthú post, i gcúrsaí fuinnimh, uisce agus leathanbhanda. Tabharfaidh siad tacaíocht fosta do chraoltóireacht na Gaeilge agus d’earnáil na n-ealaíon.
Tá rún acu athbhreithniú a dhéanamh ar chláir mhaoinithe agus infheistíochta na n-eagras teanga “in order to achieve visible value for money for citizens and tangible outcomes on a transparent basis”.
Chuir príomhfheidhmeannach Ghael-Linn, Antoine Ó Coileáin, fáilte roimh an chlár, á rá gur mhaith “an rud nach bhfuil cinneadh láithreach le déanamh mar gheall ar an nGaeilge a bheith roghnach ag leibhéal na hArdteiste, rud a d’fhéadfadh a bheith ina thubaiste. Molaimid an cur chuige tomhaiste atá á bheartú chun go mbeidh breis éifeachta leis na beartais Ghaeilge atá ann.
“Fáiltímid roimh an athbhreithniú éifeachtúlachta agus luach airgid maidir le hobair na n-eagras Gaeilge agus aontaímid gur chóir go mbeadh torthaí inbhraite agus trédhearcacha ar chaiteachas na Gaeilge”.
Mhol sé sa chomhthéacs sin gur chóir éirí as “an tionscadal de chuid Fhoras na Gaeilge obair na Gaeilge a mhaoiniú ar bhonn scéimeanna. Níl aon rath ar an iarracht atá ar bun le trí bliana anuas agus atá ag cruthú an-éiginnteacht maidir le cláir oibre na n-eagras. Ba chóir go gcuimseodh an t-athbhreithniú rialtais gach maoiniú stáit don Ghaeilge i gcomhthéacs aidhmeanna na straitéise 20 bliain a bhaint amach”.
Dúirt stiúrthóir Chomhdháil Náisiúnta na Gaeilge, eagras comhordnaithe na n-eagraíocht deonach, Pádraig Mac Criostail, go raibh siad ag iarraidh go mbeadh bonn reachtúil faoin straitéis 20 bliain gan mhoill.
Ba chóir go mbeadh ról lárnach ag an Chomhairle um Oideachas Gaeltachta agus Gaelscolaíochta san athbhreithniú ar churaclam na Gaeilge, a dúirt sé.
Ba mhaith leis go dtabharfadh leasú ar bith ar an churaclam líofacht na ndaltaí sin a raibh Gaeilge acu cheana féin, bíodh siad ina gcónaí sa Ghaeltacht nó lasmuigh di, san áireamh. Níor mhaith leis go mbeadh ísliú caighdeáin ar bith san Ardteistiméireacht agus an rialtas nua ag iarraidh líon na ndaltaí a roghnaíonn an páipéar ardleibhéil a mhéadú.
Thug an t-eagras teanga thuaidh/theas, Foras na Gaeilge, le fios gur chuir siad fáilte roimh an tacaíocht do chur i bhfeidhm na straitéise 20 bliain don Ghaeilge. D’aithin siad gur bhain tábhacht le trédhearcacht agus luach ar airgead agus, dá bharr sin, thacaigh siad leis an athbhreithniú ar chláir infheistíochta agus mhaoinithe do thionscadail Ghaeilge.
Thug siad le fios fosta gur mhaith leo “an cinneadh le hathbhreithniú iomlán a dhéanamh ar an gcaoi a múintear an Ghaeilge ag an mbun agus ag an meán leibhéal a threaslú leis na páirtithe”.
Chuir an t-eagras fáilte roimh an chuspóir líon na scoláirí atá ag déanamh staidéir ar an Ghaeilge ag an ardleibhéal a dhúbailt agus roimh na céimeanna atá beartaithe acu cur le caighdeán agus éifeacht theagasc na teanga. Bhí an t-eagras ag dúil le ról lárnach a imirt i bhfeidhmiú an chláir.
NÍL ÚDARÁS na Gaeltachta luaite ina n-ainm féin sa chlár rialtais. D’eisigh an tÚdarás ráiteas inar thug siad le fios go mbeadh bord agus bainistíocht an eagrais ar lorg cruinnithe leis an Aire nua Gaeltachta le cúrsaí fostaíochta sa Ghaeltacht a phlé.
