An tÁisaonad
Meitheamh 26, 2012
Bhí mé i mBéal Feirste an tseachtain seo agus bhuail mé isteach san Áisaonad.
Bunaíodh an tÁisaonad i1998 le háiseanna oideachais (áiseanna ilmheán chomh maith le háiseanna clóbhuailte) a sholáthar d’earnáil na Gaelscolaíochta, ar chomhchaighdeán agus ar chomhphraghas lena gcomhionann i mBéarla.
Tá an tÁisaonad lonnaithe i gColáiste Ollscoile Naomh Muire. Tá ceathrar d’fhoireann lánaimseartha san aonad, Gabhan Ó Dochartaigh ina measc.
As Doire é: d’fhreastail sé Coláiste Cholm Cille. Fuair sé an chéad áit i dTuaisceart Éireann i GCSE Gaeilge agus fuair sé an dara háit san A Leibhéal dhá bhliain níos moille.(Bhí drochlá aige an lá sin.) Fuair sé céim agus iarchéim sa Ghaeilge ina dhiaidh sin. Chaith sé roinnt blianta ag teagasc sula bhfuair sé post mar eagarthóir san Áisaonad. Múinteoir agus scoláire den scoth atá ann.
Tá Coiste Comhairliúcháin ag an Áisaonad a dhéanann monatóireacht ar a gcuid tionscadal agus tá fócusghrúpaí múinteoirí acu a bhíonn rannpháirteach i roghnú ábhar. Bíonn racháirt ollmhór ar fud na tíre ar an ábhar a chuireann siad amach. Cé go bhfuil obair an Áisaonaid dírithe ar Ghaelscoileanna, ó scéim léitheoireachta iontach do bhunscoileanna go hábhar tarraingteach do dhaltaí meánscoile, bheadh cuid mhaith dá ábhar an-úsáideach do scoil ar bith agus d’fhoghlaimeoirí fásta. Chomh maith leis na foilseacháin, cuireann an tÁisaonad áiseanna ar fáil ar a shuíomh idirlín agus cuireann an fhoireann tacaíocht agus oiliúint ar fáil do scoileanna maidir le dea-úsáid a gcuid áiseanna. Tuilleadh eolais: http://www.aisaonad.org.
www.derryjournal.com
Raidió RíRá
Meitheamh 26, 2012
Ministers visit local gaelscoil
Meitheamh 26, 2012
Ó Domhnaill condemns axing of Gaeltacht Scholarships
Meitheamh 26, 2012
‘Diplomatic’ pupils help give 90- year- old Gaelscoil a facelift
Meitheamh 26, 2012
Seoladh Dámhachtainí Eorpacha na Bliana 2012: Ag tabhairt onóra do na tionscnaimh is fearr a chuireann aosú gníomhach agus dlúthpháirtíocht idir glúine chun cinn
Meitheamh 26, 2012
An Bhruiséil, 21 Meitheamh 2012. Mar chuid den Bhliain Eorpach um Aosú Gníomhach agus Dlúthpháirtíocht idir Glúine, tá an Coimisiún Eorpach ag seoladh Dámhachtainí Eorpacha na Bliana 2012 le ceiliúradh a dhéanamh leis na heagraíochtaí agus leis na daoine aonair a chuireann aosú gníomhach chun cinn ina gcuid gníomhaíochtaí.
“Áiteanna Oibre do gach Aois”: Aithnítear sa chatagóir seo na tionscnaimh is fearr a dhéanann fostóirí, ceardchumainn agus eagraíochtaí seachbhrabúsacha le dálaí oibre níos fearr a chur chun cinn do na fostaithe níos sine.
“I dtreo Timpeallachta a Thacaíonn le Daoine Breacaosta”: Aithnítear sa chatagóir seo tionscnaimh den chéad scoth ag údaráis réigiúnacha nó áitiúla siúd a chruthaíonn timpeallacht chuimsitheach inrochtana a éascaíonn aosú gníomhach agus a chuireann tionchar dearfach ar shláinte agus ar cháilíocht saol gach glúine.
