Gaelscoil Ráth Tó le hoscailt gan aitheantas ón Roinn Oideachais
Aibreán 29, 2010
D’fhógair coiste bunaithe Gaelscoil Ráth Tó go bhfuil an scoil le bunú gan aitheantas na Roinne Oideachais i Meán Fómhair 2010. Ag labhairt ar son an choiste, dúirt an cathaoirleach Anita Sheppard go bhfuil tuismitheoirí agus eagraíochtaí Gaeilge ag tacú leo le Gaelscoil Ráth Tó a oscailt. Na heagraíochtaí bainteach leis an bhfeachtas “Aitheantas” ná an Foras Pátrúnachta, Glór na nGael, Comhluadar, Conradh na Gaeilge agus Gaelscoileanna Teo.
“In ainneoin gur dhiúltaigh an Roinn Oideachas aitheantas a thabhairt don scoil, cé go bhfuil gá le háiteanna scoile nua i Ráth Tó, tá an cinneadh tógtha againn leanúint ar aghaidh leis an scoil a bhunú ar bhonn neamhoifigiúil, le tacaíocht fhlaithiúil na heagraíochtaí Gaeilge thuasluaite. Beimid ag cur an-bhrú ar an Roinn aitheantas a thabhairt don scoil seo. Táimid ag obair le daoine sna heagraíochtaí thuasluaite a bhfuil rí-thaithí acu ar scoileanna lán-Ghaeilge a bhunú agus a bhainistiú agus tá muid ar fad cinnte go mbainfidh an scoil aitheantas amach ón Roinn amach anseo,” a dúirt Anita Sheppard.
“Tá sé feicthe againn go bhfuil an-éileamh ar an scoil seo i Ráth Tó, ach diúltaíonn an Roinn idirdhealú a dhéanamh idir scoileanna nua ar bhonn teanga teagaisc na scoile. Ciallaíonn seo go bhfuil neamhaird á dhéanamh ag an Roinn ar cearta teanga na dtuismitheoirí agus a bpáistí agus creideann gach éinne bainteach leis an bhfeachtas seo nach féidir leanúint ar aghaidh sa staid seo. Ní hamháin go bhfuil aitheantas á lorg againn do Ghaelscoil Ráth Tó, ach táimid ag iarraidh go n athrófar critéir na Roinne i leith scoileanna nua a aithint, mar tá scoileanna lán-Ghaeilge nua faoi mhíbhuntáiste leis an gcóras atá ann faoi láthair. De dheasca seo, níor bunaíodh aon ghaelscoil nua ó 2008 agus ní léir ón Roinn go mbeidh aon athrú ar an staid seo,” a lean sí.
“Is ceist náisiúnta chomh maith le ceist áitiúil í seo mar go mbaineann sé le gluaiseacht na gaelscolaíochta i gcoitinne, ceann de na hearnálacha oideachais is mó fáis in Éirinn. Ba mhian linn go mbeadh cur chuige níos cothroma ag an Roinn maidir le scoileanna a bhunú a mhúinfeadh trí céad teanga oifigiúil an Stáit, dé réir Airteagal 8 i mBunreacht na hÉireann.
Gaelscoil Ráth Tó
Aibreán 29, 2010
Ag Ard-Fheis Chonradh na Gaeilge le déanaí cuireadh na rialacha seasta ar leath taobh le plé a dhéanamh ar rún práinne faoin ngaelscoil nua atá beartaithe do Ráth Tó i gContae na Mí.
Bhí an rún mollta faoi ainm na hiarUachtaráin ar fad a bhí i láthair agus glacadh d’aon ghuth leis, ag iarraidh ar an Roinn Oideachais aitheantas a thabhairt don Ghaelscoil nua, rud atá diúltaithe acu go dtí seo. Go deimhin tá diúltaithe ag an Roinn Oideachais aitheantas a thabhairt d’aon ghaelscoil nua le dhá bhliain anuas.
Ag labhairt ag an Ard Fheis thug Seán Ó Buachalla, duine de bhunaitheoirí Ghaelscoil Ráth Tó, eolais do na teachtaí faoin ngaelscoil atá le bunú ansin mí i mí Mheán Fómhair seo chugainn gan aitheantas na Roinne Oideachais. Dúirt sé go raibh na coinníollacha ar fad a bhain le haitheantas a fháil do scoil nua comhlíonta acu san iarratas a rinne siad ach fós féin gur dhiúltaigh an Roinn an scoil a cheadú.
