Scléip 2012 ar Raidió na Gaeltachta
Iúil 6, 2012
Rinne Raven Productions 5 chlár do Raidió na Gaeltachta as na babhtaí agus craobh Scléip 2012 agus craoladh iad ar na dátaí thíos:
- Babhta Laighean: 9ú Meitheamh 2012 @ 9.00 r.n
- Babhta Mumhan: 16ú Meitheamh 2012 @ 9.00 r.n
- Babhta Ulaidh: 23ú Meitheamh 2012 @ 9.00 r.n
- Babhta Chonnachta: 30ú Meitheamh 2012 @ 9.00 r.n
- Craobh Ceannais: 7ú Iúil 2012 @ 9.00 r.n
Ar chaill tú Scléip ar Raidió na Gaeltachta? Éist leis an gclár ar líne!
Comhghairdeas arís leis na buaiteoirí agus a gcuid scoileanna agus ár mbuíochas mór le Fiachna Ó Braonáin agus a fhoireann as Raven Productions, a rinne taifead ar an gcomórtas i mbliana thar ceann Raidió na Gaeltachta.
Deireadh leis an tSamhail Nua Mhaoinithe agus Aitheantas do Riachtanais Earnáil na Gaelscolaíochta
Iúil 3, 2012
Cuireann GAELSCOILEANNA TEO. fáilte roimh chinneadh Bhord Fhoras na Gaeilge deireadh a chur leis an tSamhail Nua Mhaoinithe a bhí beartaithe d’eagrais na hearnála. Cinneadh ciallmhar agus riachtanach a bhí ann gan leanúint le punann de scéimeanna iomaíocha de réir catagóirí éagsúla a bhí beartaithe in áit bunmhaoiniú d’eagrais fadbhunaithe atá ag treabhadh goirt na hearnála chun leasa na Gaeilge le blianta fada.
Tugann an cinneadh seo aitheantas do thábhacht ghuth comhaontaithe na hearnála chun seirbhísí tábhachtacha a chinntiú do phobal na Gaeilge. Aithnítear gur den riachtanas é múnla nua a fhorbairt a thógann ar láidreachtaí na hearnála, a thógann moltaí agus na tuairimí a léiríodh le linn an phróisis chomhairliúcháin san áireamh agus a thógann ar na mór-fhorbairtí in earnáil na Gaeilge, eadhon an Straitéis 20 Bliain don Ghaeilge agus An Bille Gaeltachta. Fáiltíonn GAELSCOILEANNA TEO. go mór roimh an deis leanúint leis an gcomhoibriú riachtanach idir na heagraíochtaí Gaeilge sna míonna romhainn agus le Foras na Gaeilge lena chinntiú go mbainfear an toradh is éifeachtaí agus is éifeachtúla amach sa phróiseas anailíse agus forbartha nua.
Gabhann GAELSCOILEANNA TEO. buíochas mór leis na scoileanna agus le pobail uile na scoileanna a léirigh a gcuid tuairimí le linn an phróisis comhairliúcháin. Beimid ag súil go mór le bhur n-ionchur sa tréimhse romhainn ar mhaithe le láidriú earnáil an oideachais lán-Ghaeilge.
Caint spreagúil faoin ilteangachas
Meitheamh 27, 2012
This is a keynote speech by Prof Antonella Sorace for the newly opened Centre on Multilingualism (UCOM) at the University of Ulster. The Centre aims to provide practitioners, educators, policy makers and service providers with research, assistance, help and advise in relation to speaking in more than one language. This includes not only issues of acquisition of more than one language by children, but also the wider social and cultural benefits of bilingualism and multilingualism for society and the economy.
Lá Oiliúna Don Luath Léitheoireacht
Meitheamh 27, 2012
14 Meán Fómhair 2012 Baile Átha Cliath
Cuirfidh Jacaí de Brún ón Áisaonad agus grúpa múinteoirí Lá Oiliúna dírithe ar an gclár ‘CLEITE’ ar fáil do mhúinteoirí na mbunscoileanna lán-Ghaeilge.