D’aithin siad go raibh an comhrialtas nua ag tacú leis an straitéis 20 bliain agus chuir siad in iúl go raibh sé scríofa sa cháipéis sin go mbeadh ról fiontraíochta ag an Údarás san obair.
Dúirt Pádraig Mac Criostail ón Chomhdháil gur chuir siad fáilte roimh na gealltanais a bhí ann do chúrsaí fostaíochta sa Ghaeltacht ach ba é dóchas na Comhdhála go gcuirfí an acmhainn agus an tacaíocht chuí ar fáil d’Údarás na Gaeltachta le go mbeadh siad ábalta leanstan dá chúraimí fiontraíochta reatha.
Five new schools given approval
Márta 8, 2011
Dhá ghaelscoil nua le bunú i gCúige Laighean
Márta 8, 2011
Cuireadh fáilte roimh fhógra na Roinne Oideachais inné go mbeidh dhá ghaelscoil nua ag oscailt i gcúige Laighean sna blianta atá amach romhainn.
Beidh na gaelscoileanna seo lonnaithe i gCill Dheagláin i gContae na Mí agus i Mullach Eadraid i mBaile Átha Cliath.
Tá an Foras Pátrúnachta mar phátrún ar an dá scoil ach thug siad le fios inné nár bhfuair siad gealltanas ón Roinn Oideachais go dtógfaí cóiríocht buan.
Táthar ag súil go n-osclófar an ghaelscoil i gCill Deagláin i Meán Fómhair na bliana seo agus go n-osclófar an scoil eile i Mullach Eadraid an bhliain seo chugainn.
D’fhógair an Roinn inné gur cheadaigh an tAire Mary Coughlanna gaelscoileanna agus do na trí scoil ilchreidmheacha eile atá le hoscailt faoi phátrúnacht Educate Together an tseachtain seo caite.
Buntáiste Breise na Gaeilge le plé i gCeatharlach
Márta 8, 2011
Ar an Déardaoin, 24 Márta 2011 beidh seimineár Buntáiste Breise na Gaeilge á reáchtáil ag Comhdháil Náisiúnta na Gaeilge in Óstán An Dolmen i gCeatharlach.
I measc na n-aoichainteoirí a bheidh ag labhairt ag an ócáid, beidh bainisteoir ar an tseirbhís le Cumann na bhFiann agus an craoltóir cumasach Traic Ó Braonáin. Labhróidh Mairéad Ní Mhurchú atá ina Léiritheoir Stiúrthóir le Nemeton ar a cuid taithí féin ina post i nGaeltacht na Rinne i bPort Láirge.
Déanfaidh Eibhlín De Paor cur síos ar a post mar Áisitheoir Ealaíon le hEalaín na Gaeltachta agus na buntáistí agus na deiseanna éagsúla a thug an Ghaeilge dí agus í ag dul i mbun gairm bheatha.
Ag labhairt freisin beidh Emma Whitmore, bean atá ina hOifigeach Forbartha Gaeilge le Glór Cheatharlach. Tabharfaidh Emma léargas ar a cuid oibre agus na dúshláin a bhíonn aici ag cur chun cinn na Gaeilge ina ceantar.
D’eagraigh Comhdháil Náisiúnta deich gcinn de na seimineáir seo timpeall na tíre le breis is dhá bhliain anuas agus go dtí seo d’éirigh thar barr leo, le suas le 2,400 dalta scoile as 74 iar-bhunscoil i láthair ag na seimineáir seo go dtí seo.
Táthar ag súil go mbeidh an cur i láthair seo spreagúil, spleodrach, agus go rachaidh an taithí i bhfeidhm ar an lucht éisteachta, agus iad ag roghnú a ngairmeacha beatha féin amach anseo. Ar ndóigh, cuirfear fáilte roimh cheisteanna ó na daltaí agus tugtar cuireadh do dhaltaí páirt a ghlacadh sa díospóireacht tar éis do na hAoichainteoirí labhairt.
