Suirbhé maidir le hionadaíocht i mbunscoileanna lán-Ghaeilge agus Gaeltachta
Nollaig 19, 2016
Tá dúshlán an-mhór ag scoileanna lán-Ghaeilge, laistigh agus lasmuigh den Ghaeltacht ionadaí a fháil atá in ann feidhmiú i scoil lán-Ghaeilge. Tá Gaeloideachas ag bailiú eolais faoi láthair ó scoileanna a bhfuil nó a raibh deacracht acu ionadaí cuí a fháil agus bainfear leas as an aiseolas seo, go discréideach, chun iarracht a dhéanamh cás a chur faoi bhráid na Roinne ina leith.
Bheimis fíor-bhuíoch díot as an suirbhé beag seo a chomhlánadh roimh dheireadh an lae ar an Déardaoin, 22 Nollaig 2016.
Suirbhé: https://www.surveymonkey.com/r/ionadaiocht2016
Leasú reachtaíochta ó Pháirtí an Lucht Oibre chun polasaithe iontrála scoileanna lán-Ghaeilge a chosaint
Nollaig 19, 2016
Tá leasú a thabharfadh cosaint do pholasaithe iontrála i scoileanna lán-Ghaeilge i reachtaíocht nua á chur chun cinn ag Páirtí an Lucht Oibre.
Thug an Seanadóir de chuid Pháirtí an Lucht Oibre, Aodhán Ó Ríordáin le fios inné go raibh leasú ar an An Bille Oideachais (Ligean Isteach i Scoileanna), 2016 á chur chun cinn aige féin agus iarcheannaire a pháirtí, an Teachta Dála, Joan Burton.
Dúirt an Seanadóir Ó Ríordáin nach go héasca a cuireadh abhaile air gur ghá leasú a dhéanamh ar an reachtaíocht chun cosaint a thabhairt do cheart scoileanna lán-Ghaeilge tús áite a thabhairt do pháistí a bhfuil Gaeilge acu.
Thacaigh urlabhraí oideachais Shinn Féin, Carol Nolan le héileamh lucht an ghaeloideachais go ndéanfaí an reachtaíocht nua a leasú chun a chinntiú go mbeidh cead ag scoileanna lán-Ghaeilge tús áite a thabhairt ina bpolasaithe iontrála do pháistí a bhíonn á dtógáil le Gaeilge.
Rinne Gaeloideachas agus an grúpa tuismitheoirí Cearta Oideachais cur i láthair inné ag an gcruinniú de chuid an Choiste Oideachais. Dúirt an Dr Ríona Ní Fhrighil ón ngrúpa Cearta Oideachais nár chóir go mbeadh “ord fiúntais” ann maidir le cearta mionlaigh agus gur chóir don reachtaíocht nua oideachais aitheantas a thabhairt do chearta teanga na bpáistí atá á dtógáil le Gaeilge.
Dúirt Bláthnaid Ní Ghréacháin, Ardfheidhmeannach Gaeloideachas, gur “ceart bunúsach” é ag scoileanna go dtabharfaí cosaint do theanga teagaisc agus do theanga an phobail acu.
Dúirt Ní Ghreácháin gur ghá an Bille a leasú le cosaint a thabhairt don Ghaeilge féin agus do chur chuige an luath-thumoideachais.
Dúirt ionadaithe an dá ghrúpa Gaeilge go raibh lucht an ghaeloideachais go mór ar son an iolrachais agus na héagsúlachta agus gur chuid den iolrachas sa chóras oideachais an éagsúlacht teanga.
Baineann an reachtaíocht nua le scoileanna a bhfuil ró-éileamh orthu, mar a tharlaíonn níos minice i gcás Gaelscoileanna ná scoileanna eile. De réir figiúirí Gaeloideachas bíonn ró-éileamh i gceist i gcás 29% de bhunscoileanna lán-Ghaeilge agus 22% d’iarbhunscoileanna lán-Ghaeilge.