Chinn Ard Fheis Chonradh na Gaeilge tacaíocht a chur ar fáil do Ghaelscoil Ráth Tó agus mar chéad chéim sa tacaíocht sin bailíodh breis agus míle euro don scoil nua ag an Ard Fheis.
Galway Advertiser – Peadar Mac Fhlannchadha
29 Aibreán 2010
Eagrais Ghaeilge ar lorg aitheantais do Ghaelscoil Ráth Tó
Aibreán 28, 2010
TÁ comhghuaillíocht nua oideachais, Aitheantas, bunaithe ag cúig eagraíocht Ghaeilge – Conradh na Gaeilge; Glór na nGael; Comhluadar; An Foras Pátrúnachta agus Gaelscoileanna – agus é mar chuspóir acu tacaíocht a chur ar fáil do Ghaelscoil Ráth Tó, Co na Mí. Rachaidh daltaí na gaelscoile nua i mbun ranga Meán Fómhair na bliana seo gan aitheantas oifigiúil Stáit acu.
Dúirt urlabhraí thar ceann Aitheantas, Feargal Ó Cuilinn, leis an cholún seo go raibh pobal an cheantair “díomách” nach raibh aitheantas oifigiúil ag an scoil. Ba í an cheist a bhí pobal na háite ag cur, a dúirt Ó Cuilinn: “Táimid ann. Táimid réidh. Cén fáth nach bhfuil gaelscoil oscailte?”
Bhí 35 páiste cláraithe agus léirigh staitisticí an Roinn Oideachais féin go raibh gá le scoil nua sa cheantar. Bhí na gaelscoileanna eile sa chontae “lán go doras” agus ní raibh spás iontu.
Tháinig fás as cuimse ar phobal an cheantair le blianta beaga anuas, a dúirt sé. Bhí tuairim is 800 duine ina gcónaí ar Ráth Tó tamall de bhlianta ó shin ach bhí idir 3,000 agus 4,000 duine anois ann.
Bhí tacaíocht an phobail leis an scoil; bhí suíomh acu; bhí an obair déanta agus éileamh ar oideachas trí mheán na Gaeilge.
Bhí rún ag na tuismitheoirí an scoil a oscailt, múinteoir a fhostú agus cloí leis an churaclam. Leanfadh siad leis an obair go dtí go bhfaigheadh siad aitheantas oifigiúil, a dúirt sé.
Faoi na tuismitheoirí a bhí sé anois tuarastal an phríomhoide a fháil, “gach pingin a bhailiú leis an scoil a choinneáil ar oscailt go ceann bliana” agus gach costas a bhain le riar na scoile a ghlanadh, a dúirt Ó Cuilinn.
Dúirt sé go bhfacthas don ghrúpa nach raibh an Ghaeilge “ar chlár oibre na Roinne”; ní raibh tacaíocht le fáil ón Roinn ach a mhalairt.
Ba é cuspóir an fheachtais nua tacaíocht airgid a fháil agus ceist na scoile a chur ar an chlár polaitiúil. Bhí cruinniú ag an ghrúpa cheana féin le hAire na Gaeltachta, Pat Carey; bhí siad ar lorg cruinnithe leis an Aire Oideachais, Mary Coughlan, agus bhí tacaíocht traspháirtí ag an scoil i measc polaiteoirí go háitiúil.
Bhí Comhairle Contae na Mí le rún tacaíochta ar son na scoile a rith ag tús na Bealtaine.
Dúirt ceannasaí Ghlór na nGael, Lorcán Mac Gabhann, gur “ceist náisiúnta agus áitiúil” a bhí i gceist leis an diúltú; níor osclaíodh gaelscoil nua sa Stát ón bhliain 2008 agus bhí an chosúlacht ar chúrsaí nach raibh an Roinn Oideachais “sásta an Ghaeilge a aithint mar chuid den mheasúnú ar sholáthar oideachais”.
Rinne an colún seo teagmháil le Roinn an Oideachais faoi chás Ghaelscoil Ráth Tó. Agus muid ag dul i gcló, níor tháinig freagra ar bith uathu. Cuirfear i gcló é a luaithe agus a thiocfaidh sé.
