Irish must come first in our country’s Gaelscoils
Feabhra 3, 2010
Site aims to help improve Irish
Feabhra 2, 2010
Gaelscoil Mhic Amhlaigh is to move to the next stage of planning
Eanáir 28, 2010
Bua mór do Ghaelscoileanna
Eanáir 28, 2010
Is ábhar cheiliúradh agus faoiseamh é do Ghaelscoileanna na tíre, agus pobal na Gaeilge trí chéile, cinneadh an Aire Oideachais ciorclán a chuireadh bac ar chumas na scoileanna an luath-thumoideachais a chleachtadh a tharraing siar.
Ghlac an Roinn an cinneadh seo i ndiaidh tréimhse dianstocaireachta ó ghluaiseacht na Gaeilge, agus ach go háirithe i gcomhthéacs cás a bhí le teacht ós comhar na hArd-Chúirte an tseachtain seo. Is iad Gaelscoileanna Mhic Easmuin, Trá Lí, Ghaelscoil Nás na Rí, Co. Chill Dara agus an Foras Pátrúnachta a thóg an cás in aghaidh na Roinne agus san idirbheartaíocht a bhain leis an gcás thoiligh an Roinn costais cúirte na grúpaí seo a ghlanadh.
Tá súil ag Gaelscoileanna na tíre anois go dtabharfaidh an Roinn aghaidh ar na fadhbanna atá ag na scoileanna agus tacaíocht a thabhairt dóibh cur leis an gcóras luath-thumoideachais, córas atá aitheanta go hidirnáisiúnta mar dhea-chleachtas i leith múineadh teangacha agus go deimhin maidir le cúrsaí oideachais trí chéile.
Galway Advertiser – Peadar Mac Fhlannchadha
28 Eanáir 2010
Buntáiste airgeadais, oideachasúla is sóisialta ag Cainteoirí Gaeilge – tuairisc
Eanáir 9, 2010
Tuilleann cainteoirí Gaeilge pá níos airde ná an chuid eile den phobail i gcoitinne, de réir tuairisc úr.
D’fhoilsigh beirt taighdeoirí as Ollscoileanna Uladh agus Luimnigh an tuairisc thuasluaite a fhógraíonn go bhfuil oideachas níos fearr ag cainteoirí Gaeilge i gcoitinne agus go bhfuil níos lú seans go mbeidh siad dí-fhostaithe ná siúd gan Gaeilge.
Is iad príomh-thorthaí na tuairisce a foilsíodh sa ‘Léirmheas Eacnamaíochta agus Sóisialta’ ná:
– Tá níos lú seans ag lucht labhartha na Gaeilge fostaíocht a fháil ná neamh-chainteoirí Gaeilge.
– Oibríonn 42% de chainteoirí Gaeilge i ngairmeacha sinsearacha, bainistíochta nó poist theicniúla i gcomparáid le 27% de neamh-chainteoirí.
– Níl ach 12% de cainteoirí Gaeilge i ngairmeacha leath-oilte nó neamh-oilte i gcomparáid le 20% de neamh-chainteoirí.
– Feictear go bhfuil líonra sóisialta teagmhálach ag cainteoirí Gaeilge agus go mbaintear tairbhe as na buntáistí go léir a théann le líonra den tsaghais sin.
Dar leis an tOllamh Vani K Borooah as Ollscoil Uladh: “Is é an rud ait faoi cainteoirí Gaeilge in Éireann ná go bhfuil cuid mhaith díobh nach labhraíonn an Ghaeilge ach go hannamh in ainneoin go bhfuil sí ar a dtoil acu, ach chruthaigh muid, ar chaoi éigin, go bhfuil buntáiste suntasach acu i margadh an lucht saothair “.
Bhain an fhoireann thaighde úsáid as sonraí ó Dhaonáireamh 2006 chun iniúchadh a dhéanamh bhuntáistí labhairt na Gaeilge do chainteoirí Gaeilge.
B’ábhair iontais dóibh go bhfuil méid suntasach buntáistí, cé gur teanga í nach labhraítear ró-mhinic lasmuigh den Ghaeltacht.
Dar leis an tuairisc, tá níos mó cosúlachtaí ann go bhfaighidh lucht labhartha Gaeilge poist le híocaíocht ard ná cainteoirí Béarla aonteangach.