Dúirt an Seanadóir neamhspleách, Lynn Ruane gur “céim ar gcúl” a bheadh ann leasú a dhéanamh ar an reachtaíocht chun tús áite a thabhairt do pháistí atá á dtógáil le Gaeilge. Cé nach raibh Gaeilge aici féin, a dúirt sí, bhí Gaeilge ag a hiníon atá ag freastal ar Ghaelscoil. Dúirt an Seanadóir Ruane gur “údar imní” a bhí sa chaint ar an reachtaíocht a leasú agus gur chóir díriú ar theaghlaigh a iompú ar an nGaeilge seachas “bac” a chur ar pháistí nár tógadh trí Ghaeilge.
Mar fhreagra ar an méid sin, dúirt an Dr Ríona Ní Fhrighil ó Cearta Oideachais nach cainteoirí dúchais iad ach 3% de na daltaí sa chóras gaelscolaíochta agus nach dtiocfadh ceist teanga an teaghlaigh i gceist ach i gcás a mbeadh ró-éileamh ar scoil.
Dúirt sí gur chun leas iarrachtaí daltaí eile an Ghaeilge a fhoghlaim é go dtabharfaí cosaint don mhionlach cainteoirí dúchais líofa a fhreastalaíonn ar ghaelscoileanna.
Tá imní ar lucht an ghaeloideachais go gcuirfidh An Bille Oideachais (Ligean Isteach i Scoileanna), 2016, a bhfuil tús curtha lena aistear trí Thithe an Oireachtais, cosc ar pholasaithe iontrála scoile a thugann tús áite do dhaltaí a bhfuil Gaeilge acu.
Cé nach bhfuil scoileanna lán-Ghaeilge ná an Ghaeilge féin luaite go sonrach sa reachtaíocht nua, tá lucht an ghaeloideachais buartha faoi dhá fhoráil de chuid an Bhille, go háirithe.
Faoi alt 64 den Bhille, beidh ar an Aire Oideachais agus Scileanna rialachán a dhéanamh a chuirfeadh cosc ar scoileanna a mbeadh ró-éileamh orthu diúltú do dhalta bunaithe ar ‘academic ability, skills or aptitude’.
Chuirfeadh rialachán dá leithéid cosc ar scoileanna lán-Ghaeilge tús áite a thabhairt do dhaltaí, bunaithe ar a gcumas teanga.
Má achtaítear an Bille beidh dualgas ar an Aire faoin alt céanna, Alt 64, rialachán a dhéanamh a chuirfeadh cosc ar scoileanna iallach a chur ar dhalta, nó a thuismitheoirí, teacht chun agallaimh, lá oscailte nó cruinniú de shaghas eile mar choinníoll iontrála.
Is minic leas á bhaint as agallaimh ag scoileanna a bhfuil polasaí Gaeilge acu chun measúnú a dhéanamh ar chumas teanga.
Tá sé i gceist ag an Aire Richard Bruton go n-achtófaí an bille nua, a d’fhoilsigh sé i mí Iúil, roimh Mheán Fómhair 2017, mar atá geallta i gclár an Rialtais.
Folúntas – Príomhoide le Gaeilge de dhíth d’iarbhunscoil nua
Nollaig 16, 2016
Iar-bhunscoil nua chomhoideachais, ilchreidmheach a bheidh sa Choláiste Pobail i bPort Laoise a dhéanfaidh freastal ar 1,000 daltaí. Scoil mheán an Bhéarla a bheidh sa Choláiste Pobail, ach beidh Aonad Lán-Ghaeilge comhtháite leis an gColáiste Pobail. Deis ar leith a bheidh ann don duine cuí. Spriocdháta 6 Eanáir 2017, sonraí ar fáil ar http://www.laoisoffalyetb.ie/currentvacancies
(English) Schools’ high achievements celebrated at Stormont
Nollaig 15, 2016
(English) Gerry Adams: DUP must step up on Irish language
Nollaig 8, 2016
(English) Two more Irish school proposals rejected by DUP minister
Nollaig 8, 2016
Coirm Gael Linn – Dáta Deiridh Iontrála, 16 Nollaig 2016
Nollaig 7, 2016
Ba mhaith le Gael Linn a chur i gcuimhne do ghaelscoileanna ar fud na tíre go bhfuil an dáta deiridh iontrála do Coirm 2017 ag teannadh linn!