Beidh seastáin eolais agus ionadaithe ó roinnt institiúidí tríú leibhéal i láthair chomh maith, chun eolas a thabhairt do na daltaí scoile faoi na deiseanna oideachais atá ann dóibh trí mheán na Gaeilge.
Is féidir tuilleadh eolais faoin seimineár seo a fháil ach glaoch a chur ar Chomhdháil Náisiúnta na Gaeilge ag 01 679 4780 nó r-phost a chur chuig brighid@comhdháil.
An Ghaeilge i gClár an Rialtais
Márta 8, 2011
Is cosúil gur tháinig an dá pháirtí a bheidh ag glacadh páirte sa chomhrialtas nó sa rialtas náisiúnta ar chomhréiteach de shaghas éigin maidir le stádas na Gaeilge san Ardteistiméireacht amach anseo.
Ba léir áfach go raibh cuid mhaith de na gealltanais a rinneadh i ndréacht-chlár an Rialtais bunaithe ar fhorógra Fhine Gael ach go háirithe.
Ghlac páirtí parlaiminteach Fhine Gael leis an gcáipéis dar teideal ‘Towards Recovery: Programme for National Government’ ar an Domhnach tar éis gur ghlac ionadaithe ó Pháirtí an Lucht Oibre leis an gcáipéis ag comhdháil a reáchtáladh i mBaile Átha Cliath Dé Sathairn.
Leagtar síos sa cháipéis seacht mórsprioc maidir le polasaí an Rialtais i leith na Gaeilge agus na Gaeltachta sna blianta amach romhainn.
An Ghaeilge san Ardteist
Deirtear ann go glacfar céimeanna le go dtiocfaidh feabhas ar mhodhanna theagasc na Ghaeilge ar an dara leibhéal agus nach mbeadh athbhreithniú ann go dtí go glacfar na céimeanna sin.
Gheall Páirtí an Lucht Oibre ina fhorógra go gcoinneoidh an páirtí an Ghaeilge mar cheann de na trí ábhar éigeantacha don Ardteistiméireacht. Ní dhearnadh ráiteas chomh soiléir sa dréacht-chlár a foilsíodh arú inné ach dúradh go bpléifear an cheist tar éis go reáchtálfar athbhreithniú ar mhodhanna múinte ag an dara leibhéal amach anseo.
Chuir Comhdháil Náisiúnta na Gaeilge fáilte roimh an gcinneadh ach mhol Pádraig Mac Criostail, Stiúrthóir na Comhdhála, “go bhfeidhmeoidh an Rialtas polasaí Gaeilge sa chóras oideachais a bheidh bunaithe ar fhianaise agus ar dhea-chleachtas pleanála teanga, agus go mbeadh na struchtúir agus na tacaíochtaí cuí i bhfeidhm ar feadh tréimhse shonrach ar mhaithe le seasamh na Gaeilge a neartú sa tréimhse sin.”
Ní luaitear sa cháipéis nua an tuairim a bhí ag Fine Gael roimhe seo, ‘nár chothaigh an Ghaeilge éigeantach fás na teanga nó grá don teanga’.
An Straitéis Fiche Bliain don Ghaeilge
Is léir gur tháinig na páirtithe ar chomhréiteach maidir le cur i bhfeidhm na Straitéise amach anseo chomh maith. Le linn an toghcháin, gheall Fine Gael go dtacófaí le ‘mórán gnéithe’ den straitéis. Anois tá an chuma ar an scéal go mbeidh Rialtas nua ag tacú leis an Straitéis ina iomláine ar an gcoinníoll, áfach go dtacófaí leis na spriocanna “gur féidir a bhaint amach agus na haidhmeanna atá curtha chun tosaigh.”
Ní luaitear sa dréacht-chlár an gealltanas a rinne Páirtí an Lucht Oibre go mbeadh cur i bhfeidhm na Straitéise faoi chúram Oifig an Taoisigh. Is cosúil go mbeidh an cúram seo faoi scáth Aire nó Aire Stáit a ainmneofar nuair a fhillfidh na páirtithe ar Theach Laighean don 31ú Dáil amárach, 9 Márta.
