Dianchúrsa Gaeilge do mhúinteoirí iar-bhunscoile Gaeltachta agus lán-Ghaeilge
Bealtaine 13, 2010
Tá áthas ar COGG a fhógairt go bhfuil dianchúrsa Gaeilge do mhúinteoirí iar-bhunscoile Gaeltachta agus lán-Ghaeilge á eagrú arís i mbliana. Tá an cúrsa a reáchtáil i gcompháirtíocht le Gaelchultúr Tta. Níl aon táille le híoc ar an gcúrsa.
Ionad: Coláiste de hÍde, Bóthar Thigh Motháin, Tamhlacht, Baile Átha Cliath 24.
Dátaí: 16-20 Lúnasa 2010 ( Luan-Aoine)
Am: 9.30am- 3.30pm
Ábhar an chúrsa:
Dianchúrsa Gaeilge leis na múinteoirí a ullmhú d’fheidhmiú trí Ghaeilge sa scoil- i seomra na foirne, le daltaí timpeall na scoile, le tuismitheoirí.
Scríobh na Gaeilge maidir le litreacha/nótaí/fógraí.
Gaeilge ábhar bunaithe don teagasc- téarmaíocht, cur i láthair ceachtanna, nótaí teagaisc agus eile.
Tá foirm chláraithe iniata leis seo agus bheinn buíoch díot ach cóipeanna de a scaipeadh i measc na foirne. Is féidir é a sheoladh ar ais chuig COGG, 22 Plás Mhic Liam, BÁC 2 nó ar facs chuig 01 634 1002 nó is féidir an fhoirm a íoslódáil ó www.cogg.ie agus a sheoladh ar ríomhphost chuig eolas@cogg.ie
Feachtas le hábhar nua Gaeilge a chur ar fáil don Ardteist
Bealtaine 12, 2010
TUARASCÁIL: TÁ FEACHTAS láidir ar bun chun tabhairt ar an Roinn Oideachais agus Scileanna ábhar nua, Litríocht agus Saíocht na Gaeilge, a chur ar fáil don Ardteistiméireacht.
Chun a míshástacht leis an “chéim síos” don litríocht san Ardchúrsa Gaeilge a chur in iúl don Aire Oideachais chomh maith le polaiteoirí eile, oideachasóirí, lucht tríú leibhéal agus daoine eile ar spéis leo todhchaí na teanga, bunaíodh Meitheal Ghaeilge ATAL, ar a bhfuil ionadaithe ó Ghaelscoileanna, Eagraíocht na Scoileanna Gaeltachta agus Comhairle Oideachais Gaeilge agus Ghaeltachta.
Ba mhian le Meitheal go ndéanfadh freastal ceart ar dhaltaí na Gaeltachta agus na scoileanna lán-Ghaeilge agus ar scoláirí ar mian leo staidéar ceart a dhéanamh ar an nGaeilge. Tá 95 faoin gcéad de na múinteoirí Gaeilge sna coláistí lán-Ghaeilge ag tacú leis an éileamh.
Is í Áine Ní Ghallchóir ó Ionad na dTeangacha Nua in Ollscoil na hÉireann Maigh Nuad atá ina cathaoirleach ar Mheitheal. Dar leis an ghrúpa “ní aithníonn an siollabas nua Gaeilge go bhfuil cainteoirí ó dhúchas, daltaí na Gaelscolaíochta ná daltaí cumasacha agus díograiseacha eile ann ar féidir leo agus ar mian leo caighdeán ard maidir le teanga agus saíocht na Gaeilge a bhaint amach ag deireadh an dara leibhéal oideachais”.
Tá siad den tuairim go ndéanfaidh sé “dochar don Ghaeilge, mar theanga phobail, mar ábhar scoile agus mar ábhar acadúil muna gcuirtear clár níos téagartha ar fáil go comhuaineach leis an siollabas seo”.
Tá Meitheal ag éileamh ar an Roinn Oideachais imlitir 20/2010 a tharraingt siar nó ábhar nua – Saíocht agus Litríocht na Gaeilge – a chur ar fáil agus an ceart ag gach dalta an t-ábhar breise seo a dhéanamh in éineacht leis an nGaeilge agus 200 pointe a bheith ar fail dó.