Tá na dátaí do na féilte thíos agus is féidir cóip A4 den fhoirm iontrála a íoslódáil ar shuíomh Gael Linn ag www.gael-linn.ie
Déardaoin 2 Feabhra 2017 – Amharclann Phlás an Mhargaidh, Ard Mhacha
Dé Céadaoin 8 Feabhra 2017 – Amharclann an Ionaid Óige, Mainistir Fhear Maí
Déardaoin 9 Feabhra 2017 – Amharclann Naomh Mícheál, Ros Mhic Thriúin
Déardaoin 9 Feabhra 2017 – An Grianán, Leitir Ceanainn
Dé Máirt 14 Feabhra 2017 – Amharclann Clasach, Fionnradharc, BÁC
Déardaoin 16 Feabhra 2017 – An tÁras Ealaíne, An Muileann gCearr
Dé Máirt 28 Feabhra/Dé Céadaoin 1 Márta 2017 – Amharclann na Cathrach, Gaillimh
Dé Máirt 7 Márta 2017 – Siamsa Tíre, Trá Lí
Gach eolas:
Seán Ó Ceallaigh, Gael Linn
01.6753299 seanc@gael-linn.ie
Comórtas Náisiúnta Ealaíne
Nollaig 7, 2016
Tá Fíbín ar ais arís i mbliana le Comórtas Náisiúnta Ealaíne agus muid sa tóir ar an chéad íomhá poiblíochta eile don dráma ‘An Triail’, a bheidh ag dul ar camchuairt an fómhar seo chugainn. Cuireadh oiread sin suim sa chéad chomórtas a reáchtáil muid an bhliain seo agus fuair muid neart iontrálacha isteach ó scoileanna mórthimpeall na tíre. Tá duais iontach le buachan, ina measc táibléad Android, 30 ticéad don rang chun An Triail a fheiceáil ar stáitse agus seisiún príobháideach Ceisteanna & Freagraí leis na haisteoirí tar éis an seó. Ba scoláire as Mayfield Community School i gCorcaigh a bhuaigh an duais i mbliana ach cá bhfios cén cearn den tír a gcríochnóidh an duais mhór suas ann an bhliain seo chugainn. Is féidir na treoirlínte a léamh ar ár suíomh gréasáin anseo
Beidh dearadh an bhuaiteora le feiceáil ar bhallaí in amharclanna ar fud na tíre agus in ábhar poiblíochta ar shuíomh Gréasáin Fíbín agus ar a gcainéil meáin shóisialta chomh maith. Tá neart am chun bhur n-iontrálacha a fháil isteach, idir seo agus an spriocdháta 19 Bealtaine 2017. Má tá aon cheisteanna seol ríomhphost chuig margaiochtfibin@gmail.com
Fanzini Brothers
Nollaig 7, 2016
Bailigí timpeall, bailigí uilig is beidh béaloscailteach nuair a fheiceann sibh na héachtanna do-chreidthe a bhfuil na deartháireacha seo as Chiaraí –cibé áit eile! -sásta tabhairt faoi. An bhfuil siad amaideach nó chalma thar aon chreidiúint? Is cuma cé acu í ndáirire mar go gcuireann siad seó sorcas iontach greannmhar is fíor craiceáilte í láthair d’óg is aosta.
Tá na bráthaire Fanzini ag súil go mór go mbéimíd leat i rith seachtain na gaeilge. Tá laochanna an sorcas Gaelach agus greann seo réidh le ár taispeantas do chreidthe a dhéanamh i do scoil. Bígí reidh le briseadh síos le gáire. Seol teachtaireacht chugainn chun níos mó eolas a fháil uainn.
Níos mó eolais ag: http://fanzini.ie/fanzini-brothers/
Ríomhphost: info@fanzini.ie
Guthán: 087-997 8146
An-Scléip i Muineachán!