I dtéarmaí cáilíochtaí, tá céim nó cáilíocht níos airde ag 25% de chainteoirí i gcomparáid le 14% de neamh-chainteoirí.
Níl ach 9% de chainteoirí le bun-cháilíocht nó gan aon cháilíocht i gcomparáid le 22% de neamh-chainteoirí.
Deir an tuairisc go bhfuil ról lárnach le himirt ag na scoileanna lan-Ghaeilge ag an dá leibhéil. Is iadsan go príomha a thugann deis d’fhoghlaimeoirí Gaeilge oideachas d’ard chaighdeán a bhaint amach.
Luann an tuairisc a fhoilsíonn an Irish Times go bliantúil faoi líon na ndaltaí ó gach scoil a théann ar aghaidh chuig oideachas tríú leibhéal. I 2009, d’fhreastail líon iomlán na ndaltaí i 22% de na scoileanna lán-Ghaeilge ag an iar-bhunleibhéal (Gaelcholáistí) ar chúrsaí 3ú leibhéal, i gcomparáid le 7% san earnáil Bhéarla.
Dúirt an tOllamh Borooah go mbaineann cainteoirí sa Phoblacht tairbhe suntasach as buntáistí sóisialta.
Thaispeáin an taighde gurb ionann na buntáistí fostaíochta do chainteoirí ar an dá thaobh den teorainn.
I dTuaisceart na hÉireann, dúirt siad gur Caitlicigh ar bharr an scála eacnamaíochta a bhaineann tairbhe as deis an Ghaeilge a fhoghlaim i gcoitinne.
Dúirt siad gurb é an chéad iniúchadh córasach a rinneadh faoi cheist bhuntáiste na Gaeilge do cainteoirí Gaeilge ar oileán na hÉireann.
Léigh an tuairisc ina iomláine anseo.
Gráinne Faller & Seán Flynn, An Irish Times 9ú Eanáir 2010
Ag Cothú Gaeloideachas den Scoth ag Comhdháil Bhliantúil GAELSCOILEANNA TEO.
Samhain 22, 2009
Chuir GAELSCOILEANNA TEO. fáilte roimh Phríomhchigire cúnta leis an Roinn Oideachais agus Eolaíochta, Éamonn Murtagh a d’oscail Comhdháil Bhliantúil 2009.
Ag labhairt ar maidin dúirt Murtagh, “go dtacaíonn an Roinn Oideachais agus Eolaíochta le bunaidhm an pholasaí tumoideachais uile-oileánda, polasaí a sheolfar go hoifigiúil níos déanaí.”
D’fháiltigh Uachtarán na h-eagraíochta, Mícheál Ó Broin roimh an ráiteas seo agus roimh an mholadh go ndéanfaí iniúchadh ar na féidearthachtaí a bhaineann le múnlaí uile an tumoideachais atá leagtha amach sa pholasaí a fhorbairt.
Ag tagairt do chúrsaí geilleagracha deir Ó Broin,”Tuigimid go rí-mhaith drochstaid an gheilleagair agus an brú atá ar an Roinn dá bharr, ach iarraimid ar an Roinn agus ar an Rialtas meicníochtaí a fhorbairt don todhchaí chun nach gcuirfear todhchaí scoileanna lán-Ghaeilge i mbaol arís.” Léirigh Ó Broin tacaíocht láidir na hearnála d’obair riachtanach COGG agus d’éiligh sé nach nglacfar le moladh Mhic Chárthaigh ina leith ach breis acmhainní agus tacaíochta a thabhairt.
Dhírigh eochairchaint na Comhdhála de chuid an Dr. Muiris Ó Laoire ar thábhacht na feasachta teanga sa seomra ranga sa scoil lán-Ghaeilge sa mhéid is go spreagann sí fiosracht agus fonn foghlama i bhfoghlaimeoirí agus go gcothaíonn sí cruinneas sa teanga. Thagair sé do thaighde nua a dheimhníonn go bhfuil an fheasacht teanga i measc páistí na scoileanna lán-Ghaeilge níos airde ná mar atá i measc páistí scoileanna trí mheán an Bhéarla.