I litir a chuir Meitheal amach chuig na scoileanna iarbhunleibhéil lán-Ghaeilge iarradh ar na múinteoirí Gaeilge aiseolas a thabhairt faoi leasuithe an Roinn Oideachais ar an siollabas agus a dtuairimí faoin chúrsa nua, atá á éileamh ag Meitheal, a chur in iúl. Tá 90 faoin gcéad acu den tuairim nach bhfuil dóthain dúshláin ag baint leis an chúrsa nua. Tá os cionn 90 faoin gcéad míshásta le gach gné den chúrsa agus deir 95 faoin gcéad acu gur mhaith leo ábhar nua.
Ó d’eisigh an Roinn Oideachais an siollabas leasaithe do scrúdú Gaeilge na hArdteistiméireachta i lár mhí an Mhárta tá míshásamh léirithe ag eagraíochtaí éagsúla agus ag daoine aonair, an tAire Gaeltachta Pat Carey ina measc, faoin laghdú suntasach ar an litríocht sa chúrsa, go mórmhór sa chúrsa ardleibhéil.
Sa siollabas nua, a bheidh i bhfeidhm ó mhí Mheán Fómhair seo chugainn, agus a ndéanfar scrúdú air i 2012, beidh 40 faoin gcéad de na marcanna ag dul don bhéaltriail agus 10 faoin gcéad eile don triail chluastuisceana. Tá an cúrsa litríochta gearrtha siar do shleachta gearra as saothair phróis agus roinnt dánta agus gan ach 16 faoin gcéad de na marcanna ag dul dó.
Tá laghdú ar líon na bhfocal atá le scríobh san aiste ó 600 focal go 400 focal agus deireadh le Stair na Gaeilge. Ciallaíonn na hathruithe seo go bhféadfadh duine pas, nó fiú Grad C, a fháil san Ardchúrsa Gaeilge ar chumas cainte agus tuisceana amháin.
Agus daltaí ar thóir pointí do chúrsaí tríú léibhéal is beag spreagadh atá sa chúrsa chun forbairt a dhéanamh ar scríobh agus léamh na teanga agus tuiscint cheart a fháil ar oidhreacht liteartha na Gaeilge.
IS í Fíona Uí Uiginn, múinteoir Gaeilge i gColáiste Íosagáin agus ball de Bhord Stiúrtha Ghaelscoileanna, rúnaí Mheitheal agus tá taithí 30 bliain aici ag múineadh Gaeilge i scoileanna éagsúla.
“Ní fheileann an cúrsa litríochta atá sa siollabas leasaithe do dhaltaí na Gaeltachta ná na nGaelcholáistí toisc nach bhfuil dóthain litríochta ann ná aon dúshlán ag baint leis an méid atá ann,” a dúirt sí le Tuarascáil. “Ar an drochuair, níor thapaigh an Roinn Oideachais an deis leasú a dhéanamh ar an siollabas litríochta áit a raibh géarghá leis. Tá an méid céanna litríochta le clúdach ag na daltaí seo fós ach tá laghdú suntasach ar an méid atá le déanamh ag an dalta ardleibhéil.
“De bharr na n-athraithe seo fágfaidh na scoláirí an scoil gan aon tuiscint acu ar an saibhreas liteartha atá sa Ghaeilge ná aon tuiscint ar oidhreacht liteartha agus chultúrtha na teanga. Cruthóidh sé sin fadhb mhór dóibh siúd gur mian leo leanacht leis an nGaeilge ag an tríú leibhéal.
“Ní bheidh na scileanna i léamh agus scríobh na teanga acu a mbeifí ag súil leo ag leibhéal na hollscoile. Níos measa ná sin ní bheidh na scileanna teanga ag na scoláirí sna scoileanna Gaeltachta nó sna Gaelcholáistí le tabhairt faoi ábhair mar Stair, Eacnamaíocht, Tíreolas, Gnó ag leibhéal na hArdteistiméireachta. Ní chreidim gur féidir linn na scileanna sin a thabhairt dóibh leis an siollabas seo.”
Is trí Bhéarla a dhéantar an teagasc in 85 faoin gcéad de na scoileanna iarbhunleibhéil sa Stát agus, ag cruinniú a d’eagraigh Comhar na Múinteoirí Gaeilge i mBaile Átha Cliath le déanaí, thug formhór na múinteoirí a bhí i láthair le fios go raibh siad sásta leis an siollabas nua. Bhí ionadaithe ón eagras ar an ghrúpa a dhréachtaigh an siollabas nua.
