Aifreann Gaeilge na Nollag
Nollaig 19, 2014
Craolfar Aifreann ar RTÉ Raidio na Gaeltachta ó Aireagal an Aiséirí na mBráthar Críostaí, Bóthar na Cille Móire, ARD AIDHIN, ag 11.00 i.n. Dé Domhnaigh 21 Nollaig. Cór Dhomhnach Cearna faoi stiúir Shorcha de Brún.
OÍCHE NOLLAIG: AIFRINN NA GINE 24/12/14
AIREAGAL AN AISÉIRÍ NA mBRÁTHAR CRÍOSTAÍ, Br.na Cille Móire, Ard Aidhin, BAC 5, 7.30 istoíche.
AN SEIPÉAL OLLSCOILE, Belfield, 9.00 istoíche.
Ocht scoil de chuid an Fhorais ar Liosta Tógála an Roinne do 2015
Nollaig 18, 2014
D’fhógair an tAire Oideachais agus Scileanna, Jan O’Sullivan, T.D., inniu go bhfuil sé i gceist ag an Roinn Oideachais tús a chur le hobair thógála ar 70 scoil sa bhliain 2015.
Tá ocht scoil de chuid an Fhorais Phátrúnachta ar an liosta tógála seo:
- Gaelscoil an Bhradáin Feasa, An Mhí
- Gaelscoil an Chuillinn, BÁC
- Gaelscoil Liatroma, Liatroim
- Gaelscoil Longfoirt, Longfort
- Gaelscoil Mhic Aodha, Cill Dara
- Gaelscoil Riabhach, Gaillimh
- Gaelscoil Ros Eo, BÁC
- Gaelscoil Thulach na nÓg, An Mhí
Dúirt Caoimhín Ó hEaghra, Ard Rúnaí ar an bhForas Pátrúnachta: “Cuireann sé an áthas ar an bForas Pátrúnachta go bhfuil foirgneamh buana nua fógartha do na scoileanna seo do 2015. Tá géarghá leo agus tá moladh le dul don Roinn as an obair atá ar siúl acu chun iad a sholáthar. Fós, tá scoileanna nach bhfuil cóiríocht chuí acu agus leanfaidh An Foras Pátrúnachta ar aghaidh ag obair leis an Roinn chun cóiríocht cheart a shocrú dóibh sa ghearrthéarma.”
Caithfear €450 milliún agus infreastruchtúr bunscoile agus meánscoile sa bhliain atá romhainn.
“Teastaíonn uainn scoileanna a mhéadú agus scoileanna nua a thógáil le freastal ar na riachtanais atá ag an daonra scoile, daonra atá ag fás,” arsa an tAire Oideachais.
“Is é an aidhm atá agam ná cinntiú go dóthain áiteanna scoile sa chóras oideachais agus go bhfuil fáil ag gach páiste ar cheann.”
70 Tionscadal Mór Tógála Scoile Á bhFógairt Ag An Aire Jan O’Sullivan Mar Chuid Den Phlean Cúig Bliana €2.2BN
Nollaig 18, 2014
Breis is 27,800 ionad buan scoile agus 3,500 jab lena soláthar leis na tionscadail
Inniu, d’fhógair an tAire Oideachais agus Scileanna, Jan O’Sullivan, T.D., na 70 tionscadal scoile atá sceidealaithe chun tógála in 2015.
I gclár infheistíochta caipitil €2.2 billiún a lainseáladh i mí Márta 2012, tugadh sonraí faoi 275 tionscadal mór nua tógála scoile a bhfuiltear chun tús a chur leo thar an tréimhse 2012-2016. In 2013, fógraíodh sonraí faoi 28 tionscadal mór scoile eile a bhí faofa chun dul ar aghaidh go dtí tairiscint agus tógáil.
Cuimsíonn fógra an lae inniu 16 tionscadal scoile eile a chuirfear in áit infreastruchtúir oideachais atá uireasach agus a mbeidh acmhainn bhreise iontu atá ag teastáil go géar chun an dúshlán déimeagrafach a shárú.
Caithfear €450 milliún ar infreastruchtúr bunscoile agus iar-bhunscoile an bhliain seo chugainn, caiteachas réamhaisnéiste de bhreis is €280 milliún de ar thionscadail ar scála mór.