Sheol GAELSCOILEANNA TEO. polasaí uile-oileánda ar an Tumoideachas inniu a bheidh ina threoir fiúntach do scoileanna agus iad ag forbairt a gcuid polasaithe scoileanna. “Táimid an-sásta go bhfuil an pointe stairiúil seo bainte amach againn go bhfuilimid ag ceiliúradh forbairt polasaí uile-oileánda ar an tumoideachas don chéad uair agus táimid dóchasach gur ábhar spreagtha é do bhreis comhoibirithe ar cheist an ghaeloideachais idir egaraíochtaí ar bhonn uile-oileánda,” a deir Bláthnaid ní Ghréacháin, Ardfheidhmeannach na heagraíochta.
Bhí an-rath ag baint le Comhdháil Bhliantúil 2009 anseo i gCathair Chill Chainnigh cathair ina bhfuil béim láidir ar an ngaeloideachas agus ar chothú pobail le Gaeilge.
Is í GAELSCOILEANNA TEO. eagraíocht chomhordaitheach na scoileanna lán-Ghaeilge. Cabhraíonn sí le tuismitheoirí agus le grúpaí áitiúla scoileanna nua a bhunú agus tacaíonn sí leis na scoileanna atá bunaithe cheana féin.
Lá Oscailte ag Institiúid Oideachais Marino
Samhain 18, 2009
Spéis agat a bheith i do Mhúinteoir Bunscoile?
Céim B. Oid agus Ard-Dioplóma san Oideachas (Bunmhúinteoireacht)
Coláiste Mhuire, Institiúid Oideachais Marino, Ascaill Uí Ghríofa, Baile Átha Cliath 9.
Lá Oscailte
An Satharn, 21 Samhain, 2009
11 r.n. – 4 i.n.
Tuilleadh eolais: Irene Kelly ag 01-8057730 nó Irene.kelly@mie.ie
Neamhaird déanta ag an mBord Snip ar mholtaí na Roinne Oideachais
Deireadh Fómhair 8, 2009
Is cúis mhór díomá do GAELSCOILEANNA TEO. gur chinn an Grúpa Speisialta neamhaird iomlán a dhéanamh de mholadh na Roinne Oideachais agus Eolaíochta i dtaca le COGG.
Léiríonn eolas atá tagtha chun cinn trí iarratas um shaoráil faisnéise a rinne TG4 ar an Roinn Oideachais agus Eolaíochta gur chuir an Roinn Oideachais agus Eolaíochta i gcoinne moladh an Ghrúpa Speisialta gur cheart COGG a hionsú isteach sa Roinn féin nó sa Chomhairle Náisiúnta Curaclaim agus Measúnachta ar shábháil €1.2m don stát-chiste.
Mhol an Roinn Oideachais go leanfaí le dea-obair COGG mar atá. In ainneoin an mholadh sin rinneadh neamhaird i dtuarascáil an Ghrúpa Speisialta den imní a léirigh an Roinn go ndéanfaí leatrom ar chearta dhaltaí agus múinteoirí na scoileanna Gaeltachta agus lán-Ghaeilge maidir le tacaíochtaí d’oideachas trí mheán na Gaeilge Is moladh gan bhunús a bhí i dtuarascáil an Ghrúpa dá réir.
Anuas ar shárú cearta phobail na tíre seo léirigh an Roinn na dúshláin a bheadh ann deireadh a chur le COGG ar bhonn praiticiúil agus nach mbeadh aon sábháil airgid i gceist mar gur gá go leanfaí leis an soláthar agus gur gá foireann a earcú chun an soláthar seo a chinntiú. Ábhar mór faoisimh atá ann do GAELSCOILEANNA TEO. agus don earnáil trí chéile tuiscint agus tacaíocht na Roinne Oideachais a fheiceáil ar fheidhmeanna reachtúla agus ar éifeacht COGG.
Dúirt Bláthnaid ní Ghréacháin, Ardfheidhmeannach GAELSCOILEANNA TEO., “Is deacair a chreidiúint go rachadh an Grúpa Speisialta i gcoinne moladh ón Roinn a bhfuil cúram an oideachais lán-Ghaeilge uirthi. Deimhníonn an t-eolas nua seo atá tagtha chun solais go bhfuil an ceart ag pobal na Gaeilge easpa muiníne a léiriú i moltaí na tuarascála mar a bhaineann leis an nGaeilge agus leis an ngaelscolaíocht mar is léir go bhfuil siad bunaithe ar aineolas agus easpa feasachta ar chearta, gealltanais an rialtais agus tuiscint ar bith ar chaomhnú cultúir agus oidhreachta”.