Dúirt Anna Davitt, príomhfheidhmeannach Chomhar na Múinteoirí Gaeilge go raibh a lán de na múinteoirí den tuairim go raibh an iomarca litríochta ar an chúrsa roimhe seo. Ag an am céanna tuigeann an t-eagras go bhfuil gá le cúrsa a mbeadh níos mó téagair ann do dhaltaí a bhfuil ardleibhéal Gaeilge acu agus tacaíonn an eagraíocht le héileamh Mheitheal ábhar nua, Saíocht agus Litríocht na Gaeilge, a chur ar fáil.
Tugann Mícheál Ó Ruairc cúrsaí do mhúinteoirí ar fud an Stáit ar son Chomhar na Múinteoirí Gaeilge agus deir sé gurb í tuairim thromlach na múinteoirí a fhreastlaíonn ar na cúrsaí go bhfuil an siollabas nua níos fearr ná an an ceann a bhí ann.
Chuir an méid a bhí le scríobh faoin litríocht agus san aiste a lán daltaí ó dhoras, a dúirt sé agus is é an toradh a bhí air gur roghnaigh siad an t-ardchúrsa a dhéanamh in ábhar eile.
B’údar imní dóibh, áfach, a laghad ama (15 nóiméad) atá leagtha síos don bhéaltriail agus 40 faoin gcéad de na marcanna ag dul dó.
Cé go bhfáiltíonn Meitheal roimh an bhéim ar an teanga bheo sa siollabas nua is údar imní dóibh nach léir, go dtí seo, cén córas monatóireachta a bheidh i bhfeidhm chun cumas cainte na ndaltaí a mheas sa bhéaltriail. Go dtí seo níl aon treoir tagtha ón Roinn Oideachais faoi sin.
Faoi láthair, déanann daltaí idirbhliana i roinnt scoileanna an scrúdú cainte, a eagraíonn Ionad na dTeangacha Nua i Maigh Nuad ar a dtugtar Teastas Eorpach na Gaeilge (TEG).
Tá córais mheasúnachta TEG ceangailte leis an bhfráma comónta Eorpach a mhol Coimisiún na hEorpa i 2001 chun gur féidir cumas cainte an fhoghlaimeora i dteanga Eorpach amháin a chur i gcomparáid lena chumas i dteanga Eorpach eile.
Irish Times – MÁIRÉAD NÍ CHINNÉIDE
Tacaíocht na Comhairle á lorg ar cheist na Gaelscoile
Bealtaine 10, 2010
Cuirfear dlús faoin bhfeachtas ‘Aitheantas’ inniu nuair a mholfar rún ag cruinniú de chuid Chomhairle Chontae na Mí ag moladh agus ag tacú le Coiste Bunú Gaelscoil Ráth Tó.
Tá sé mar sprioc ag an bhfeachtas tacú le hiarrachtaí an choiste áitiúil, gaelscoil a chur ar bun sa cheantar in ainneoin gur dhiúltaigh an Roinn Oideachais aitheantas oifigiúil a thabhairt do ghaelscoileanna nua i mbliana.
Is é an rún a bheidh á moladh ná go dtacaíonn agus molann Comhairle Contae na Mí an obair déanta ag Coiste Bunú Gaelscoil Ráth Tó agus éilíonn an Comhairle ar an Aire Oideachais agus Scileanna aitheantas a thabhairt láithreach do Ghaelscoil Ráth Tó a bheidh ag oscailt i mí Meán Fómhair 2010.
Chuir Conradh na Gaeilge, Glór na nGael, Comhluadar, An Foras Pátrúnachta agus Gaelscoileanna tús leis an bhfeachtas nua lena chinntiú go n-aithneofar Gaelscoil Ráth Tó agus go n-úsáidfidh an Roinn Oideachas agus Eolaíochta soláthar an ghaeloideachais mar chritéir agus iad ag roghnú áiteanna do scoileanna nua.
Tá súil ag an gCoiste áitiúil ranganna scoile a reáchtáil go sealadach san fhoirgneamh atá ag an Cumann Lúthchleas Gael sa bhaile ón gcéad lá de mhí Mheán Fómhair agus táthar ag tiomsú airgid i láthair na huaire. Cuireadh tús le feachtas earcaíochta d’fhoireann na scoile le déanaí chomh maith.
Tacaíocht do Ghaelscoil Ráth Tó
Bealtaine 6, 2010
Tá sé fógartha ag cúig eagraíocht Gaeilge go bhfuil siad ag teacht le chéile i gcomhfhiontar chun tacú le Gaelscoil nuabhunaithe. D’fhógair Conradh na Gaeilge, Glór na nGael, Comhluadar, An Foras Pátrúnachta agus Gaelscoileanna go bhfuil siad aontaithe ar thacaíocht a sholáthar do Choiste bunaithe Gaelscoil Ráth Tó.