Acht na dTeangacha Oifigiúla, 2003
Le linn an fheachtais toghchánaíochta bhí na heagrais Ghaeilge ag iarraidh go gcuirfí an tAcht i bhfeidhm go forleathan agus go mbeadh atheagar ar phróisis earcaíochta sa státchóras d’fhonn a chinntiú go n-earcófar daoine dátheangacha amach anseo.
Níl na gealltanais sin san áireamh sa dréacht-chlár ach beidh na heagrais ag súil go dtabharfar aird ar na riachtanais sin.
Dúradh sa chlár, áfach, go mbeidh athbhreithniú ar an Acht chun a chinntiú go beidh caiteachas ar an teanga faoin Acht dírithe ar fhorbairt na teanga agus go dtabharfar freagrachtaí do chomhlachtaí poiblí atá bunaithe ar éileamh an phobail. Arís, bhí an moladh seo ar cheann de na mórghealltanais a rinne Fine Gael ina fhorógra.
An Ghaeltacht
Bhí cúram fiontraíochta Údarás na Gaeltachta ina chnámh spairne roimh an toghchán agus bhí an cheist go mór faoi chaibidil ag cruinnithe poiblí a reáchtáladh sa Ghaeltacht le linn an fheachtais.
Ní thugtar le fios sa dréacht-chlár cén ról a bheidh ag Údarás na Gaeltachta amach anseo ach deirtear ann go ndéanfar infheistíocht sa Ghaeltacht agus go mbainfidh ceantair Ghaeltachta tairbhe as an bplean fostaíochta atá molta ag an rialtas nua.
Luaitear sa chlár go gcuirfear i bhfeidhm na Straitéise 20 bliain don Ghaeilge – agus bhí bunú Udarás na Gaeilge agus na Gaeltachta lárnach sa Straitéis sin. Ach tá imní ar Bhaill thofa Údarás na Gaeltachta nach bhfuil feidhm fiontraíochta an eagrais luaite i gclár an rialtais go sonrach agus tá an chuma ar an scéal go reáchtálfar feachtas poiblí go luath mar gheall ar an gceist.
Oideachas
Deirtear sa cháipéis go mbeidh athchóiriú iomlán ar theagasc na Gaeilge ag an mbunleibhéal agus ar dara leibhéal sa chóras oideachais. Is cosúil go mbeidh an rialtas ag cur béime breise ar scileanna labhartha agus éisteachta amach anseo agus tá geallta ag an rialtas go dtabharfaidh níos mó daltaí faoin scrúdú ag an ardleibhéal san Ardteistiméireacht amach anseo.
Ní luaitear sa cháipéis an gealltanas a rinne Páirtí an Lucht Oibre go mbeadh dhá ábhar éagsúla ar an gcuraclam.
Na Meáin Ghaeilge
Glactar leis sa cháipéis go dtacófar leis na meáin chraolta Gaeilge agus na hEalaíona amach anseo. Bhí an moladh seo luaite ag Páirtí an Lucht Oibre le linn an toghcháin.
Athbhreithniú ar Mhaoiniú
Deirtear sa cháipéis go ndéanfar athbhreithniú ar infheistíocht agus ar mhaoiniú d’fhonn a chinntiú go mbeidh luach ar airgid ann agus go mbeidh torthaí inláimhsithe soiléire ag eascairt as obair na n-eagras Gaeilge.
Dúirt Pádraig Mac Criostail go bhfuil na heagraíochtaí atá bunmhaoinithe ag Foras na Gaeilge , “i mbun próiseas athbhreithnithe ar an gceist seo i gcomhar leis an bhForas agus leis na Ranna Rialtais Thuaidh agus Theas, chun obair thábhachtach na n-eagraíochtaí a neartú ar mhaithe le seirbhísí riachtanacha chur chun cinn na Gaeilge a sholáthar go forleathan.”
