Deiseanna Fostaíochta le Gaeilge faoi chaibidil san Iarthuaisceart
Deireadh Fómhair 18, 2011
Ag dhá ócáid spreagúla spleodracha i gCora Droma Rúisc agus i gCarraig Mhachaire Rois seachtain ó shin, labhair aoichainteoirí atá ag obair i réimsí éagsúla oibre trí Ghaeilge le suas le 500 dalta meánscoile faoin mbuntáiste breise a thug an Ghaeilge dóibh agus iad ag dul i mbun a ngairmeacha beatha.
Ag slua mór i gCora Droma Rúisc i gContae Liatroma labhair Mícheál Ó Domhnaill, fear atá ina láithreoir Seó Spóirt ar TG4 agus a bhunaigh an comhlacht Omedia a dhéanann cláir theilifíse a léiriú leis an mbreis is 300 scoláire a bhí i láthair.
Thug Micheál léargas ar na buntáistí a bhí aige go raibh Gaeilge agus Spáinnis aige rud a chabhraigh go hollmhór leis ina shaol gairmiúil sna meáin chumarsáide.
Labhair an craoltóir cumasach Barbara Nic Dhonnacha bean óg ata tar éis gradam PPI Craoltóir Ceoil na bliana 2011 a chrochadh léi le déanaí. Rinne Barbara cur síos cuimsitheach ar an bpost an-suimiúil atá aici ag cur i láthair clár dátheangach ‘Ar Éileamh’ ar iRadio.
Cúrsaí aistriúcháin, drámaíochta, cultúir agus ceoil thraidisiúnta a bhí faoi chaibidil ag Freda Nic Giolla Chatháin as Contae na hIarmhí. Chuir Freda síos ar na réimsí éagsúla oibre a dtugann an Ghaeilge deis dí tabhairt fúthu.
Rinne Ciarán Mac an Bhaird fear atá ina léachtóir le Gnó agus Bainistíocht in Fiontar, Ollscoil Chathair Bhaile Átha Cliath cur síos ar na bealaí ar shealbhaigh seisean an teanga sa Ghalltacht agus ar chúrsaí oideachais agus na deiseanna fostaíochta iontacha atá amuigh ansin. Chuir sé in iúl don lucht éisteachta gur buntáiste iontach í an Ghaeilge agus is cuma cén áit sa domhan ina bhfuil tú.
Phléigh Rossa Ó Snodaigh cúrsaí Gaeilge sa phobal agus chuir sé síos ar an mbuntáiste a thug an Ghaeilge dó siúd agus é ag taisteal an domhain ag seinm ceoil leis an mbanna ceoil clúiteach Kíla. Dúirt Rossa leis na daltaí a bheith bródúil as an teanga agus chuir sé in iúl dóibh gur a bhuíochas leosan é má bhíonn an Ghaeilge beo sa bhliain 2050.
I gCarraig Mhachaire Rois ar an gCéadaoin bhí painéal d’aoichainteoirí den scoth ag cur síos ar an nGaeilge ina gcuid gairmeacha beatha. Ina measc bhí Gráinne McElwain as Baile Átha an Fhóid in aice leis an Bhoth i gCo. Mhuineacháin.
Thug Gráinne léargas iontach ar a post spéisiúil mar thuairisceoir ar an tsraith rugbaí Magners agus ar na cláir Health Squad, Seó Spóirt ar TG4 agus Loach Gael. Thug sí comhairle don lucht éisteachta maidir le post a shealbhú san earnáil.
Thug Réamonn Ó Ciaráin as Ard Mhacha osradharc cuimsitheach ar na slite beatha éagsúla ar féidir iad a bhaint amach má chuireann tú spéis sa Ghaeilge, agus na cúrsaí tríú leibhéal ábhartha do na slite beatha sin. Thug sé cuntas ar an réimse difriúil oibre a bhíonn ar siúl aige mar Bhainisteoir Réigiúnach i gCúige Uladh le Gael Linn.
Léirigh na haoichainteoirí go léir do na daltaí a bhí i láthair, nach gá gurb as an nGaeltacht thú chun gairm bheatha a bhaint amach i saol na Gaeilge.
Rinne Carmel Uí Chiosóg Mhic Gabhann, leabharlannaí i Leabharlann Cheannais Mhic Sheáin i gCo an Chabháin cur síos iontach ar na dúshláin a bhain le Gaelscoil Bhreifne a bhunú sa chontae i lár na nóchaidí, Thug sí léargas iontach ar an mbealach a n-úsáideann sise a cuid Gaeilge ag cur chun cinn imeachtaí pobail agus ag eagrú féilte agus imeachtaí dála Fhleadh Ceoil na hÉireann in áit nach bhfuil an teanga le cloisteáil go forleathan ar bhonn laethúil.