“Fiontraithe Sóisialta”: Aithnítear sa chatagóir seo na tionscnaimh is rathúla ag fiontraithe sóisialta chun aosú gníomhach agus dlúthpháirtíocht idir glúine a chur chun cinn.
“Tuairisciú ar Aosú agus Caidreamh idir na Glúine”: Aithnítear sa chatagóir seo na hiriseoirí siúd a chuir go suntasach ina gcuid oibre le tuiscint níos fearr a thabhairt ar na dúshláin in aghaidh na sochaí breacaosta agus conas dul i ngleic leo, agus iad ag ardú leibhéal na díospóireachta poiblí agus ceapadh beartais níos fearr a chur chun cinn dá réir.
“Dúshlán na mBeathaí”: Déantar beatha na ndaoine breacaosta a cheiliúradh sa chatagóir seo. Tugtar cuireadh don ghlúin óg beatha duine breacaosta a insint (ball teaghlaigh, comharsa, cara, srl.) agus tionchar ag “an aois ghníomhach” ar theaghlach, ar an tsochaí nó ar obair, a chur i láthair.
“Comórtas Glúine@scoil”: Agus é seolta Marta 2012, tugtar cuireadh do gach scoil san Eoraip doirse a gcuid seomraí ranganna a oscailt do dhaoine breacaosta. Beidh deis ag leanaí agus ag daoine breacaosta smaoineamh le chéile ar na rudaí is féidir leo foghlaim óna chéile agus ar an dóigh bheith ag obair le chéile le todhchaí níos fearr a bhaint amach. Is féidir le scoileanna rannpháirteacha grianghraif a uaslódáil ar láithreán Gréasáin saincheaptha faoi 30 Meitheamh 2012. Tabharfar aithint ar na tionscadail idirghlúine is cruthaithí ann.
Tá tuilleadh sonraí ar na Dámhachtainí agus ar an dóigh bheith rannpháirteach ar an láithreán Gréasáin http://europa.eu/ey2012/.
Tá an comórtas ar oscailt go dtí 1 Meán Fómhair 2012, agus is féidir le gach saoránach i mBallstáit an AE, san Íoslainn, i Lichtinstéin agus san Iorua bheith rannpháirteach.
Tabharfar cuireadh do na hiomaitheoirí sa bhabhta ceannais freastal ar an Searmanas Bronnta EY2012 um Aosú Gníomhach, atá beartaithe don tSamhain sa Bhruiséil.
Déan teagmháil:
EY2012awards@paueducation.com
nó
Andrea Ricciarelli, ICWE GmbH
Teil: +49 (0)30 310 18 18 43
Facs: +49 (0)30 324 98 33
andrea.ricciarelli@icwe.net
Deis do scoileanna i mBÁC a bheith rannpháirteach i sraith de chláir raidió ‘Óige Átha Cliath’
Meitheamh 26, 2012
Tá deis iontach á chur ar fáil do 10 ngaelscoil i mBÁC a bheith rannpháirteach i sraith de chláir raidió ‘Óige Átha Cliath’. Bheadh ceol, amhránaíocht, drámaíocht agus caint i gceist i ngach clár. Ba dheis iontach é seo talann agus cumas dhaltaí na scoile a léiriú don phobal. Bheadh deis iontach freisin ag na daltaí labhairt faoina scoil féin agus na nithe a bhaineadar amach – éachtanna spóirt, duaiseanna nó gradaim a bhuaigh an scoil & rl. – a phoibliú.
Má éiríonn leis an gcomhlacht ‘Scéal Eile’ an togra a chur ar bun, bheadh sé i gceist acu sraith 10 gclár (28 nóiméad an ceann) a chraoladh ar Raidió na Life ag tús 2013.
Bheadh gach clár ag teacht ó scoil difriúil i mBaile Átha Cliath agus bheadh raon difriúil nithe i ngach ceann. Bheadh sé múnlaithe ar an sraith ‘Siamsa Scoile’ a léirigh an comhlacht seo agus a chraoladh ar RTÉ-Raidió na Gaeltachta cúpla bliain ó shin.
