Ceardlann Oiliúna do Mhúinteoirí Gairmthreorach – 27 Aibreán
Aibreán 18, 2018
A Mhúinteoir, a chara,
Tugaimid cuireadh duit chuig an gcéad cheardlann oiliúna eile do mhúinteoirí Gairmthreorach iar-bhunscoile a mhúineann trí mheán na Gaeilge. Beidh an cheardlann seo in Óstán an Gresham, Sráid Uí Chonaill, Baile Átha Cliath ar an Aoine, an 27 Aibreán ón 11 r.n. – 2 i.n.
Beimid buíoch díot más féidir leat a rá linn go luath an mbeidh tú ag freastal ar an gceardlann ar an 27 Aibreán trí ríomhphost a sheoladh chuig padraig@cogg.ie roimh an 25 Aibreán ar a dhéanaí. Is gá dúinn na socruithe cuí a dhéanamh maidir le sólaistí a eagrú agus ábhar priontáilte don cheardlann a ullmhú. Beidh srian áirithe ar líon na n-áiteanna ar an gcúrsa agus bheadh sé inmholta spás a chur in áirithe a luaithe agus is féidir.
Seolfar tuilleadh sonraí ar aghaidh maidir le clár an lae nuair a bheidh rannpháirtithe na ceardlainne deimhnithe. Tá ríméad orainn a fhógairt go mbeidh Claire O’Halloran (Síceolaí Oideachais) ón tSeirbhís Náisiúnta Síceolaíochta Oideachais (NEPS) i láthair ar an lá chun caint a thabhairt ar thopaicí atá tráthúil i gcomhthéacs an déagóra iar-bhunscoile comhaimseartha.
Bhí cruinniú an-rathúil againn an bhliain seo caite. Cuireadh liosta le chéile d’fhorbairtí a bheadh cuiditheach do mhúinteoirí Gairmthreorach agus iad i mbun a gcuid teagaisc trí mheán na Gaeilge. Seo roinnt de na forbairtí a rinneamar:
- Athdhearadh arwww.saoloibre.ie
Beidh eispéireas níos fearr ag na húsáideoirí agus beidh sé níos fusa teacht ar na huirlísi is úsáidí ar an suíomh. San athdhearadh ar an leathanach baile, is féidir féachaint ar an Nuacht is Déanaí agus ar Ghairm na Míosa.
Agus scoláirí ar rannóg na n-earnálacha gairme, feicfidh siad na deiseanna fostaíochta le Gaeilge sna hearnálacha sin. Tá nasc soiléir ann freisin ón leathanach baile chuig deiseanna fostaíochta san Eoraip.
Ar an leathanach baile feicfidh scoláirí gach cúrsa 3ú leibhéal a bhfuil gá le honóracha sa Ghaeilge dóibh nó a bhfuil ábhar suntasach trí Ghaeilge iontu.
Is féidir le scoláirí leas a bhaint as Próifíleoir Spéise trí Ghaeilge. Priontálfaidh sé tuairisc chuimsitheach. Molfaidh sé gairmeacha éagsúla agus cúrsaí oideachais bunaithe ar na réimsí spéise a léireoidh na scoláirí.
2.Scileanna Gairme – Comórtas Náisiúnta 2018
Seo comórtas speisialta do scoláirí in iar-bhunscoileanna ina mbíonn an teagasc trí mheán na Gaeilge. Tá sé feiliúnach do scoláirí ón Idirbhliain ar aghaidh.
Inseoidh scoláirí dúinn faoina n-eispéireas agus faoi na scileanna gairme atá feicthe agus forbartha acu agus iad ar thaithí oibre. Tabharfaidh siad faoi imscrúdú gairme agus déanfaidh siad machnamh ar an tionchar a bheidh ag an tréimhse taithí oibre ar a gcuid rogha gairme amach anseo.
Tá duaiseanna iontacha ann, m.sh. MacBook Air don chéad áit agus €1,000 do chlár gaolmhar na scoile (Gairmtheoir, GCAT, ATF, Idirbhliain).
Tá físeán gairid againn le húsáid sa seomra ranga. Míníonn sé do scoláirí faoin gcomórtas. Féach ar leathanach baile nó i rannóg Scileanna Gairme an tsuímh sin.