Beidh líon srianta áiteanna ar fáil ar an gcúrsa seo. Is féidir réamh-áirithint a dhéanamh trí theachtaireacht a sheoladh chuig eolas@cogg.ie.
Is féidir ‘CLEITE’ (60 leabhar) a cheannach ar €100 ón Aisaonad.
Nóta tábhachtach: Comhdháil na Ceannasaíochta ar ceal
Meitheamh 19, 2012
Is oth le GAELSCOILEANNA TEO. a chur in iúl duit go raibh orainn an chomhdháil a bhí beartaithe do mhí Lúnasa ar fhorbairt na ceannasaíochta a chur ar ceal i bhfianaise a laghad rannpháirtithe a bhí cláraithe. Ón aiseolas a fuair muid, tá an-fhiúntas leis an gclár féin ach ní fheileann an tseachtain sin (22-23 Lúnasa) agus daoine ar saoire an tsamhraidh go fóill. Faraor, ní raibh aon tsolúbthacht ann i dtaobh na ndátaí mar go raibh sé le bheith mar chuid de scoil samhraidh an RTU ó thuaidh.
Ba mhaith linn áfach triail a bhaint as é a rith arís, b’fhéidir sa bhfómhair, agus d’fháilteoimis go mór roimh aon mholtaí uait maidir le:-
- Tréimhsí/téarmaí feiliúnacha i ndialann an Phríomhoide/Leas-Phríomhoidí?
- Laethanta: an bhfeilfeadh lá iomlán Aoine agus Satharn éigin?
- Suíomh: an mbeadh BÁC nó suíomh eile lár tíre feiliúnach le haghaidh oiliúna uile-oileánda ó thaobh rochtana de?
Gabhaimid buíochas leo siúd a chláraigh don oiliúint agus tá súil agam go bhfeilfeadh cibé socrú nua a dhéanfar amach anseo duit.
Eolas maidir le clár na comhdhála anseo.
CRUINNIÚ EOLAIS: GAELSCOILEANNA NUA AG OSCAILT SA CHÉIM AGUS I dTAMHLACHT I 2013
Meitheamh 5, 2012
Cuirfear mór-fháilte roimh thuismitheoirí a bhfuil spéis acu a gcuid páistí a chur chuig Gaelscoileanna nua atá beartaithe le n-oscailt sa Chéim agus i dTamhlacht i 2013 agus beidh fáilte ar leith roimh éinne ar mian leo cabhrú leis na Gaelscoileanna nua a chur chun cinn. Tá na cruinnithe eolais seo á reáchtáil ag An Foras Pátrúnachta agus ag GAELSCOILEANNA TEO. ar an Mháirt, 26 Meitheamh 2012 ag 8i.n. in Óstán Bewley’s, Baile na Lobhar, Baile Átha Cliath 18 agus ar an gCéadaoin, 27 Meitheamh 2012 in Óstán Maldron, Tamhlacht, Baile Átha Cliath 24.
Chuir an dá eagrais an-fháilte roimh fhógra an Aire Ruairí Quinn i mí an Mhárta seo caite go mbeidh Gaelscoileanna nua ag oscailt sa Chéim agus i dTamhlacht i mí an Mheán Fómhair, 2013, agus An Foras Pátrúnachta roghnaithe mar phátrún na scoileanna nua seo.