Fáite curtha roimh ghealltanais don Ghaeilge i gclár an Rialtais
Márta 8, 2011
Fáiltíonn Comhdháil Náisiúnta na Gaeilge roimh an dréacht de Chlár an Rialtais atá aontaithe ag an Lucht Oibre agus Fine Gael, a thagann don mhórchuid le héilimh na Comhdhála do Chlár an Rialtais 2011-2016 a foilsíodh roimh an olltoghchán.
Tá súil ag an gComhdháil go gcuirfear bonn reachtúil faoi Straitéis 20 Bliain don Ghaeilge gan mhoill trí reachtaíocht chuí a dhaingniú rud a chuirfidh go mór le comhlíonadh na spriocanna atá leagtha amach sa Straitéis.
Luaitear sa dréacht-cháipéis go ndéanfar athbhreithniú ar churaclam agus ar mhodhanna teagaisc na Gaeilge ag an mbunleibheal, agus ag an iar-bhunleibhéal. Éilíonn an Chomhdháil go dtabharfar ról lárnach don Chomhairle um Oideachas Gaeltachta agus Gaelscolaíochta i gcur i bhfeidhm an athbhreithnithe seo.
Maidir le leasuithe ar an gcuraclam, molann an Chomhdháil go dtabharfaidh aon leasú ar an gcuraclam reatha san áireamh sainriachtanais daltaí atá líofa sa Ghaeilge, bídís sa Ghaeltacht nó lasmuigh di. Fáiltíonn an Chomhdháil roimh sprioc an Rialtais nua chun líon na ndaltaí ag tabhairt faoin scrúdú Ardleibhéil Gaeilge san Ardteistiméireacht faoi 2018, ach aithnítear nach dtiocfaidh ísliú i gcaighdeán nó i ndúshlán an scrúdaithe seo sa tréimhse chéanna.
Fáiltíonn an Chomhdháil roimh chinneadh an Rialtais na struchtúir agus na leasuithe cuí a chur i bhfeidhm sula gcíorfar ceist na Gaeilge éigeantaí ag leibhéal na hArdteistiméireachta. Molann an Chomhdháil go láidir go bhfeidhmeoidh an Rialtas polasaí Gaeilge sa chóras oideachais a bheidh bunaithe ar fhianaise agus ar dhea-chleachtas pleanála teanga, agus go mbeadh na struchtúir agus na tacaíochtaí cuí i bhfeidhm ar feadh tréimhse shonrach ar mhaithe le seasamh na Gaeilge a neartú sa tréimhse sin.
Fáiltítear roimh ghealltanais an Rialtais i dtaobh cúrsaí fostaíochta sa Ghaeltacht. Éilíonn an Chomhdháil go gcuirfear na hacmhainní agus na tacaíochtaí cuí ar fáil d’Údarás na Gaeltachta chun leanúint dá chúram fiontraíochta reatha.
Fáiltítear roimh athbhreithniú ginearálta ar fheidhmiú Acht na dTeangacha Oifigiúla 2003 i dtreo fhorbairt na teanga, d’fhonn seirbhísí breise trí Ghaeilge a sholáthair don phobal. Le linn shaolré an Rialtais nua, beidh 10 mbliana caite ó achtaíodh an tAcht seo den chéad uair, agus ní miste féachaint chuige go bhfuil bunaidhm an Achta á chomhlíonadh go héifeachtach agus go héifeachtúil i gcónaí.
Maidir le hinfheistíocht reatha agus cláir mhaoinithe na Gaeilge, tá na heagraíochtaí atá bunmhaoinithe ag Foras na Gaeilge i mbun próiseas athbhreithnithe ar an gceist seo i gcomhar leis an bhForas agus leis na Ranna Rialtais Thuaidh agus Theas, chun obair thábhachtach na n-eagraíochtaí a neartú ar mhaithe le seirbhísí riachtanacha chur chun cinn na Gaeilge a sholáthar go forleathan.