- Físeáin agus Podchraoltaí– féach ar an rannóg nua ar SaolOibre.ie
Spreagfaidh siad daltaí le leanúint leis an nGaeilge ina ngairmeacha. Tá sraith agallamh ann freisin. Beidh siad seo úsáideach agus scoláirí ag ullmhú don scrúdú cainte.
- Suíomh Gréasáin Gairmthreorach
Tá an suíomh seo anois ar fáil i nGaeilge. I measc na ngnéithe nua, tá:
- Nuacht laethúil le hailt a bhaineann le cúrsaí oideachais
- Imeachtaí agus fógraí ó Institiúidí Ardoideachais agus Coláistí Breisoideachais ar fud na tíre
- Is féidir ailt a íoslódáil
- Naisc chuig raidhse acmhainní gairmthreorach
- Is féidir íoslódálacha a chur ar fáil do scoláirí i.e. bileoga oibre, cuir i láthair PowerPoint, foirmeacha iarratais srl.
- Is féidir é a nascadh le príomhshuíomh gréasáin na scoile.
Chun samplaí de dhearadh nua an tsuímh scoile a fháil, téigh chuig Coláiste Cois Life nó Gaelcholáiste Luimnigh chun breathnú ar an suíomh Gairmthreorach scoile atá acu. Míle buíochas leis na múinteoirí Niamh Ní Fhionnghasa (Coláiste Cois Life) agus Áine Máire Ní Uaithne (Gaelcholáiste Luimnigh) as a gcuid oibre a roinnt linn.
Is féidir le scoláirí atá ag staidéar trí mheán na Gaeilge painéal nua a fheiceáil anois ag barr a gComhad Gairme Reach+ le naisc díreach chuig cuid de na huirlisí is mó éilimh ar www.saoloibre.ie
Ceadaíonn na naisc gur féidir le scoláirí dul go díreach chuig:
- Próifíleoir Spéise
- Earnálacha Fostaíochta
- Gairmeacha
- Físeáin agus Podchraoltaí
Is ionann an Próifíleoir Spéise i nGaeilge agus i mBéarla. Níl feidhmeanna éagsúla acu. Is féidir le scoláirí an próifíleoir a úsáid i nGaeilge nó i mBéarla, agus breathnú ar na torthaí, nó tuairiscí a phriontáil i nGaeilge nó i mBéarla.
- Póstaeir
Beidh na póstaeir Ghaeilge nua ag tromlach na scoileanna faoin am seo. Féach ar na híomhánna thíosceangailte. Más tá tuilleadh póstaer uait, beidh siad againn ar an 27 Aibreán. Beidh neart forbairtí eile le roinnt againn leat ar an lá chomh maith.
Táimid fíorbhuíoch de COGG, NCGE agus An Roinn Cultúir, Oidhreachta agus Gaeltachta as a gcuid cabhrach agus tacaíochta maidir leis na hacmhainní nua seo a fhorbairt.
Beimid ag tnúth libh a fheiceáil ag tús mhí an Mhárta.
Le gach dea-ghuí,
Eimear Sinnott – esinnott@careersportal.ie
Príomhfheidmeannach SaolOibre.ie/CareersPortal.ie
Pádraig Ó Beaglaoich padraig@cogg.ie
Oifigeach Oideachais Iar-bhunscoile COGG
Ceoltóirí Choláiste na Coiribe i gCraobhchomórtas Siansa Gael Linn 2018 !
Aibreán 16, 2018
Beidh féasta ceoil sa Cheoláras Náisiúnta ar an Domhnach, 22 Aibreán ag Craobhchomórtas Siansa Gael Linn 2018 ! Ocht ngrúpa, ina bhfuil plúr na gceoltóirí agus na n-amhránaithe óga traidisiúnta, a bheidh páirteach i mbuaicphointe seo an chomórtais. Ina measc, beidh an grúpa ‘Uisneach’ ó Choláiste na Coiribe, Gaillimh, faoi stiúr a múinteora, Holly Geraghty.
Tá Siansa á reáchtáil ag Gael Linn, le tacaíocht ó RTÉ Raidió na Gaeltachta agus Irish Music Magazine. Ar an bhfód anois le seacht mbliana déag, cothaíonn an comórtas dlúthcheangal idir an Ghaeilge, an ceol agus an óige.