Dúirt Caoimhín Ó hEaghra, Ard-Rúnaí An Foras Pátrúnachta, an phátrún scoile is mó ar scoileanna lán-Ghaeilge, “Is iontach an scéal é go mbeidh Gaelscoileanna nua ag oscailt sa Chéim agus i dTamhlacht. Tá an t oideachas lán-Ghaeilge ag dul ó neart go neart, ach go háirithe le trí Ghaelscoil san iomlán ag oscailt sa chontae idir 2012 agus 2013 faoin bpátrúnacht céanna.” Beidh an scoil nua sa Chéim mar an dara Ghaelscoil faoi phátrúnacht An Foras Pátrúnachta a bheidh lonnaithe sa cheantar, ó d’oscail Gaelscoil Thaobh na Coille i 1995 agus tá sí ag fás ó shin. Lean Ó hEaghra ag rá go “gcuirfidh na Gaelscoileanna nua go mór leis na ceantair agus sásóidh siad an t-éileamh láidir atá ann don oideachas lán-Ghaeilge.” Fáiltíonn GAELSCOILEANNA TEO., go mór roimh oscailt na scoileanna nua. Deir Ardfheidhmeannach na heagraíochta, Bláthnaid ní Ghréacháin, i leith na bhforbairtí seo in earnáil an oideachais lán-Ghaeilge, “Tá an-áthas orainn go bhfuil aitheantas á thabhairt don éileamh mór ar scoileanna lán-Ghaeilge trí Ghaelscoileanna a cheadú do na ceantair seo. Mar eagraíocht atá ag plé le bunú agus forbairt na scoileanna lán-Ghaeilge uile ar bhonn náisiúnta le 40 bliain anuas, deimhníonn fás na gluaiseachta seo go bhfuil tuiscint ag méadú go forleathan agus go tréan sa phobal go bhfuil iliomad buntáistí ann do pháistí a fhreastalaíonn ar scoil lán-Ghaeilge. Tá an tuiscint ag méadú go gcuirtear sár-chaighdeán oideachais ar fáil do gach páiste ó gach cineál cúlra socheacnamaíochta, teangeolaíochta agus inniúlachta agus is iontach an deis í do pháistí i gceantair na Céime agus Tamhlacht a bheith páirteach sa chóras fíor-éifeachtach seo. ”
Beidh deis ag tuismitheoirí a bpáistí a chlárú sna scoileanna ag na cruinnithe poiblí seo, agus beidh foireann An Foras Pátrúnachta agus foireann GAELSCOILEANNA TEO. i láthair le buaileadh le tuismitheoirí agus ceisteanna a fhreagairt. Cuirfear eolas ar fáil maidir leis na Gaelscoileanna nua, buntáistí na gaelscolaíochta agus conas is féidir le tuismitheoirí páirt a ghlacadh i mbunú agus i gcur chun cinn na scoileanna. Ba mhór linn buaileadh leat ann más spéis leat do pháiste a chlárú, tuilleadh eolais a fháil nó ról lárnach a ghlacadh i dtodhchaí na scoileanna.
Tuilleadh eolais:
An Foras Pátrúnachta
Caitríona Bairéad, Oifigeach Forbartha :: caitriona@foras.ie :: 01-6294110 :: www.foras.ie
GAELSCOILEANNA TEO.
Clare Spáinneach, Oifigeach Forbartha :: cspainneach@gaelscoileanna.ie :: 01- 853 5193 :: www.gaelscoileanna.ie
NÓTAÍ DON EAGARTHÓIR:
Bunaíodh An Foras Pátrúnachta sa bhliain 1993 ionas go mbeadh rogha eile ag scoileanna maidir le pátrúnacht. Is pátrúnacht náisiúnta é An Foras Pátrúnachta do scoileanna lán-Ghaeilge ag an mbunleibhéal agus ag an meánleibhéal. Tá 61 bunscoil agus 3 meánscoil faoi phátrún An Foras Pátrúnachta. Tá An Foras Pátrúnachta ina Phátrún ar scoileanna lán-Ghaeilge a bhfuil éiteas Caitliceach, Ilchreidmheach, agus Idirchreidmheach (Caitliceach /Protastúnach) acu. An fhís atá ag An Foras Pátrúnachta ná oideachas lán-Ghaeilge den scoth a chothú, a fhorbairt agus a leathnú sa tír. Tá An Foras Pátrúnachta aitheanta ag An Roinn Oideachais agus Scileanna mar chóras pátrúnachta atá inghlactha agus cuí do scoileanna ag an gcéad agus an dara leibhéal.
Is í GAELSCOILEANNA TEO. eagraíocht chomhordaitheach na scoileanna lán-Ghaeilge. Bunaíodh an eagraíocht i 1973 mar eagraíocht dheonach náisiúnta chun tacaíocht a thabhairt d’fhorbairt na scoileanna lán-Ghaeilge ag an mbunleibhéal agus ag an iar-bhunleibhéal. Tugann an eagraíocht spreagadh, comhairle agus tacaíocht phraiticiúil don phobal, nó don duine sa phobal, a chinneann scoil a bhunú agus feidhmíonn sí ar mhianta an phobail. Tá 175 bunscoil lán-Ghaeilge agus 41 iarbhunscoil lán-Ghaeilge lasmuigh den Ghaeltacht faoi láthair.