Is iad na 70 tionscadal mór atá sceidealaithe chun dul ar aghaidh go dtí an tógáil in 2015 ná:
44 scoil nua ag an mbunleibhéal
11 síneadh ag an mbunleibhéal
5 scoil nua ag an dara leibhéal
8 síneadh ag an dara leibhéal
2 scoil speisialta nua
Tá breis is 27,800 ionad buan scoile i gceist leis na tionscadail seo agus is ionaid bhreise 23,700 díobh seo. Déanfar cóiríocht atá sealadach nó míshásúil a mhalartú ar an gcuid eile díobh.
Leis na tionscadail scoile atá fós ar siúl ó 2014, beidh iomlán de 196 tionscadal mór scoile ar an láithreán tógála an bhliain seo chugainn.
Ina theannta sin, dheimhnigh an tAire go bhfuil iomlán de 42 tionscadal mór scoile tugtha i gcrích nach mór in 2014.
Ag fógairt sonraí de chlár tógála 2015 di dúirt an tAire O’Sullivan, “Is breá liom inniu na tionscadail mhóra scoile a thógfar an bhliain seo chugainn a dheimhniú.”
“Chomh maith leis na 27,800 ionad buan scoile atá á gcur ar fáil, beidh an infheistíocht shonrach seo ina taca do tuairim is 3,000 jab díreach agus breis is 500 jab indíreach in 2015.”
Adúirt an tAire O’Sullivan freisin, “Tá scoileanna nua agus síntí móra ag teastáil go géar uainn d’fhonn freastal ar riachtanais chóiríochta na ndaltaí scoile againn a bhfuil a líon ag dul i méid.
“Tá méaduithe sonracha le teacht ar líon na ndaltaí scoile sna blianta romhainn amach. Táthar ag súil le fás de bheagnach 70,000 dalta ar an rollachán iomlán daltaí i mbunscoileanna agus in iar-bhunscoileanna araon idir seo agus 2017 – breis is 44,000 ag an mbunleibhéal agus 25,000 ag an iar-bhunleibhéal – agus beidh fás ag teacht air i gcónaí suas go dtí 2026 ar a laghad ag an dara leibhéal.”
“Is é is aidhm phríomha agam ná a chinntiú go mbíonn dóthain ionad cóiríochta scoile ann sa chóras oideachais chun a chinntiú go mbíonn rochtain ag gach páiste ar ionad fisiciúil scoile,” adúirt an tAire O’Sullivan mar fhocal scoir.
Tá fógra an lae inniu mar chuid de phlean an Rialtais breis is 100,000 ionad buan scoile a chur ar fáil i gcaitheamh an phlean cúig bliana.
De réir mar a bheidh an bhliain 2015 ag dul thart, measúnófar tionscadail a bhí sceidealaithe lena gcur chun tógála sna blianta amach romhainn féachaint an bhfuil siad réidh lena gcur chun tógála níos luaithe ná mar a bhí beartaithe, agus an bhfuil an acmhainn airgeadais ann chun déanamh amhlaidh.
Leanfar de na sonraí maidir leis na tionscadail mhóra go léir atá liostaithe sa Phlean Cúig Bliana a choinneáil agus a nuashonrú ar shuíomh gréasáin na Roinne, www.education.ie
Mary Coughlan ag Gaelscoil Lios na nÓg
Nollaig 15, 2014
Beidh ceolchoirm iontach speisialta don Nollaig ar siúl i nGalescoil Lios na nÓg, Raghnallach, Dé Céadaoin 17 Nollaig. Beidh Mary Coughlan ann agus í ag canadh, le Johnny Taylor ar an bpiano agus Barry O Donovan ar an olldord. Beidh an ceolchoirm ar siúl i halla na scoile, agus tá ticéidí ar fáil ar €15 an cheann ó oifig na scoile. An-oíche a mbeidh ann.
Bailiúcháin Éadaí Gaelscoil na Lochanna
Nollaig 15, 2014
Comhghairdeas leis na páistí agus tuismitheoirí ó Ghaelscoil na Lochanna, Cill Mhantáin, a bhailigh 703kg de sheanéadaí roimh Nollag chun airgead a bhailiú ar son na scoile.