Is iad na grúpaí eile a tháinig trí chóras réamhbhabhtaí le bheith ar ardán ag an mórócáid seo ná ‘Lonrach’ ó Chontae Laois, ‘Fonnmhar’, An Brú, Co. Luimnigh, ‘Sin a’Bhfuil’ ó Chontaetha Laoise agus Uíbh Fháilí, ‘Spleodar’, Inis Ceithleann, Co. Fhear Manach, ‘Caise’, Inis, Contae an Chláir, ‘I gCónaí Réidh’, Caisleán an Danair, Co. Loch Garman agus ‘Léargas’, Bré, Co. Chill Mhantáin. Seinnfidh gach grúpa a rogha féin de cheol traidisiúnta, a mhairfidh idir 10 agus 12 nóiméad, agus atá cóirithe go speisialta ag na baill, agus beidh amhráin Ghaeilge le cloisteáil uathu chomh maith.
Ag cur comhairle ar na grúpaí ábharacha ar a mbealach chun na craoibhe i mbliana, bhí na ceoltóirí aitheanta Declan Masterson agus Muireann Nic Amhlaoibh. Beidh Oisín Mac Diarmada ón ngrúpa ‘Téada’ ag moltóireacht in éineacht leo sa Cheoláras, agus roghnóidh an triúr iomráiteach seo na duaiseoirí. Le duaischiste de €4,500, is féidir a bheith ag súil le géariomaíocht agus ardchaighdeán ceoil ar an oíche. Bronnfar príomhdhuais €2,500 agus trófaí Gael Linn ar na buaiteoirí, €1,250 don dara háit agus €750 don tríú háit. Anuas air sin, bronnfar duais chuimhneacháin ar na ceoltóirí uile a bheidh páirteach sa Chraobh.
Beidh an ceolchoirm á chraoladh beo ar RTÉ Raidió na Gaeltachta ó 7.30p.m. ar an oíche , agus is í Áine Hensey a bheidh mar láithreoir. Chun ticéad a chur in áirithe don ócáid, ní gá ach dul i dteagmháil leis an gCeoláras Náisiúnta ag 01:417 00 00 nó www.nch.ie.
Deiseanna do na scoileanna lán Ghaeilge i bhfógra an Aire Oideachais
Aibreán 13, 2018
Cuireann Gaeloideachas fáilte mhór roimh fhógra an Aire Oideachais agus Scileanna, Richard Bruton, inniu, go bhfuil 42 scoil úra le hoscailt le linn na tréimhse 2019-2022. “Is fógra an-dearfach é seo a chabhróidh linn a chinntiú go mbeidh oideachas lán-Ghaeilge ar fáil mar rogha do bhreis páistí a bhfuil suim ag a dtuismitheoirí sa chóras tumoideachais agus cabhróidh siad go mór i dtaobh freastal ar an éileamh ollmhór atá ann ar oideachas ilchreidmheach trí mheán na Gaeilge freisin”, a deir Bláthnaid ní Ghréacháin, Ardfheidhmeannach Gaeloideachas.
Deiseanna le scoileanna nua a bhunú
Pléifidh Gaeloideachas le pátrúin ionchasacha gur mian leo oideachas lán-Ghaeilge a chur ar fáil sna ceantair atá aitheanta ag an Roinn, agus fáiltíonn muid roimh fiosrúcháin agus teagmháil ón bpobal maidir leis na féidearthachtaí a shamhlaíonn siad dá gceantair féin.
Tá ceantair áirithe ar an liosta inar ritheadh feachtais le scoileanna lán-Ghaeilge a bhunú cheana, ina measc: Marino, Droim Conrach agus BÁC1, 2, 4 agus 6, Dún Laoghaire agus Cill Chainnigh. Beimid ag súil le tógáil ar an mhór-obair a rinne na pobail sin agus toradh dearfach a bhaint amach dóibh anois agus an deis ann. Feictear dúinn go mbeidh éileamh ar scoileanna lán-Ghaeilge i go leor de na ceantair eile leis, agus tuigeann muid ó na staitisticí a chuireann scoileanna ar fáil don eagraíocht chuile bhliain go bhfuil ró éileamh ar formhór na scoileanna lán-Ghaeilge reatha sna ceantair atá ar liosta na Roinne.