26/06/2012 ag 20:00
An Chéim
Óstán Bewley’s, An Pháirc Láir, Baile na Lobhar, B.Á.C. 18
27/06/2012 ag 20:00
Tamhlacht: Teach na Giúise/An Seanbhábhún
Maldron Hotel, Bealach Bhaile an Fhaoitigh(N81), Tamhlacht, B.Á.C. 24
Ré órga an Cheoil i nGaelscoil na Lochanna
Meitheamh 5, 2012
Ochtar anseo a bhuaigh duaiseanna i bhFleadh Cheoil Co. Chill Mhantáin, Bealtaine 2012 agus grúpa le dul ar aghaidh go Craobh Laighean i Mí Iúil. Tá Gaelscoil na Lochanna thar a bheith bródúil astu! Seinneann siad an bosca cheoil, an fhidil, an fheadóg mór agus an fheadóg stáin.
ó bharr ar chlé – Sorcha Ní Mhurchú, Ben Ó hUigín, David Mac Phib, Rián Ó hAilín, Líle Ní Chonchubhair
ag bun ó chlé – Bríon Ó Conchubhair, Fionn Ó hAilín, Ellis Nic Chromthainn.
in easnamh – Eóin Ó hUigín
Campaí Samhraidh ar fud na tíre
Bealtaine 29, 2012
Is gearr go mbeidh scoileanna ar fud na tíre ag dúnadh don samhradh ach beidh deiseanna ag daltaí óga feabhas a chur ar a gcuid scileanna Gaeilge ag campaí samhraidh ar fud na tíre.
Feachtas
Lártíre-beidh Feachtas ag eagrú campa samhraidh do dhaltaí idir 10 agus 15 bliana d’aois i gcoláiste Naomh Fhinín sa Mhuileann gCearr i mí Iúil.
Beidh an campa samhraidh ar siúl ón 9 -13 Iúil agus beidh réimse leathan imeachtaí ann i rith na seachtaine mar shampla drámaíocht, ealaín, amhránaíocht agus spóirt éagsúla.
Tá tríocha spás ar an gCampa Samhraidh agus tá costas €70 an duine air. Tá tuilleadh eolais ar fáil ó Fheachtas ar 01 672 25940
Ógras
Ar fud na tíre-Tabharfar an deis do pháistí níos óige freastal ar champaí samhraidh a bheidh ar siúl ag an óg-eagraíocht Ógras i rith an tsamhraidh.
Bíonn roinnt mhaith de na campaí seo ar siúl i gCúige Laighean agus bíonn campaí eile ar siúl i Maigh Eo, i nGaillimh, i dTír Chonaill, i gCiarraí agus i nDoire.
Beidh go leor imeachtaí éagsúla ar siúl le linn na gcampaí samhraidh – ina measc beidh cluichí Gaelacha, cispheil, peil, drámaíocht, ceol, céilí, comhrá, ealaín agus cluichí boird.
Óige na Gaeltachta
Dún na nGall: Beidh campa samhraidh á reáchtáil i nGleann Cholm Cille in Ionad CLG naomh Columba. Beidh an Campa ar siúl ón 10.00am-3.00pm Breis eolais le fáil ó Sheán ag 0872441842 nó Síle 0749532956
Connacht/Laighean: Beidh campaí samhraidh ar siúl ar 16 Iúil – 20 Iúil i dTuar Mhic Éadaigh, Co. Mhaigh Eo. Beidh an Campa ar siúl ón 10.00am-3.00pm Breis eolas uaidh: Joanne ag 087-9092543 nó 091-506014
Na Déise: Reáchtálfar campa eile sa Rinn ón 16 Iúil – 20 Iúil
Corcaigh: Beidh Campaí Samhradh na Mumhan ar siúl i mí Iúil agus i mí Lúnasa. Cuirfear tús leo i mBéal Átha an Ghaorthaigh an tseachtain dar tús 9 Iúil agus beidh campa samhraidh eile ar siúl ón 23 Iúil – 27 Iúil ar Oileán Chléire. Ina dhiaidh sin beidh dhá champa samhraidh i gCúil Aodha ón 30 Iúil go dtí 10 Lúnasa.