Beidh an feachtas seo, ‘Aitheantas’ ag obair lámh i lámh lena chinntiú go n-aithneofar Gaelscoil Ráth Tó agus go n-úsáidfidh an Roinn Oideachas agus Eolaíochta soláthar an gaeloideachas mar chritéir agus iad ag roghnú áiteanna do scoileanna nua. Dhiúltaigh an Roinn Oideachas agus Scileanna aitheantas a bhronnadh ar an scoil i mbliana cé go bhfuil sé ráite ag an Roinn go bhfuil gá le soláthar oideachas breise ar an mbaile. Tá an Roinn ag déanamh neamhairde ar mhianta thuismitheoirí Ráth Tó agus neamhaird ar an éileamh d’oideachas lánGhaeilge.
Ag labhairt faoin bhfeachtas seo dúirt Lorcán Mac Gabhann, Glór na nGael, gur “cheist náisiúnta agus áitiúil atá sa diúltú seo. Níor osclóidh Gaelscoil nua ó 2008. Tá an cuma ar an scéal nach bhfuil an Roinn sásta an Ghaeilge a aithint mar chuid den mheasúnú ar sholáthar oideachas.”
D’fháiltigh Cathaoirleach an Choiste Bunaithe, Seán Ó Buachalla, roimh an tacaíocht agus é ag rá “ tá an-obair romhainn ag cinntiú go mbeidh gaelscolaíocht ar fáil do phobal Ráth Tó agus thug seasamh phobal na Gaeilge spreagadh ollmhór do na tuismitheoirí.”
Tá sé beartaithe ag na heagraíochtaí gach tacaíocht a thabhairt do phobal Ráth Tó agus iad ag troid ar son chearta tuismitheoirí freastal mar ba chóir a fháil ón Roinn.
Osclóidh Gaelscoil Ráth Tó, gan aitheantas, ar 1 Meán Fómhair i CLG Ráth Tó, Páirc Seán Eiffe, Ráth Tó, Co. na Mí.
Galway Advertiser
6 Bealtaine 2010
Parents to press ahead with Gaelscoil in Ratoath despite Department’s ‘no’
Bealtaine 6, 2010
‘Ní gá scoil nua’
Bealtaine 5, 2010
NÍ GHÉILLFIDH an Roinn Oideachais agus Eolaíochta d’fheachtas Ghaelscoil Ráth Tó, Co na Mí, agus aitheantas oifigiúil a bhronnadh uirthi i mbliana.
D’eisigh an Roinn ráiteas i mBéarla leis an cholún seo, á rá, de bharr go raibh anailís déanta acu ar “pupil numbers for September this year and of the capacity in existing schools it was not necessary to establish a new school in Ratoath to cater for the demographic increase”. Bhí an Roinn sásta go dtiocfadh leis na scoileanna a bhí ann freastal a dhéanamh ar riachtanais oideachais faoi láthair agus go ndéanfaí an cás a athscrúdú i 2011.
Tugadh le fios i ráiteas na Roinne go raibh “pivotal role” ag an bhunoideachas “in the preservation and expansion of the first official language. The promotion of the Irish language has been an important aim of successive Irish Governments and its place in our education system has been consistently protected”.
Bhí athbhreithniú ar siúl ar an dóigh le bunscoileanna nua a bhunú agus ní raibh rún ag an Roinn scoil nua ar bith a bhunú go dtí go mbeadh an obair sin déanta “except in places where new schools are warranted because of increased demographics”.
Tá daltaí na scoile le dul i mbun ranga fómhar na bliana seo agus tá an grúpa, Aitheantas, i mbun feachtais le haitheantas oifigiúil a fháil don scoil, a cás a phoibliú agus le hairgead a bhailiú di.
The Irish Times – Wednesday, May 5, 2010
Diúltaíonn an Roinn aitheantas a thabhairt do Ghaelscoileanna nua
Bealtaine 5, 2010
Tháinig fás agus forbairt ar earnáil na Gaelscolaíochta in Éirinn le scór bliain anuas ach anois tá eagrais Ghaeilge buartha go bhfuil An Roinn Oideachais ag cur laincise ar fhorás na hearnála amach anseo.