Tá súil acu tús a chur leis an taifeadadh Mí Eanáir seo chugainn. Tuigim go bhfuilimid ag druidim i dtreo deireadh na scoilbliana ach más mian leat go mbeadh do scoil páirteach ann, féadfaidh tú glaoch a chur ar Dheirdre Donnelly ag 087-4159355.
Gaelscoil Éadan Doire – Lá i gColáiste na bhFiann
Meitheamh 22, 2012
Chuaigh Gaelscoil Éadan Doire go Droim Rí i gcomhair an lá ar an 29 Bealtaine 2012. Chasamar ar na scoileanna seo ann: Gaelscoil Uí Chéide, Brí Chualann, Scoil Bhríde, Ranallach agus Gaelscoil an Bradán Feasa, Co. na Mí. Roinneadh na páistí go léir idir thrí ghrúpa. Bhí cluichí, damhsa, drumaí Afraiceach agus drámaíocht ar siúl acu. Seans a bhí ann do na páistí casadh ar dhaltaí eile a úsáideann Gaeilge mar theanga cumarsáide. Bhain na páistí an-sult as!
Múinteoir Eilís (Rang a 3 / Rang a 4)
Cúrsa Teaghlaigh sa Ghaeltacht, Iúil 2012
Meitheamh 22, 2012
Tá Foras na Gaeilge ag cur 10 scoláireachtaí, ar fiú €1000 an ceann iad, ar fáil do Chúrsa Teaghlaigh atá a reáchtáil ag Cumann an Phiarsaigh i nGaoth Dobhair le linn na seachtaine 14-21 Iúil 2012.
Caitheann na teaghlaigh seachtain i nGaoth Dobhair ag freastal ar ranganna agus imeachtaí tré Ghaeilge a bheidh ar siúl i bPobalscoil Ghaoth Dobhair. Tá a thuilleadh eolais faoin chúrsa féin ar an suíomh idirlíon www.piarsaigh.ie.
Tabharfaidh an scoláireacht an deis do bheirt dhaoine fásta agus beirt pháistí freastal ar an chúrsa agus íocfar liúntas de €400 leo chun cuidiú le cúrsaí lóistín.
Is ar theaghlaigh atá san earnáil Gaelscolaíochta faoi láthair atá na scoláireachtaí dírithe, sé sin le rá do theaghlaigh a bhfuil páiste ag freastal ar ghaelscoil, ar ghaelcholáiste nó scoil ina bhfuil oideachas tré Ghaeilge a chur ar fáil.
Beidh dhá scoláireacht a bhronnadh ar an chlár Barrscéalta ar RTE RAIDIO NA GAELTACHTA (11r.n.-12) gach lá ón Chéadaoin 27ú Meitheamh go dtí an Mháirt 3ú Iúil.
Tá Cumann an Phiarsaigh go mór faoi chomaoin ag Foras na Gaeilge as an tacaíocht seo a thabhairt don chúrsa.
Is féidir eolas breise a fháil ó Joe Ó Gallchóir, stiúrthóir an chúrsa, ag 086 8288764.
Anailís le tosú láithreach ar fhás agus bunú na scoileanna lán-Ghaeilge sa tír molta ag an bhFórám ar Phátrúnacht agus Iolrachas
Meitheamh 21, 2012
Thug an t-Aire Ruairí Quinn fios don phobal inniu faoin bPlean Gnímh atá beartaithe ag an Roinn Oideachais agus Scileanna mar fhreagra ar mholtaí an Bhoird Comhairleach de chuid an Fhóraim ar Phátrúnacht agus Iolrachas san earnáil bhunscolaíochta.
Fáiltíonn An Foras Pátrúnachta go mór le cinneadh an Aire go gcuirfear tús láithreach ar anailís ar bhunú agus fás na scoileanna lán-Ghaeilge mar fhreagra ar na moltaí ón mBord Comhairleach ar sholáthar oideachais lán-Ghaeilge sa tír. Tá sé i gceist go mbeidh an anailís tábhachtach seo mar fhoinse eolais do fhorbairt pholasaí i leith an oideachas lán-Ghaeilge amach anseo.