Ciarraí: beidh campa samhraidh i gCorca Dhuibhne ón 13 Lúnasa – 17 Lúnasa Beidh an Campa ar siúl ón 10.00am-3.00pm gach lá. Breis eolais ó Debra ag 026-65883
Foilsithe ar Gaelport.com
Ceardlann Deireadh Seachtaine le Suantraithe
Bealtaine 14, 2012
Tá an Gyréum ag comhoibriú i gcomhar le Foras na Gaeilge ar cheardlanna as Gaeilge a éagrú i gContae Shligigh. Beidh na ceardlanna sin dírithe ar ghrúpaí éagsúla agus aosghrúpaí difriúla.a bhfuil suim acu i nGaeilge. Beidh deireadh seachtaine le suantraí á reáchtáil ar an 15-17 Meitheamh. Beidh deis ann do dhaoine Gaeilge a fhoghlaim trí shuantra. Beidh Siobhán Cleary (Gaeilgeoir áitiúil agus cumadóir) agus Máire Breatnach (ceoltóir Gaelach) i gceannas ar an deireadh seachtaine.
15 Meitheamh, Dé hAoine
am rochtana: tráthnóna
7pm Suipéar éadrom
8pm Réamhléiriú do shuantraithe
16 Meitheamh, Dé Sathairn
9am Ióga réamh-bhricfeasta
10.30am Bricfeasta
11.30am An chéad shuantraithe gearra a fhoghlaim ó scáileán, Siúlóid bheg
2pm Lón, Trí shuantraí ghearr a fhoghlaim
Siúlóid bheag go dtí Ardchlár Maighe Tuireadh ina dhiaidh
7pm Dinnéar, Tráthnóna le ceol, Suantraithe a athrá roimh am codlata
17 Meitheamh, Dé Domhnaigh
9am Ióga réamh-bhricfeasta
10.30am Bricfeasta
11.30am Dhá shuantraí eile a fhoghlaim
2pm Lón
Turas go Céis Chorainn
Beidh muid ag taifeadadh na suantraithe i gCéis Chorainn, isteach i gceann de na pluaiseanna, in áit a raibh Cormac mac Airt ag diúl bainne an fhaolchú baineann. Beidh an taifeadadh ar fáil do gach uile rannpháirtí mar MP3.
Praghas:
180€/an duine 130€/an duine atá bainteach le Comhluadar nó a luafaidh Gaelscoileanna ina áirithint
Uasmhéid na rannpháirtithe: 20
Gach eolas le fáil ó http://www.gyreum.com
Scléip 2012 ar Raidió na Gaeltachta
Bealtaine 14, 2012
Rinneadh cláir do Raidió na Gaeltachta as na babhtaí agus an craobh Scléip agus tá an-áthas orainn na dátaí don 5 chlár sin a fhógairt.
Craolfar an chéad chlár de Scléip ar Raidió na Gaeltachta Dé Sathairn an 9ú Meitheamh ag a 9.00 r.n, agus gach Satharn ina dhiaidh sin ar feadh 5 seachtaine:
Babhta Laighean: 9ú Meitheamh 2012 @ 9.00 r.n
Babhta Mumhan: 16ú Meitheamh 2012 @ 9.00 r.n
Babhta Ulaidh: 23ú Meitheamh 2012 @ 9.00 r.n
Babhta Chonnachta: 30ú Meitheamh 2012 @ 9.00 r.n
Craobh Ceannais: 7ú Iúil 2012 @ 9.00 r.n
Comhghairdeas arís leis na buaiteoirí agus a gcuid scoileanna agus ár mbuíochas mór le Fiachna Ó Braonáin agus a fhoireann as Raven Productions, a rinne taifead ar an gcomórtas i mbliana thar ceann Raidió na Gaeltachta.