Gá le cur chuige iomlánaíoch le cúram a thabhairt do na scoileanna reatha
Táimid feasach chomh maith ar na deiseanna agus dúshláin a chruthaíonn fógra mar seo don phobal scoile reatha, go bhfuil scoileanna ann gur mian leo fás ach nár tugadh an cead dóibh, agus scoileanna atá ag fulaingt le blianta fada de dheasca cóiríocht míchuí a bheith acu. Leanfaimid orainn ag troid cás na scoileanna seo agus ag éileamh go dtabharfaí a gcuid mianta agus riachtanais san áireamh i gcónaí sa phróiseas pleanála. Is cinnte go bhfuil scoileanna ann a bheadh toilteanach agus in ann roinnt den bhrú atá ar an gcóras a mhaolú trí glacadh le daltaí breise ach foirgnimh chuí a bheith acu, agus iarraimid go mbeadh cur chuige iomlánaíoch ag an Roinn agus iad ag pleanáil chun cinn. Seasann seo ach go háirithe ag an iar-bhunleibhéal, áit a mbeadh féidearthachtaí ann an soláthar reatha a fhorbairt agus stádas scoil neamhspleách a bhunú ar aonaid atá ag feidhmiú i roinnt de na ceantair aitheanta. Faoi láthair, tá aonaid iar-bhunleibhéil ag feidhmiú ar fud na tíre gan tacaíocht nó cosaint cuí ón Stáit lena rathúlacht agus inmharthanacht a chinntiú. Thabharfadh an próiseas seo deis don Roinn obair i gcomhairle lena bpátrún agus soláthar lán-Ghaeilge buan a chinntiú do na réigiúin sin.
Cothrom na féinne don oideachas lán-Ghaeilge?
Ní léir go fóill cén próiseas a bheidh ann le pátrúin agus sainmheoin na scoileanna nua atá le bunú a roghnú. Tá sé tugtha le fios ag an Roinn go mbeidh athruithe air, ach go mbeidh an béim ar rogha na dtuistí go fóill. Beidh tionchar mhór ag an bpróiseas roghnúcháin ar an líon scoileanna nua lán-Ghaeilge a bhunófar agus tá Gaeloideachas ag stocaireacht ó 2015 chun go leasófar é ar mhaithe le cothrom na féinne a bheith ann d’iarratais ar scoileanna lán-Ghaeilge. Chuir an próiseas, i bhfeidhm ó 2011, tuismitheoirí gur mian leo oideachas lán-Ghaeilge dá bpáistí faoi mhíbhuntáiste ollmhór toisc nach raibh sé d’acmhainn ag a bhfeachtais dul san iomaíocht leis an mórphobal Béarla. Foilseofar eolas maidir leis an bpróiseas athbhreithnithe sna seachtainí amach romhainn, agus beimid ag súil leis go mbeidh sé ag tacú le forbairt na hearnála, de réir gealltanais an Stáit sa Straitéis 20-Bhliain don Ghaeilge.
Roinnfear gach eolas maidir leis na feachtais le scoileanna nua a bhunú agus le cóiríocht chuí a éileamh do na scoileanna reatha ar www.gaeloideachas.ie agus ar na meáin shóisialta. Deir Anna Ní Chartúir, Uachtarán na heagraíochta, “beimid ag súil leis go gcuirfí le líonmhaireacht agus láidreacht na scoileanna lán-Ghaeilge sna blianta beaga amach romhainn”.
42 scoil nua le hoscailt sna blianta amach romhainn
Aibreán 13, 2018
Fáiltíonn Gaeloideachas roimh fhógra na Roinne Oideachais agus Scileanna go mbeidh scoileanna nua le bunú sna blianta amach romhainn, agus táimid an-dóchasach go mbeidh scoileanna lán-Ghaeilge ina measc. Roinnfear gach eolas anseo sna seachtainí romhainn maidir leis an bpróiseas a bheidh ann le pátrúin agus sainmheoin na scoileanna nua seo a aithint. Tá foireann na heagraíochta ar fáil i gcónaí le fiosrúcháin ónar mbaill, pobal na scoileanna i gcoitinne agus ó thuismitheoirí a fhreagairt, ní gá ach teagmháil a dhéanamh linn.
Suirbhé do Mhúinteoirí Bunleibhéil maidir leis an gCóras Lán-Ghaeilge
Aibreán 10, 2018
Tá Dr Maria Coady, Ollscoil Florida, i mbun taighde faoi láthair ar dhearcthaí múinteoirí bunleibhéil maidir le múineadh i scoil lán-Ghaeilge/Ghaeltachta. Tá suirbhé gearr le líonadh anseo & tá deis iPad a bhuachan.