Tá An Foras Pátrúnachta an-sásta go bhfuil an t-Aire ag glacadh leis na moltaí ar dhídhílsiú phátrúnacht scoileanna, le héagsúileacht i scoileanna a chur chun cinn. Deir Ard-Rúnaí An Foras Pátrúnachta, Caoimhín Ó hEaghra, “Tá an Roinn Oideachais agus Scileanna ag tabhairt níos mó roghanna do thuismitheoirí, sa phróiséas seo, ar an gcineál scoil gur mian leo ó thaobh an meán teagaisc agus sainspiorad na scoile.” Beidh tuismitheoirí in ann a gcuid tuairimí agus a gcuid mianta a chur in iúl don Roinn sa suirbhé a chuirfear orthu san Fhómhair seo. Lean Ó hEaghra ag rá, “Mar phátrún, táimid ag freastal ar éagsúileacht inár scoileanna agus tugann an pátrún roghanna de sainspiorad Caitliceach, Idirchreidmheach agus Ilchreidmeach trí mheán na Gaeilge.”
Ghlac An Foras Pátrúnachta ról comhairleach sna ceardlanna oibre don bhFóram ar Phátrúnacht agus Iolrachas, ag cur eolas agus moltaí os comhair an Bhoird Comhairleach ar stádas an oideachais lán-Ghaeilge i láthair na huaire agus na bealaí leis an soláthar ar oideachas lán-Ghaeilge a mheas agus a neartú leis an éileamh a shásamh. Ghabh an t-Aire buíochas leis na grúpaí ar fad a thug moltaí agus a d’fhreastail ar na ceardlanna oibre seo.
Creideann An Foras Pátrúnachta go bhfuil an pátrún do scoileanna lán-Ghaeilge chun cinn ar fhreastal ar éagsúlacht agus iolrachas agus ag freastal ar éileamh tuistí ó bunaíodh é i 1993. Cuireann Ó hEaghra fáilte roimh an cinneadh go mbeidh An Chomhairle Náisiúnta Curaclaim agus Measúnachta ag déanamh fiosrúcháin ar fhorbairt chláir dírithe ar Oideachas ar Reiligiún agus Creideamh agus Eitic, “Beidh na fiosrúcháin seo á dhéanamh i gcomhpháirtíocht le páirtnéirí oideachais agus grúpaí creidimh agus tá An Foras Pátrúnachta ag súil go mór le bheith mar chuid den bpróiséas forbartha seo. Beidh na cláir an-áisiúl do scoileanna agus cuirfidh siad go mór le múineadh faoi chreidimh agus eitic.”
Le haghaidh agallaimh nó tuilleadh eolais, dean teagmháil le:Caitríona Bairéad :: caitriona@foras.ie :: 01-6294110
Is é AN FORAS PÁTRÚNACHTA an pátrún is mó in Éirinn ar scoileanna lán-Ghaeilge ag an gcéad agus an dara leibhéal. Tá 61 bhunscoil agus 3 mheánscoil faoina phátrúnacht. Tá AN FORAS PÁTRÚNACHTA ina phátrún ar scoileanna lán-Ghaeilge a bhfuil éiteas Caitliceach, Ilchreidmheach, agus Idirchreidmheach (Caitliceach / Protastúnach) acu. An fhís atá ag AN FORAS PÁTRÚNACHTA ná oideachas lán-Ghaeilge den scoth a chothú, a fhorbairt agus a leathnú sa tír. Tá AN FORAS PÁTRÚNACHTA aitheanta ag An Roinn Oideachais agus Scileanna mar chóras pátrúnachta atá inghlactha agus cuí do scoileanna ag an gcéad agus an dara leibhéal. Bunaíodh AN FORAS PÁTRÚNACHTA sa bhliain 1993 ionas go mbeadh rogha eile ag scoileanna maidir le pátrúnacht. Tuilleadh eolais: www.foras.ie