Nollaig 7, 2016
‘Séasúr an ghrá’, Coláiste Lú, Dún Dealgan a tháinig sa chéad áit sa chomórtas Slua-Amhránaíocht ( Sóisear ) ag réamhbhabhta Scléip Gael Linn 2017 i Muineachán
‘Donald Trump’ i measc lucht sceitse ‘Meascán Mearaí’ ó Phobalscoil Ghaoth Dobhair, a bheidh ag gabháil san iomaíocht i gcraobhchomórtas Scléip Gael Linn 2017 ar an 2 Feabhra 2017 in amharclann Clasach, BÁC
Bhí atmaisféar iontach in Amharclann an Gharáiste, Muineachán, ag réamhbhabhta an tuaiscirt de chomórtas Scléip Gael Linn ar an Déardaoin, 1 Nollaig seo caite ! Is éard atá i Scléip ná comórtas tallainne spreagúil agus spraíúil atá dírithe go sonrach ar na hiarbhunscoileanna lán-Ghaeilge, le béim ar na healaíona comhaimseartha.
Bhí iomaitheoirí ó Phobalscoil Ghaoth Dobhair, Pobalscoil Chloich Cheann Fhaola, An Fálcarrach, mar aon le scoláirí Choláiste Ailigh, Leitir Ceanainn, Coláiste Oiriall, Muineachán agus Coláiste Lú, Dún Dealgan i measc na rannpháirtithe a rinne léiríu ar sceitsí, ar rince chruthaitheach, agus ar cheol agus amhránaíocht chomhaimseartha. Bhain an lucht féachana mhór ard-taitneamh as an seó uilig ! Tugadh an-tacaíocht do gach réalta óg a chuaigh ar stáitse, cé go raibh teannas an chomórtais le brath anois is arís!
Mhol na moltóirí, Edel Ní Churraoin, ceoltóir agus craoltóir le Raidió Fáilte, agus Tomaí Ó Conghaile, Eagarthóir ‘Nós’ agus láithreoir leis an BBC, na daoine óga uilig a chuaigh ar stáitse, agus thugadar aischothú agus moltaí dóibh a bheidh ina gcabhair acu amach anseo. Bhí cinntí deacra le déanamh acu tríd síos , ach bhíodar aontaithe gurb iad na míreanna a leanas a leanfaidh na buaiteoirí ó réamhbhabhtaí an iarthair, an oirthir agus an deiscirt go Baile Átha Cliath don chraobhchomórtas in amharclann Clasach, Fionnradharc, ar an Déardaoin, 2 Feabhra 2017:
Rince Cruthaitheach ( Aonair ) Sóisear: Aoife Nic Gabhann, Coláiste Oiriall, Muineachán
Rince Cruthaitheach ( Grúpaí ) Sóisear: ‘Grúpa Ríoghnach’, Pobalscoil Ghaoth Dobhair, Co. Dhún na nGall
Sceitse Nuachumtha ( Sóisear ): ‘Meascán Mearaí’, Pobalscoil Ghaoth Dobhair, Co. Dhún na nGall
Sceitse Nuachumtha ( Sinsear ): ‘Conraitheoirí Uí Ghallachóir Teo’, Pobalscoil Chloich Cheann Fhaola, Co. Dhún na nGall
Slua-Amhranaíocht ( Sóisear ): ‘Séasúr an ghrá’, Coláiste Lú, Dún Dealgan, Co. Lú
Ceol Aonair Comhaimseartha ( Sóisear ): Justin Ó hAgáin, Coláiste Lú, Dún Dealgan, Co. Lú
Ceol Aonair Comhaimseartha ( Sinsear ): Ruairí Mac Lochlainn, Coláiste Ailigh, Leitir Ceanainn, Co. Dhún na nGall
Amhránaíocht Aonair Chomhaimseartha, le Féintionlacan ( Sóisear ): Aoibhinn Ní Dheagha, Pobalscoil Ghaoth Dobhair, Co. Dhún na nGall
Amhranaíocht Aonair Chomhaimseartha, le Féintionlacan ( Sinsear ): Amy Ní Chléirigh, Coláiste Ailigh, Leitir Cenainn, Co. Dhún na nGall
Grúpa Amhránaíohta Comhaimseartha le Féintionlacan ( Sóisear ): ‘Draíocht’, Pobalscoil Chloich Cheann Fhaola, An Fálcarrach
Grúpa Amhranaíochta Comhaimseartha le Féintionlacan ( Sinsear ): ‘Cinniúint’, Coláiste Oiriall, Muineachán
CRÍOCH
Tuilleadh eolais: Niamh de Búrca 01:6753303/niamh@gael-linn.ie