Mar chuid den seimineár cuireadh fáilte roimh cheisteanna ó na daltaí a bhí i láthair agus tugadh cuireadh do dhaltaí páirt a ghlacadh sa díospóireacht tar éis do na haoichainteoirí labhairt, le seisiún ceisteanna agus freagraí.
Comhghairdeas le Gráinne Carty ó Phobalscoil Naomh Attracta a bhain amach an duais mhór de €425 – scoláireacht Ghael Linn de bharr an cheist is fearr a chur le linn an tseimineáir i gCora Droma Rúisc agus le Fionnuala Ní Chathmhaoil ó Choláiste Oiriall a bhain amach €425 de scoláireacht Gael Linn i gCarraig Mhachaire Rois.
Is iad Comhdháil Náisiúnta na Gaeilge a eagraíonn an seimineár Buntáiste Breise na Gaeilge, agus faoi dheireadh na bliana seo beidh sé cinn déag de na seimineáir seo eagraithe agus freastal déanta ar suas le 4,300 dalta scoile ó gach cearn den tír orthu.
Tá Comhdháil Náisiúnta na Gaeilge fíorbhuíoch de Gael Linn, Coláiste Uisce, RTÉ Raidió na Gaeltachta, Scoil Surfáil Freedom i bPort Láirge a dhéanann urraíocht ar na duaiseanna do na seimineáir seo.
Beidh trí sheimineár eile á reáchtáil ag an gComhdháil idir seo agus deireadh na bliana:
Déardaoin, 17 Samhain 2011- Coláiste Feirste i mBéal Feiste
Dé Máirt 22 Samhain 2011 – Ionad: Óstán An Strand i gCathair Luimnigh
Dé Céadaoin, 23 Samhain 2011 – Óstán na Páirce i nDún Garbhán, Co. Phort Láirge
Más múinteoir scoile tú sna ceantair nó in aice leis na ceantair seo agus más spéis le do scoil páirt a ghlacadh i seimineár déan teagmháil go luath le Brígíd ag 01 679 4780 / brighid@comhdhail.ie
Tá tuilleadh eolais faoi na seimineáir Buntáiste Breise na Gaeilge ar fáil ó Chomhdháil Náisiúnta na Gaeilge ar Gaelport.com/bbnag.
Cainteanna ar bun maidir le eagraíocht oideachais náisiúnta a bhunú
Deireadh Fómhair 18, 2011
Tá Gaelscoileanna Teoranta agus Eagraíocht na Scoileanna Gaeltachta i mbun comhphlé faoi láthair maidir leis an dá eagraíocht oideachais a chomhnascadh le chéile.
Glacadh le rún ag comhdháil bhliantúil Eagraíocht na Scoileanna Gaeltachta (ESG) ag an deireadh seachtaine i nGaillimh go leanfar leis na cainteanna idir an dá eagraíocht.
Cuireadh tús leis na cainteanna bliain ó shin agus dar le Blathnaid Ní Ghréacháin, Príomhfheidhmeannach Gaelscoileanna Teoranta gur mhór an buntáiste a bheadh ann go mbeadh aon eagraíocht amháin in ann labhairt go húdarásach maidir le ceisteanna a bhaineann le hoideachas trí mheán na Gaeilge.
Chomh maith leis sin, ceapann sí go mbeadh sé tábhachtach go mbeadh spriocanna na Straitéise 20 Bliain don Ghaeilge i dtaobh oideachais trí mheán na Gaeilge á gcomhlíonadh i mbealach comhordaithe amach anseo.
Faoi láthair bíonn ESG ag feidhmiú laistigh de cheantair Ghaeltachta amháin agus faigheann sí maoiniú ón Roinn Ealaíon, Oidhreachta agus Gaeltachta.
Bíonn Gaelscoileanna Teoranta ag cur tacaíochta ar fáil d’fhorbairt na scoileanna lán-Ghaeilge ag an mbunleibhéal agus ag an iar-bhunleibhéal lasmuigh de cheantair Ghaeltachta agus tá an eagraíocht bunmhaoinithe ag Foras na Gaeilge.
Tá na heagraíochtaí ag súil go mbeadh an dá mhaoinitheoir sásta páirt ghníomhach a ghlacadh sna comhchainteanna seo agus táthar ag súil le freagra go luath ó na maoinitheoirí maidir le struchtúir mhaoinithe.