PÓL Ó MUIRÍ Eagarthóir Gaeilge, Irish Times
Feachtas nua chun tacú le Gaelscoil Ráth Tó
Aibreán 26, 2010
Tá fógartha ag cúig eagraíocht Gaeilge go bhfuil siad ag teacht le chéile i comhfhiontar chun tacú le Gaelscoil nuabhunaithe. D’fhógair Conradh na Gaeilge, Glór na nGael, Comhluadar, An Foras Pátrúnchta agus Gaelscoileanna Teo. go bhfuil siad siad aontaithe ar thacaíocht a sholáthar do Choiste bunaithe Gaelscoil Ráth Tó.
Beidh an feachtas seo, ‘Aitheantas’ ag obair lámh i lámh lena chinntiú go n-aithneofar Gaelscoil Ráth Tó agus go n-úsáidfidh an Roinn Oideachas agus Eolaíochta soláthar an ghaeloideachas mar chritéir agus iad ag roghnú áiteanna do scoileanna nua.
Dhúiltigh an Roinn Oideachas agus Scileanna aitheantas a bhronnadh ar an scoil i mbliana cé go bhfuil sé ráite ag an Roinn go bhfuil gá le soláthar oideachas breise ar an mbaile.
Tá an Roinn ag déanamh neamhard ar mianta tuismitheoirí Ráth Tó agus neamhard ar an t-éileamh d’oideachas lánGhaeilge.
Ag labhairt faoin bhfeachtas seo dúirt Lorcán Mac Gabhann, Glór na nGael gur “cheist náisiúnta agus áitiúl an dúiltú seo. Níor osclóidh Gaelscoil nua ó 2008. Tá an cuma ar an scéal nach bhfuil an Roinn sásta an Ghaeilge a aithint mar chuid den mheasúnú ar soláthar oideachas.”
D’fháiltigh Cathaoirleach an Choiste Bunaithe, Seán Ó Buachalla, roimh an tacaíocht ag rá “ tá an-obair romhainn ag chinntiú go mbeidh gaelscolaíocht ar fáil do phobal Ráth Tó agus thug seasamh pobal na Gaeilge spreagadh ollmhór do na tuismitheoirí.”
Tá sé beartaithe ag na heagraíochtaí gach tacaíocht a thabhairt do phobal Ráth Tó agus iad ag troid ar son cearta tuismitheoirí; freastal mar ba choir a fháil ón Roinn.
Osclóidh Gaelscoil Ráth Tó, gan aitheantas, ar 1 Meán Fómhair i CLG Ráth Tó, Páirc Seán Eiffe, Ráth Tó, Co. na Mí.
Concern over ‘literature-lite’ Irish syllabus
Aibreán 26, 2010
Cruth Úr ar Láithreán Gréasáin Gaelscoileanna
Aibreán 21, 2010
Tá suíomh nua forbartha ag GAELSCOILEANNA TEO. agus tá le leagan amach úr agus eolas ar www.gaelscoileanna.ie ar gach gné d’obair na heagraíochta. Tá súil ag an eagraíocht go gcabhróidh an leagan amach nua atá le daoine eolas maidir leis an ngaelscolaíocht agus acmhainní a bhaineann lái a aimsiú go héasca.
I measc na n-áiseanna ar an suíomh nua tá liosta na scoileanna agus sonraí teagmhála dóibh, tá nuachtlitir leictreonach na heagraíochta agus cartlann de na heagráin a foilsíodh cheana, tá eolas maidir le Comhdháil Bhliantúil Gaelscoileanna Teo. agus comhairle maidir le feachtasaíocht agus scoileanna nua a bhunú.
Tá go leor le híoslódáil ón suíomh chomh maith: léachtaí, cur i láthair, ábhar oiliúna do Bhoird Bhainistíochta, foilseacháin agus eile.
Tá an DVD a eisíodh i gcomhpháirt le Comhairle na Gaelscolaíochta a thugann an-chuid eolais ar an gcóras gaelscolaíochta le feiceáil ar an bpríomhleathanach, agus tá grianghraif agus físeáin le feiceáil ann ó na himeachtaí éagsúla a nglacann pobal na gaelscolaíochta páirt iontu. Tá tuairiscí le léamh chomh maith ó scoileanna a ghlac páirt sa scéim deontais Imeachtaí Idirscoile.