Athbhreithniú agus Athfhorbairt ar Churaclam na Bunscoile
Aibreán 10, 2018
Tá an CNCM ag obair ar na chéad chéimeanna tábhachtacha eile in athfhorbairt Churaclam na Bunscoile faoi láthair. Mar chuid de seo, tabharfaidh an CNCM cuireadh do scoileanna Fóram Scoileanna a bhunú. Cuirfidh Fóram na Scoileanna smaointe agus moltaí ar fáil maidir leis an gcuma a d’fhéadfadh a bheith ar an gcuraclam agus maidir leis na nithe a d’fhéadfadh a bheith ann i dtaca le teagasc agus foghlaim sna blianta atá amach romhainn. Bheadh an-áthas ar an CNCM cloisteáil uait má tá suim ag do scoil páirt a ghlacadh i bhFóram na Scoileanna. Cuirfear réimse tacaíochtaí ar fáil don scoil mar chuid den obair. Má tá suim agat ann agus má tá tuilleadh eolais uait, seol na sonraí seo a leanas chuig primarydevelopments@ncca.ie:
- Ainm na scoile
- Ainm phríomhoide na scoile
- Seoladh ríomhphoist agus uimhir ghutháin
Déanfaidh an CNCM teagmháil leat ansin agus beidh tuilleadh sonraí aici faoina mbeidh i gceist leis an bhfóram.
Breis eolais anseo
Comórtas suimiúil á reáchtáil ag Fiontar/Logainm.ie d’iar-bhunscoileanna
Aibreán 9, 2018
Comórtas suimiúil á reáchtáil ag Fiontar/Logainm.ie d’iar-bhunscoileanna
Tá foireann Mheitheal Logainm.ie ag tabhairt cuireadh do dhaltaí iar-bhunscoileanna sonraí maidir le mionainmneacha i gceantar na scoile (nó in aice le háit chónaithe na ndaltaí) a ionchur ar Mheitheal Logainm.ie. Cuirfear na bailiúcháin is fearr ar phríomhleathanach an tsuímh agus déanfar iad a phoibliú ar na meáin shóisialta. Cuirfear duaiseanna de luach €300 agus €150 ar fáil don dá bhailiúchán is fearr.Spriocdháta: an 20 Aibreán 2018.
Tá gach eolas maidir leis an gcomórtas ar fáil anseo
Preasráiteas: Tacaíocht an Aire Oideachais do na scoileanna lán-Ghaeilge sa reachtaíocht maidir le polasaithe iontrála
Aibreán 4, 2018
|
Folúntais i nGaelcholáiste Dhoire
Aibreán 4, 2018
Is meánscoil lán-Ghaeilge nuabhunaithe é Gaelcholáiste Dhoire atá ar tí an ceathrú hiontógáil daltaí a ghlacadh isteach i Meán Fómhair 2018. Tá múinteoir sinsearach agus triúr múinteoirí á lorg ag Gaelcholáiste Dhoire le bheith mar chuid d’fhoireann dhíograiseach, dhinimiciúil agus spreagúil.
Gach eolas: Folúntais GCD 2018
PREASRÁITEAS: FÁILTÍONN GAELOIDEACHAS ROIMH NA TACAÍOCHTAÍ A BHEIDH AR FÁIL DO SCOILEANNA GAELTACHTA FAOIN SCÉIM AITHEANTAIS.
Márta 29, 2018
LE FOILSIÚ LÁITHREACH: 29 MÁRTA 2018
Fáiltíonn Gaeloideachas roimh eisiúint an chiorcláin maidir leis an gcéad chéim fheidhmithe eile a bhaineann leis an scéim aitheantais do scoileanna Gaeltachta don tréimhse Aibreán 2018 – deireadh na scoilbhliana 2018/2019. Leagtar amach na tacaíochtaí a bheidh ar fáil do scoileanna, idir deontas d’acmhainní, forbairt ghairmiúil leanúnach bhreise agus uaireanta breise do thacaíocht teanga na Gaeilge.
Fáiltítear freisin roimh an deis atá curtha ar fáil do scoileanna nár chláraigh leis an scéim go fóill léiriú spéise a chur isteach le bheith páirteach sa scéim aitheantais agus a bheith incháilithe chun na hacmhainní agus tacaíochtaí céanna a fháil ar aon dul le scoileanna atá páirteach sa scéim cheana.