Tiocfaidh deireadh le maoiniú ESG ag deireadh na míosa seo chugainn agus níl aon chinneadh glactha go fóill maidir le maoiniú na heagraíochta amach anseo.
©Foilsithe ar Gaelport.com
Postanna i mbaol i nGaelscoil i Sligeach
Deireadh Fómhair 18, 2011
Tá imní léirithe ag Gaelscoil Chnoc na Ré i Sligeach go mbeidh ar an scoil beirt mhúinteoir a ligean chun siúil ag deireadh na míosa mar gheall ar chinneadh a rinne an Roinn Oideachais agus Scileanna deireadh a chur leis an gcóimheas daltaí le múinteoirí fabhrach a bhí ann i ngaelscoileanna.
Tá an scoil lonnaithe i gcóiríocht shealadach ó bunaíodh é sa bhliain 1996 agus tugadh le fios i dtuarascáil sláinte agus sábháilteachta a rinneadh sa bhliain 2009 go raibh na ranganna scoile ró-phlódaithe agus róbheag do na 177 dalta a bhíonn ag freastal ar an scoil. Tiocfaidh méadú ar líon na bpáistí sna ranganna go léir mar thoradh ar an gcinneadh dar le Mícheál Ó Broin, príomhoide na scoile.
Beidh ar an Príomhoide filleadh ar ais ar an seomra ranga mar gheall ar an gcinneadh agus dúirt sé inniu go raibh ceisteanna ann maidir le dearcadh na Roinne Oideachais i leith an ghaeloideachais.
“ Is buille marfach i ndiaidh buille marfach atá ag teacht” a dúirt an Príomhoide, “agus tá an cinneadh bunaithe ar réasúnaíocht airgeadais amháin.”
Tá sé den tuairim go bhfuil bunús láidir oideachasúil agus teangeolaíochta leis an gcóimheas agus go bhfuil an cinneadh ag teacht salach ar an Straitéis 20 bliain don Ghaeilge a d’aithin ról lárnach na ngaelscoileanna.
Bhí an Príomhoide ag labhairt ag lá oscailte a reáchtáladh do na meáin sa scoil. Tá an scoil ag éileamh ar an Aire tarraingt siar ar an gceist.
©Foilsithe ar Gaelport.com
Coláiste Ghlór na Mara – Cláraigh Anois!
Deireadh Fómhair 17, 2011
Clár speisialta ‘Céilí House’ le buaiteoirí Siansa Gael Linn 2011!
Deireadh Fómhair 13, 2011
Beidh buaiteoirí Siansa Gael Linn 2011, an grúpa ‘Éile’,ó Laurel Hill Coláiste FCJ, Luimneach, le cloisteáil ar an aer le linn Seachtain Mhór Cheoil RTÉ 2011 ! Craolfar clár speisialta den sraith iomráiteach ‘Céilí House’ leis na ceoltóirí óga ar RTÉ Raidió 1, Dé Sathairn, 15 Deireadh Fómhair ag 9.02p.m.
Is iad baill an ghrúpa ná Deirdre Ní Mhaoláin, Máire Ní Riain, Ellen Ní Ghormáin, Marta Ní Ghlinn, Emma Ní Dhubháin, Eimear Ní Mhaolain, Sophie De Buitléir agus Zoe Stedje.
Páirteach sa chlár chomh maith beidh a múinteoirí, Holly Geraghty, a sheinnfidh an cruit agus an consairtín, Bernadette Nic Gabhann a bhainfidh ceol den scoth ón bhfidil, agus Príomhoide na scoile,Aedín Ní Bhriain, a chanfaidh go binn ! Mar is iondúil, is é Kieran Hanrahan a chuirfidh an clár i láthair agus beidh Peter Browne i mbun léirithe. Ná caill é !
Alt le Gael Linn
Gaelscoil na Cille – Tríocha Bliain faoi Bhláth
Deireadh Fómhair 13, 2011
Go bliantúil, is lá mór an chéad lá Meán Fómhair do dhaltaí scoile ach b’ócáid thar a bheith speisialta í i mbliana do phobal Ghaelscoil na Cille, i gCill Dhéagláin, Contae na Mí. Bhí císte mór, balúin agus aíonna speisialta ann ar an lá mar tá tríocha bliain slánaithe ó thosaigh céad príomhoide na scoile, Pádraig Ó Dufaigh, a chomhghleacaí Eibhlín Pléamonn agus buíon beag páistí amach ar an mbóthar mar scoil nua.