Is ceist í seo a d’ardaigh Pádraig Mac Fhearghusa, Uachtarán Chonradh na Gaeilge nuair a labhair sé ag Ard-Fheis Chonradh na Gaeilge coicís ó shin i gCathair Luimnigh. Is é cás na Gaelscoile nua i Ráth Tó i gCo. na Mí a spreag cuid mhaith den chaint seo. Dhiúltaigh an Roinn aitheantas oifigiúil a thabhairt don scoil i mbliana. Tá fógartha ag cúig eagraíocht Ghaeilge go bhfuil tús curtha le feachtas nua dar teideal ‘Aitheantas’ lena chinntiú go n-aithneofar Gaelscoil Ráth Tó agus go n-úsáidfidh an Roinn Oideachas agus Eolaíochta soláthar an ghaeloideachais mar chritéir agus iad ag roghnú áiteanna do scoileanna nua.
Dhiúltaigh an Roinn aitheantas a thabhairt do ghaelscoileanna nua i mbliana ar an mbonn nach raibh na scoileanna ag sásamh critéir nua de chuid na Roinne maidir le córais phleanála. D’fháiltigh Cathaoirleach an Choiste Bunaithe, Seán Ó Buachalla, roimh an tacaíocht agus luaigh sé go mbeidh an Coiste áitiúil ag obair go dian chun airgead a thiomsú don scoil a bhunófar i Mí Mheán Fómhair gan aitheantas. Táimid dóchasach a deir Ó Buachalla. Labhraíomar cheana le bunaitheoirí na Gaelscoileanna eile a raibh fadhbanna mar sin acu. D’éirigh leo sa deireadh stádas a bhaint amach agus táimid dóchasach go n-éireoidh leis an gcoiste an t-aitheantas céanna a bhaint amach go luath.
Foinse
5 Bealtaine 2010
Changes may be considered to Irish curriculum
Bealtaine 5, 2010
An Ghaelscolaíocht faoi bhagairt
Bealtaine 4, 2010
Tháinig fás agus forbairt ar earnáil na Gaelscolaíochta in Éirinn le scór bhliain anuas ach anois tá riar maith de na heagrais Ghaeilge buartha go bhfuil An Roinn Oideachais ag cur laincise ar fhorás na hearnála amach anseo.
Is ceist í seo a d’ardaigh Pádraig Mac Fhearghusa, Uachtarán Chonradh na Gaeilge nuair a labhair sé ag Ard-Fheis Chonradh na Gaeilge coicís ó shin i gCathair Luimnigh.
Tá sé i gceist ag ardstátseirbhísigh sa Roinn “an Ghaeilge a ruaigeadh as an gcóras stáit má ligtear leo”, dar leis.
Is é cás na gaelscoile nua i Ráth Tó i gCo. na Mí a spreag cuid mhaith den chaint seo. Dhiúltaigh an Roinn aitheantas oifigiúil a thabhairt don scoil i mbliana.
Dúirt Mac Fherghusa gur mór an náire é nár thug an Roinn aitheantas do ghaelscoileanna nua i mbliana agus gur “ mithid do phobal uile na Gaeilge troid go fíochmhar i gcoinne an naimhdeas seo agus tacú lena leithéid de Ghaescoil Ráth Tó atá ag oscailt gan aitheantas i Meán Fómhair.”
Dhiúltaigh an Roinn aitheantas a thabhairt do ghaelscoileanna nua i mbliana ar an mbonn nach raibh na scoileanna ag sásamh critéir nua de chuid na Roinne maidir le córais phleanála.
An tseachtain seo caite d’fhógair cúig eagraíocht Gaeilge go raibh tús curtha le feachtas nua dar teideal ‘Aitheantas’ lena chinntiú go n-aithneofar Gaelscoil Ráth Tó agus go n-úsáidfidh an Roinn Oideachas agus Eolaíochta soláthar an ghaeloideachais mar chritéir agus iad ag roghnú áiteanna do scoileanna nua.
D’fháiltigh Cathaoirleach an Choiste Bunaithe, Seán Ó Buachalla, roimh an tacaíocht ag rá “ tá an-obair romhainn ag cinntiú go mbeidh gaelscolaíocht ar fáil do phobal Ráth Tó agus thug seasamh phobal na Gaeilge spreagadh ollmhór do na tuismitheoirí.”
Luaigh sé go mbeidh an Coiste áitiúil ag obair go dian chun an t-airgead a tiomsú don scoil a bhunófar i Mí Meán Fómhair gan aitheantas. Is ábhar imní do choiste na scoile nach bhfuil an Roinn ag déanamh idirdhealú ar éileamh a bhíonn ann ar scoileanna Béarla agus ar scoileanna Gaeilge.