Lá Geansaí Nollaig i nGaelscoil Thulach na nÓg
Nollaig 15, 2014
D’eagraigh Gaelscoil Thulach na nÓg, An Mhí, Lá Geansaí na Nollag le déanaí ina raibh ar na daltaí agus an fhoireann geansaithe Nollaig a chaitheamh. D’éirigh leo €500 a bhailiú ar an lá don charthanas Focus Ireland agus bhí an spóirt acu chomh maith!
Freastalaíonn Gaelcholáiste an Phiarsaigh ar Sheoladh Gmail as Gaeilge
Nollaig 15, 2014
Ba chúis mhór ríméid do scoláirí agus go deimhin d’fhoireann Ghaelcholáiste an Phiarsaigh cuireadh a fháil le freastal ar ócáid i gCeanncheathrú Google Déardaoin, an 11 Nollaig, nuair a seoladh Gaelmail nó gmail as Gaeilge go hoifigiúil.
Thug daltaí na scoile aghaidh ar Shráid na Bearú agus nuair a bhain siad foirgneamh Google amach cuireadh fearadh na fáilte rompu. Bhí ainm na scoile ag lonrú ar chéimeanna an staighre!
Casadh go leor daoine difriúla orthu ó dhomhan na Gaeilge agus ó dhomhan na meán cumarsáide. Nuair a chuaigh siad isteach sa léachtlann ollmhór ba léir go raibh Muintir Google iad féin chomh sceitimíneach faoin ócáid agus a bhí siad!
Labhair daoine difriúla ó Google agus iad ar fad ar a ndícheall le húsáid a bhaint as a gcuid Gaeilge, fear Ioruach ina measc! Labhair siad ar fad faoin logánú a dtugann Google faoi. Leag siad béim ar an tábhacht a bhain le comhlacht ar nós Google ag freastal ar theangacha agus ar chultúir éagsúla ar fud an domhain.
Ba é buaicphointe an lae ná nuair a cuireadh fáilte roimh Hector Ó hEochagáin chun an seoladh oifigiúil a dhéanamh. Ba mhór an spórt é ag labhairt agus go háirithe nuair a chuir sé Tráth na gCeist ar siúl.
Baineadh stangadh ceart as lucht an Ghaelcholáiste nuair a d’fhógair Hector gur bhuaigh duine de na daltaí, Orlaith Ní Cheallaigh, comórtas na bhfocal a raibh curtha isteach acu ar fad air tamall ó shin. Bhronn Hector Chrome Cast agus duaiseanna eile ar Orlaith.
D’éirigh leo turas timpeall an fhoirgnimh a eagrú agus bhain siad an-sult as. Gheall Hector dóibh go dtabharfadh sé cuairt ar an scoil sa bhliain nua, foirgneamh atá beagán difriúil le hais Google ach chomh hiontach céanna!
Tugann Seán Kelly, FPE, cuairt ar Gaelscoil Mhuscraí
Nollaig 15, 2014
Chuir Gaelscoil Mhuscraí, Corcaigh, fáilte roimh Seán Kelly, Feisire de Pharlaimint na hEorpa, chuig an scoil le déanaí. Bhronn sé dhá ghradam mór le rá ar an scoil – ‘Digital School of Distinction’ & Lipéad Eorpach eTwinning do thionscadail eTwinning na scoile: ‘Castles and History’ agus ‘Green Schools’.
Is aitheantas é an gradam digiteach d’iarrachtaí na scoile teicneolaíocht faisnéise agus cumarsáide a nascadh tríd an gcuraclam go héifeachtach. Labhair Seán Kelly le pobal na scoile faoina obair i bParlaimint na hEorpa agus bhí deis ag na paistí ceisteanna a chur air freisin.
Daltaí ó Ghaelcholáiste Phort Láirge i mbun ceoil in Ospidéal Ollscoil Phort Láirge
Nollaig 15, 2014
Ádh mór ar na daltaí ó Ghaelcholáiste Phort Láirge a bheidh i mbun ceoil in Ospidéal Ollscoil Phort Láirge amárach ag 1.30in. mar chuid den chlár ‘Healing Sounds’.
Amhráin Nollag Gaeilge le Coláiste Rath Tó agus Scoil Neasáin
Nollaig 15, 2014
Comhthionscadal le foireann na Gaeilge, Coláiste Rath Tó agus Scoil Neasáin. Amhrán Nollag – Ní Fada uainn an Nollaig.