Gealltar uaireanta breise páirtaimseartha do thacaíocht theanga na Gaeilge sa chiorclán nua – tacaíocht a bhí lárnach d’éilimh na scoileanna agus iad ag clárú don scéim aitheantais. Cé go bhfáiltítear go mór roimh na n-uaireanta breise, tá an méid is lú tacaíochta (5 uair an chloig sa tseachtain sa bhunscoil) geallta do na scoileanna is lú (faoi bhun 54 dalta sa bhunscoil), rud a dhéanann cur i bhfeidhm an luath-thumoideachais sna scoileanna beaga níos dúshlánaí, mar aon leis an tacaíocht idirdhealaithe idir cainteoirí dúchais agus foghlaimeoirí. Ag an iar-bhunleibhéal, cuirfear idir 7-10 n-uair an chloig bhreise teanga ar fáil de réir méid na scoile, tacaíocht a fháilteofar go mór roimhe. Tacaíonn Gaeloideachas le héileamh na scoileanna go mbeadh forbairt ghairmiúil leanúnach ar fáil ar bhonn inseirbhís uile scoile ag an iar-bhunleibhéal chun tuiscintí agus saineolas ar an tumoideachas a chur chun cinn thar pobal teagaisc na scoile ar fad.
Agus í ag caint faoi na scoileanna beaga i gcomhthéacs na scéime, deir Anna Ní Chartúir, Uachtarán Gaeloideachas, “Cé go bhfáiltím go mór roimh na tacaíochtaí breise seo do na scoileanna uile, ní mór dúinn a bheith feasach faoi shuíomh leochaileach na scoileanna beaga agus a thógáil san áireamh gur scoileanna beaga idir 2-3 oidí formhór na scoileanna Gaeltachta, agus iad suite sna ceantair is láidre Gaeltachta go hiondúil. Bíonn brú ach go háirithe ar na scoileanna seo, atá i mbun ilranganna a theagasc ó thaobh na naíonáin a scarúint ó Rang 1 agus 2 do theagasc an Bhéarla agus beidh dúshláin leanúnacha ann le sárú”.
Molann Gaeloideachas go mbeadh cead ag na scoileanna na huaireanta a chnuasú le huaireanta tacaíochta foghlama agus acmhainne chun poist a chruthú ina aon scoil amháin chun go mbeidh leanúnachas ann do na páistí agus don mhúinteoir, ach an dúshlán a shárú múinteoirí leordhóthanacha a bheith ar fáil le hinniúlacht chuí sa teanga le teagasc i scoil Ghaeltachta.
Déanann Gaeloideachas comhghairdeas mór leis na dá institiúid a bronnadh conarthaí orthu le tabhairt faoi sholáthar cláir nua oideachais mhúinteoirí trí mheán na Gaeilge. Fáiltíonn an eagraíocht go mór roimh an dea-scéal go mbeidh Institiúid Oideachais Marino ag cur tús le clár oiliúna ceithre bliana do bhunmhúinteoirí Meán Fómhair 2019 agus go mbeidh máistreacht san oideachas lán-Ghaeilge á sholáthar ag Coláiste Mhúire Gan Smál.
Tréaslaíonn an eagraíocht leis an dá institiúid agus iad ag léiriú ceannasaíochta i bhforbairt chlár ceannródaíocha a dhíreoidh go huile is go hiomlán ar shainriachtanais na hearnála lán-Ghaeilge agus Gaeltachta.
CRÍOCH.
Teagmháil
Anna Ní Chartúir, Uachtarán, Gaeloideachas
085-1651097
Bláthnaid ní Ghréacháin, Ardfheidhmeannach, Gaeloideachas
01-8535190 | 086 8050335 | blathnaid@gaelscoileanna.ie
Seán Ó hArgáin, OCP, Gaeloideachas
087-4192322
Facebook @Gaeloideachas |Twitter @Gaeloid
www.gaeloideachas.ie
Gaeloideachas
Áirítear i measc róil agus feidhmeanna na heagraíochta comhairle, cúnamh agus tacaíocht do dhaoine ar mian leo oideachas lán-Ghaeilge dá bpáistí, mar aon le seirbhís tacaíochta do naíonraí agus scoileanna.