Tá súil ag Gaelscoileanna Teo. go mbeidh an suíomh níos idirghníomhaí fós amach anseo nuair a fhorbrófar foirmeacha ar líne do sheirbhísí na heagraíochta, agus beidh siad ag cur leis go leanúnach.
Cuirtear fáilte roimh aiseolas faoin suíomh; is féidir ríomhphost a sheoladh chuig oifig@gaelscoileanna.ie le do thuairimí a chur in iúl dóibh.
Pupils ‘ignored’ in new Irish syllabus
Márta 25, 2010
Neamhaird déanta ar dhaltaí le hard-chaighdeán sa siollabas nua Gaeilge
Márta 24, 2010
Is cúis mhór imní do GAELSCOILEANNA TEO. gur foilsíodh siollabas leasaithe Gaeilge don Ardteist an tseachtain seo caite a dhéanann neamh-aird ar dhaltaí ar ard-leibhéal Gaeilge. I ngeall ar laghdú suntasach a bheidh ag teacht ar an gcúrsa litríochta, agus méadú ar líon na marcanna a bhronnfar ar an mbéaltriail, beidh impleachtaí ollmhóra ann do chaighdeán Gaeilge na ndaltaí. Is é an toradh a bheidh ar na hathruithe seo ná nach mbeidh dúshlán feiliúnach ag daltaí sna Gaelcholáistí sa chúrsa Gaeilge ag leibhéal na hArdteiste ná ag daltaí sna scoileanna trí mheán an Bhéarla a bhfuil ardchumas sa Ghaeilge acu. Tá ardchaighdeán Gaeilge sna Gaelcholáistí riachtanach chun go mbeidh daltaí in ann dul i ngleic leis na hábhair eile atá á nglacadh acu trí mheán na Gaeilge ag leibhéal na hArdteiste. Gan an leibhéal Gaeilge cuí bheadh brú breise orthu tabhairt faoi na hábhair eile trí Bhéarla.
Tá GAELSCOILEANNA TEO. ag éileamh ar an Aire Coughlan a chinntiú go mbeidh ábhar iomlán breise ar fáil ag ardleibhéal na hArdteiste don Ghaeilge, ábhar a rachadh i ngleic leis na dúshláin sa scríbhneoireacht atá ann ag an leibhéal seo faoi láthair. Thabharfadh an t-ábhar seo deis do na daltaí a bhfuil leibhéal ard Gaeilge acu forbairt a dhéanamh ar a scileanna teanga agus tuiscint cheart a fháil ar oidhreacht liteartha na Gaeilge. Sa siollabas Béarla leagtar an-bhéim ar chúrsaí litríochta, rud a chuireann go mór le saibhreas cultúrtha agus forbairt scileanna an dalta. Leis an laghdú seo ar litríocht na Gaeilge, ardaítear an cheist faoi luach na teanga i gcomórtas leis an mór-theanga, Béarla.
Anuas ar an laghdú suntasach seo ar an gcúrsa litríochta tá slad iomlán déanta ar an gcúrsa ‘stair na Gaeilge’. Cé go mbeidh marcanna breise ag dul don bhéaltriail ní léir go fóill cé mhéid de dhúshlán breise a bheidh ann do dhaltaí a bhfuil leibhéal maith Gaeilge acu cheana féin. Ní léir ach an oiread cén chóras measúnachta a bheidh ann don bhéaltriail nua.
Ag labhairt faoin gcás dúirt Bláthnaid ní Ghréacháin, Ardfheidhmeannach GAELSCOILEANNA TEO. “Is ábhar an-mhór mhíshástachta é eisiúint an chiorcláin seo a fhógraíonn athraithe an-mhór sa chúrsa ardteiste don Ghaeilge i ngeall ar an easpa comhairliúcháin a rinneadh le páirtnéirí agus le scoileanna agus an easpa fógra do scoileanna ina leith le cur ar a gcumas an t-ullmhúchán cuí a dhéanamh. Beidh impleachtaí an- mhór ann do scoileanna agus tá an baol ann nach n-éireoidh leis na daltaí caighdeán ard Gaeilge san Ardteist a bhaint amach mar atá á dhéanamh faoi láthair. An toradh a bheidh ar sin ná nach mbeidh dóthain daoine le Gaeilge mhaith ann le tabhairt faoin saol oibre ina mbeadh Gaeilge de dhíth orthu dó, mar shampla, don mhúinteoireacht. Mura dtugtar dúshláin a dhóthain sa teanga ní fhásfaidh sí amach anseo ó thaobh na litríochta, na hiriseoireachta agus eile. Tubaiste a bheadh ann do na coláistí oiliúna agus do thodhchaí na Gaeilge.”