Preaseisiúint ó Chomhdháil Náisiúnta na Gaeilge
Foilsithe ar 08 Márta 2011
Five schools to open by 2013
Márta 8, 2011
Ionsaí mór fógartha do Ghaelscoileanna le hardú suntasach sa Chóimheas Daltaí le Múinteoir
Márta 7, 2011
Is ábhar ollmhór imní é do ghaelscoileanna na tíre seo fógra na Roinne Oideachais agus Scileanna maidir le deireadh a chur leis an socrú reatha cóimheas daltaí le múinteoirí atá i bhfeidhm sna gaelscoileanna. Faoin gcóras reatha tá cur chuige i bhfeidhm a aithníonn na dúshláin bhreise atá ag na gaelscoileanna atá beag trí chóimheas daltaí-múinteora a cheadú atá beagán níos fábharaí ná an gnáthchóimheas. D’aithin an córas reatha na dúshláin bhreise atá le sárú sna gaelscoileanna, ar a n-áirítear cur i bhfeidhm curaclam iomlán trí mheán na Gaeilge, agus éagothroime sna hacmhainní agus sna tacaíochtaí atá ar fáil dóibh. Ceadaíodh an cóimheas mar léiriú ar an riachtanas a bhaineann le caomhnú agus le láidiriú an chórais tumoideachais agus sainmheon na Gaeilge sna scoileanna a chosaint.
Tá sé fógartha go mbeidh na gaelscoileanna ar aon leibhéal leis na scoileanna a dhéantar teagasc trí mheán an Bhéarla ó Mheán Fómhair 2011, athraithe a bheidh an-tromchúiseach agus a fhágfaidh scoileanna le caillteanas foirne, ranganna móra agus laghdú iomlán ar eispéaras éifeachtach foghlama an pháiste. Tá impleachtaí tromchúiseacha ann d’fhostaíocht múinteoirí, ach go háirithe dóibh siúd nach bhfuil cearta painéal acu agus i bhfianaise nach bhfuil painéal cuí ann do mhúinteoirí i scoileanna lán-Ghaeilge.
Tubaist é seo do na scoileanna lán-Ghaeilge a bhfuil idir triúr agus ochtar múinteoirí acu, ach go háirithe. Tá suas go 31 scoil a chaillfidh múinteoir amháin má chuirtear an moladh seo i bhfeidhm. Caillfidh ceithre scoil eile beirt mhúinteoir agus beidh ar na príomhoidí filleadh ar ais ar an seomra ranga i gcás 6 scoil. Ardófar líon na ndaltaí sna ranganna agus beidh go leor ranganna meascaithe ann le líon ard daltaí iontu dá bharr. Bheadh ar roinnt scoileanna idir 17-23 daltaí sa bhreis a thabhairt isteach sa scoil i Meán Fómhair 2011 leis na múinteoirí thuasluaite a choimeád, líon nach bhfuil réadúil dóibh mar nach scoileanna atá ag forbairt atá iontu don chuid is mó. Aon uair a athraíodh an sceideal go dtí seo is dalta nó beirt sa bhreis a bhí de dhíth!! Athrú raidiceach, tromchúiseach atá san athrú seo.
Dúirt Mícheál Ó Broin, Uachtarán GAELSCOILEANNA TEO. ina thaobh “In anneoin na Straitéise 20 Bliain don Ghaeilge agus maíomh an Rialtas nach mbeadh aon athrú ag teacht ar an gcóimheas daltaí le múinteoirí i mbliana, is léir nach raibh siad ag smaoineamh ar na gaelscoileanna nuair a rinneadh an ráiteas sin. Ardaíonn an cinneadh seo ceisteanna arís maidir le dearcadh na Roinne i dtreo an Ghaeloideachais.Is buile marfach i ndiaidh buile marfach atá ag teacht. Ní hamháin go bhfuil na gaelscoileanna ag fulaingt go míchothrom de bharr cúinsí drochchóiríochta, agus éagothroime sa chóras ó thaobh tacaíochta de, ach anois tá an bonn á bhaint den chóras trí bhrú breise a chur ar acmhainní fíor-shrianta. Tá sé scannalach agus doghlactha go bhfuil na scoileanna lán-Ghaeilge thíos leis arís.”
Agreement for ‘one of the darkest hours’
Márta 7, 2011