Sna blianta sin, tá oiliúint faighte ag breis is míle daltaí agus is iomaí duine díobh seo a chuir a bpáistí féin ag Gaelscoil na Cille freisin. Is iar-scoláirí beirt d’fhoireann teagaisc na scoile, Clár Ní Thuathail agus Deirdre Nic Uaid, agus bhí Clár i measc na scoláirí nua ar an lá stairiúil sin i 1981. Tá iliomad iar-scoláirí ina múinteoirí gaelscoile ar fud na tíre freisin, rud atá ina chúis áthais don scoil.
Tá clár cuimsitheach d’imeachtaí eagraithe ag an scoil chun deis cheiliúrtha a thabhairt do dhaltaí is tuistí an lae inniu, chomh maith le hiar-thuistí, iar-scoláirí agus an pobal áitiúil. I rith na bliana, reáchtálfar Dinnéar Comórtha, Aifreann Buíochais, Taispeántas Faisin, Clasaic Gailf agus Lá Spraoi. Féachann pobal Ghaelscoil na Cille chun na todhchaí le mórtas agus muinín tar éis Tríocha Bliain Faoi Bhláth.
Ceiliúradh 25 bliain i nGaelscoil Ultain
Deireadh Fómhair 13, 2011
Rinneadh comóradh ar chúig bliana is fiche d’oideachas trí Ghaeilge i mBaile Mhuineacháin ag tús Meithimh 2011 agus Gaelscoil Ultain ag ceiliúradh 25 bliain a bunaithe. Bhí clár mór d’imeachtaí leagtha amach ag Coiste Eagraithe na hócáide.
Bhunaigh baicle de thuismitheoirí faoi stiúir Bhrendán Ó Dufaigh Gaelscoil Ultain i Meán Fómhair 1986. D’fhreastail 23 páistí ar an scoil ar an chéad lá agus anois, 25 bliain níos moille, tá 244 ar na rollaí.
Bhí Lá Ceiliúrtha faoi leith ann ar an Domhnach, 5 Meitheamh.
Cuireadh tús leis an lá le hAifreann ceiliúrtha san Ardeaglais. Bé an tAthair Chester, séiplíneach na scoile a bhí mar cheiliúraí, agus chuir Cór Ghaelscoil Ultain agus grúpa ceoil uirlise (a chuimsigh an fhoireann, scoláirí agus tuismitheoirí na scoile) an ceol ar fáil.
Bhí Maidin Oscailte sa scoil i ndiaidh an Aifrinn agus bhailigh pobal na scoile ó inné agus inniu le chéile le súil a chaitheamh ar bhóithrín na smaointe.
Bí an Oíche Cheiliúrtha in Óstán an Hillgrove, príomhimeacht na deireadh seachtaine. Ar an oíche seo sheol Rita Nic Amhlaoibh, cigire bunscoile agus tuismitheoir sa scoil, leabhar faoi stair na scoile. B’é Príomhoide na scoile, Joe Ó Gallchóir a chuir an leabhar álainn, Ceathrú Céid ar an Chnoc, le chéile.
Chuir ball eile foirne, Seán Ó Máirtín físeán faoi stair na scoile i láthair ar an oíche chomh maith.
Bhain achan duine sult as an bhia agus as an oíche ceoil leis an ghrúpa Goitse.
Cuireadh dhá imeacht ceiliúrtha eile ar siúl níos luaithe sa scoilbhliain do dhaltaí na scoile; sraith ceardlann de Dhamhsa ar an Sean Nós le Ger Butler agus ceolchoirm le John Spillane.
Ní dhéanfar dearmad ar an cheiliúradh go ceann fada!!!
A bit Irish
Deireadh Fómhair 12, 2011
Minister must demand better return on Irish language spend
Deireadh Fómhair 12, 2011
Seimineáir faoin siollabas nua Gaeilge
Deireadh Fómhair 12, 2011
Tá beartaithe go dtiocfaidh siollabas nua i bhfeidhm don scrúdú Gaeilge san Ardteistiméireacht in 2012.
Tá Comhar na Múinteoirí Gaeilge agus An Chomhdháil ag reáchtáil seimineáir do mhúinteoirí Gaeilge lena aghaidh. Chuirfidh ionadaithe seimineáir ar fáil i Sligeach ar 13 Deireadh Fómhair, i gCathair Luimnigh ar 27 Deireadh Fómhair, i gCill Airne ar 04 Samhain agus i Má Nuad 11 Samhain. Tá múinteoirí ó Chorcaigh a ghlac páirt i gceann de na seimineáir a bhí ar siúl le déanaí. Tá gach eolas ar fáil faoi seimineár thuas ó Saffron Rosenstock, 01 6398448.
Foinse