Is í GAELSCOILEANNA TEO. eagraíocht chomhordaithe na scoileanna lán-Ghaeilge. Cabhraíonn sí le tuismitheoirí agus le grúpaí áitiúla scoileanna nua a bhunú agus tacaíonn sí leis na scoileanna atá bunaithe cheana féin. Tá 169 gaelscoil agus 38 gaelcholáiste lasmuigh den Ghaeltacht ag cur oideachais lán-Ghaeilge ar fáil faoi láthair.
Coláiste Ailigh celebrates a decade on
Márta 23, 2010
BUAITEOIRÍ SCLÉIP! 2010: COMÓRTAS TALLAINNE NA nIAR-BHUNSCOILEANNA LÁN-GHAEILGE
Márta 22, 2010
Is cúis áthais do GAELSCOILEANNA TEO. buaiteoirí Scléip! 2010 a fhógairt. Is éard a bhí i Scléip 2010 ná comórtas tallainne náisiúnta atá dírithe go sonrach ar na hiar-bhunscoileanna lán Ghaeilge agus Gaeltachta. Bhí an comórtas roinnte in ocht rannóg éagsúla, le duais i ngach rannóg, trí dhuais nualaíochta agus Grand Prix don duine nó grúpa is fearr san iomlán. Seo thíos liosta na mbuaiteoirí:
Buaiteoirí na Rannóga:
- Ceol Aonair: Shane Ó hAonghusa, Gaelcholáiste Cheatharlach
- Rince Cruthaitheach (Aonair): Breandán Ó hIarnáin, Scoil Phobail Mhic Dara
- Rince Cruthaitheach (Grúpaí): Domhan Tarraingt, Gaelcholáiste Cheatharlach
- Amhránaíocht Aonair: Ami Ní Huigéad, Coláiste Chilliain
- Pop/Rac Cheol: Peadar Ó Goill, Gairmscoil Éinne
- Grúpaí Ceoil: Reach Linn, Gaelcholáiste Reachrann
- Drámaíocht/Mím: Teach na mBocht, Pobalscoil Ghaoth Dobhair
- Comórtas Ilchineálach: Rosie Ní Gairbheith, Pobalscoil Ghaoth Dobhair
Duaiseanna Nualaíochta:
- Ceol Aonair: Clár Ní Mhaoltuile, Coláiste Laurel Hill FCJ
- Grúpaí Ceoil: Trí Lasadh, Scoil Phobail Mhic Dara
- Drámaíocht/Mím: An Maidrín Rua, Coláiste Cholmcille
Grand Prix:
- Drámaíocht/Mím: Teach na mBocht, Pobalscoil Ghaoth Dobhair
Thosaigh Scléip sa bhliain 2005 agus tá sé ag fás agus ag forbairt ó shin i leith. Is é príomhaidhm an chomórtais ná daltaí na niar-bhunscoileanna a spreagadh le Gaeilge a úsáid i réimsí éagsúla de na healaíona trí dheis a thabhairt dóibh páirt a ghlacadh i gcomórtas spreagúil agus spéisiúil, agus tá súil againn gur thug comórtas na bliana seo borradh agus misneach dóibh. Tá Seachtain na Gaeilge ag tairiscint seisiún taifeadta sa stiúideo le teicneoir fuaime proifisiúnta do bhuaiteoir an rannóg Pop/Rac-cheol, Peadar Ó Goill, agus bhí Peadar agus an ghrúpa Trí Lasadh (buaiteoirí ceann de na duaiseanna nuálaíochta) ar stáitse le déanaí mar chuid de Ghaelspraoí le linn na Féile Pádraig. Guíonn GAELSCOILEANNA TEO. gach rath orthu agus ar iomaitheoirí uile Scléip, is cinnte go bhfuil tallann den scoth acu agus tá súil againn go mbeidh clú agus cáil i ndán dóibh.