Beidh na heagraíochtaí ag déanamh stocaireachta ar bonn náisiúnta ar son na scoile agus cheana féin tá tacaíocht faighte ag an scoil ó chomhairleoirí áitiúla.
“Táimid dóchasach” a deir Seán. “ Labhraíomar cheana le bunaitheoirí na Gaelscoileanna eile a raibh fadhbanna mar sin acu. D’éirigh leo sa deireadh stádas a bhaint amach agus táimid dóchasach go n-éireodh leis an gcoiste an t-aitheantas céanna a bhaint amach go luath”.
©www.gaelport.com 04 Bealtaine 2010
Dianchúrsa Breise ag Forbairt Naíonraí Teo.
Aibreán 30, 2010
Beidh Forbairt Naíonraí Teoranta ag cur Dianchúrsa d’ábhar Stiúrthóirí Naíonraí ar fáil ag deireadh mhí Bealtaine 2010 i mBaile Átha Cliath.
Ó tharla an oiread sin éileamh ar an Dianchúrsa d’ábhar Stiúrthóirí Naíonraí i mbliana, beidh Forbairt Naíonraí Teo. ag cur Dianchúrsa eile ar fáil ar an 24-28 Bealtaine 2010, Luan go Aoine idir 9.00-5.00i.n.. Beidh an dianchúrsa ar siúl i lár na Cathrach i mBaile Átha Cliath. Is é seo an buncháilíocht atá ag teastáil ó FNT le feidhmiú mar Stiúrthóir Naíonra.
Beidh agallamh Gaeilge le déanamh acu siúd gur mhian leo freastal ar an Dianchúrsa seo chun caighdeán Gaeilge na hiarrthóirí a áireamh. Beidh na hagallaimh Gaeilge ar siúl i mBaile Átha Cliath ar an 11 agus 12 Bealtaine, 2010 in Institiúid Oideachais Marino, Ascaill Uí Ghríofa, Baile Átha Cliath 9.
Is bunchúrsa é seo, trí mheán na Gaeilge, i mbainistíocht agus reáchtáil Naíonraí d’ábhar Stiúrthóirí Naíonraí nó d’éinne le Gaeilge líofa a bhfuil spéis acu Gaeilge a úsáid le páistí óga. Is cúrsa éigeantach é d’éinne atá ag iarraidh naíonra a bhunú faoi Forbairt Naíonraí Teo. Faoi láthair tá 156 naíonraí cláraithe le Forbairt Naíonraí Teo agus tá os cionn 3,500 leanaí ag freastal ar sheirbhísí chúram leanaí trí Ghaeilge.
Dúirt Clíona Frost, Ard-Fheidhmeannach FNT,
“Tá an-áthas orm go bhfuil an borradh seo le feiceáil sna naíonraí Gaelacha. Léiríonn an tionchar atá ár naíonraí Gaelacha buanaithe á imirt sa phobal agus an nasc atá á chothú acu leis na gaelscoileanna fud fad na tíre, go bhfuil branda an Naíonra ag treisiú.”
Lean Frost,
“Is léir go bhfuil tuismitheoirí anois ag aithint buntáistí an Luath-Thumoideachais Iomlán agus iad ag roghnú réamhscolaíocht lán-Ghaeilge dá bpáistí.”
Tá Forbairt Naíonraí Teoranta ag obair go leanúnach leis na príomheagraíochtaí deonacha Gaeilge eile ar chur chun cinn na teanga agus ar chúram agus oideachas leanaí trí mheán na Gaeilge, ach go háirithe sa suíomh luath-thumoideachais.
Tuilleadh eolais:
Clíona Frost
01 853 5101
Nóta don Eagarthóir:
Is cuideachta dheonach uile-Éireann í Forbairt Naíonraí Teoranta, a thacaíonn le seirbhísí, cúram is oideachas trí Ghaeilge a chur chun cinn do pháistí ó aois an chliabháin ar aghaidh. Cuireann Forbairt Naíonraí Teoranta tacaíocht ar fáil chun na seirbhísí trí Ghaeilge seo thíos a bhunú, a bhuanú agus a riaradh: naíolanna, naíonraí, seirbhísí aois scoile, campaí samhraidh, agus grúpaí tuismitheoirí/caomhnóirí agus leanaí.