Agus í ag tagairt don bhfeachtas stocaireachta i gcoinne an mholadh deireadh a chur le COGG deir sí “Gabhann GAELSCOILEANNA TEO. buíochas mór le gach scoil agus le gach duine a chabhraigh leis an bhfeachtas seo. Léiríonn an t-aiseolas go gcreideann scoileanna agus a gcuid tuismitheoirí go mbeadh an gníomh seo tubaisteach. Impímid oraibh leanúint leis an stocaireacht agus bímid muiníneach as cinneadh an Taoisigh tacaíocht cheart a thabhairt d’earnáil na gaelscolaíochta”.
Is í GAELSCOILEANNA TEO. eagraíocht chomhordaithe na scoileanna lán-Ghaeilge. Cabhraíonn sí le tuismitheoirí agus le grúpaí áitiúla scoileanna nua a bhunú agus tacaíonn sí leis na scoileanna atá bunaithe cheana féin. Tá 170 gaelscoil agus 39 gaelcholáiste lasmuigh den Ghaeltacht ag cur oideachais lán-Ghaeilge ar fáil faoi láthair.
Troscáin Scoile Saor in Aisce!
Meán Fómhair 8, 2009
Tá troscáin scoile ar fáil saor in aisce ó GAELSCOILEANNA TEO. Sciob do dheis mar ní féidir an troscáin a stóráil níos faide. Tá sé le bailiú i mBaile Átha Cliath. Seo thíos an liosta:
- Taisceadáin
- Deisceanna
- Cófraí tarraiceáin do dheisc
- Tralaí ríomhaireachta
- Cathaoireacha
- Seilf leabhar
- Cófraí
- Fillteáin
- Crochadáin chótaí
Má tá spéis agat in aon rud anseo nó chun tuilleadh eolas a fháil, déan teagmháil linn san oifig ar 01-8535195.
Comhsheimineár ar Oideachas Luath-Óige trí Ghaeilge
Meán Fómhair 2, 2009
Beidh Comhsheimineár á reáchtáil ag Gaelscoileanna Teo. le Forbairt Naíonraí Teoranta chun plé a dhéanamh ar an ngaol idir an bunscoil lán-Ghaeilge agus an naíonra lán-Ghaeilge. Reáchtáiltear an seimineár in Óstán Maryborough House, Dúglas, Corcaigh tráthnóna Sathairn, 3 Deireadh Fómhair 2009.
Tá sé mar aidhm ag an seimineár plé a dhéanamh mar chúlra d’fhoilsiú treoirleabhair praiticiúil don dá leibhéal maidir leis an ngaol a láidriú eatarthu leis an earnáil i gcoitinne a neartú. Mar sin beidh rannpháirtíocht ón dá leibhéal an-tábhachtach chuige seo. Tá seo chun tógáil ar an ngaol láidir atá ann cheana féin idir Gaelscoileanna Teo. agus Forbairt Naíonraí Teoranta.
Tugann a leithéid de seimineár deiseanna do stiúrthóirí naíonraí, príomhoidí agus múinteoir naíonáin bunscoileanna agus bainistíocht an dá leibhéil teacht le chéile agus plé a dhéanamh agus foghlaim faoin obair a bhíonn ar siúl ag an dá leibhéal seo. Is minic go mbíonn an bunscoil ag braith ar an naíonra le daltaí a chur ar fáil don bhunscoil agus a mhalairt chomh maith. Ar a bharr sin go minic bíonn an naíonra ar an suíomh céanna leis an mbunscoil rud a chothaíonn gaol nádúrtha idir an dá leibhéal.
Ní bheidh ach €30 an rannpháirtithe ar an seimineár agus cuirfear lón ar fáil díreach roimh an seimineár.
Iarraimid oraibh teacht ar ais chugainn roimh an 18 Meán Fómhair. Má tá aon cheist agat maidir leis an seimineár tá fáilte romhat teagmháil a dhéanamh liom ag nora@gaelscoileanna.ie nó ag 01-8535195.
