Líomhaintí faoi ‘éilíteachas’ Gaelscoileanna ‘bréagnaithe’ ag figiúirí
Feabhra 16, 2017
Tá 74 scoil lán-Ghaeilge agus Gaeltachta aitheanta anois mar scoileanna DEIS, cruthúnas, dar le Gaeloideachas, go gcuireann na scoileanna sin fáilte roimh chách
Dar leis an eagraíocht Gaeloideachas go gcuireann cinntí na Roinne Oideachais maidir le scoileanna faoi mhíbhuntáiste “deireadh leis an argóint gur scoileanna éilíteacha iad scoileanna lán Ghaeilge”.
Thug an eagraíocht le fios go bhfuil 74 scoil lán-Ghaeilge agus Gaeltachta aitheanta anois mar scoileanna DEIS, rud a fhágann go bhfuil tromlach na ndaltaí faoi míbhuntáiste oideachasúil i scoil amháin as gach cúig scoil lán-Ghaeilge.
Is minic é curtha i leith scoileanna lán-Ghaeilge ag colúnaithe nuachtán agus dreamanna eile nach mbaineann na scoileanna sin ach le daoine atá go maith as.
I gcolún nuachtáin a foilsíodh an mhí seo caite, mar shampla, mhaígh an colúnaí de chuid an Sunday Independent, Sarah Carey, go raibh cur chuige ‘segregationist’ ag Gaelscoileanna.
Dúirt Carey freisin gur mheabhraigh dearcadh tuismitheoirí Gaelscoileanna síochánaithe nach raibh sásta troid in aghaidh na Naitsíoch.
Dar le Yvonne Ní Mhurchú, Uachtarán Gaeloideachas, go mbréagnaíonn an t-eolas faoi scoileanna DEIS na líomhaintí maidir le héilíteachas.
“Tá sé in am go n-aithneodh daoine go bhfuil réimse leathan scoileanna ag feidhmiú trí mheán na Gaeilge. Tá scoileanna againn i gceantracha faoi mhíbhuntáiste i gcathracha, bailte móra agus faoin dtuath i ngach cuid den tír.”
Dúirt Uachtarán Gaeloideachas go raibh “an fhianaise soiléir” agus go gcaithfí anois “cothrom na féinne” a thabhairt do scoileanna lán-Ghaeilge sa phlé atá ar siúl faoi láthair maidir leis an reachtaíocht nua atá á beartú i dtaobh polasaí iontrála scoileanna.
Dúirt Yvonne Ní Mhurchú go bhfuil scoileanna lán-Ghaeilge agus Gaeltachta eile ann “atá an-mhí-shásta nach bhfuair siad aitheantas mar scoileanna DEIS, Scoil Rann na Feirste in Dún nan Gall ina measc.
Dúirt Pól Ó Ruiséal, Príomhoide Scoil Rann na Feirste, go raibh “iontas” agus “díomá” air nár tugadh stádas DEIS don scoil.
“Níl slat tomhais chothrom á húsáid ag an Roinn Oideachais agus iad ag roghnú scoltacha don Scéim. Táthar ag tabhairt droim lámha le scoltacha atá ag teagasc tré mheán na Gaeilge”.
Tá “imní” ar Ó Ruiséal, a dúirt sé, nach gcuirfidh tuismitheoirí a bpáistí chuig scoileanna nach bhfuil stádas DEIS acu.
D’fhéadfadh “impleachtaí tromchúiseacha” a bheith ag a leithéid don oideachas lán-Ghaeilge amach anseo, a dúirt Ó Ruiséal.
Dúirt Bláthnaid Ní Ghréacháin, Ardfheidhmeannach Gaeloideachas, go gcuireann scoileanna lán-Ghaeilge agus Gaeltachta “fáilte roimh pháistí agus daoine óga ó gach cineál cúlra teanga, cultúir agus socheacnamaíochta”. Bhí sé riachtanach, a dúirt sí, go mbeadh “buntáiste breise an oideachais lán-Ghaeilge” ar fáil do ghasúir atá faoi mhíbhuntáiste oideachasúil.
http://tuairisc.ie/liomhainti-faoi-eiliteachas-gaelscoileanna-breagnaithe-ag-figiuiri/
Imní faoin scéal nach mbeidh aon mhúinteoir breise á chur ar fáil in 2017/18 faoin bPolasaí Oideachais Gaeltachta
Feabhra 16, 2017
Tá imní léirithe ag an eagraíocht Gaeloideachas faoi ráiteas a rinne an Roinn Oideachais maidir le soláthar múinteoirí breise do scoileanna Gaeltachta faoin bPolasaí Oideachais Gaeltachta.
Fógraíodh an tseachtain seo nach mbeidh aon mhúinteoir breise á chur ar fáil do scoileanna Gaeltachta faoin bPolasaí don scoilbhliain 2017/18. Gealladh sa Pholasaí go mbeadh 30 múinteoir bunscoile agus 30 múinteoir iarbhunscoile breise ar fáil do scoileanna Gaeltachta ón scoilbhliain 2018/19 ar aghaidh.
Deir Gaeloideachas go bhfuil an baol ann anois nach mbeidh ar chumas na Roinne an plean a leagadh amach maidir le soláthar múinteoirí le Gaeilge a chur i bhfeidhm faoi thús na scoilbhliana i Meán Fómhair 2018.
Níl an clár oiliúna do bhunmhúinteoirí a luaitear sa Pholasaí, an Clár Oiliúna Tosaigh Múinteoirí, curtha amach ar tairiscint go fóill ag an Roinn Oideachais agus níl ach clár amháin a chuireann oiliúint i nGaeilge ar fáil do mhúinteoirí iarbhunscoile, an Mháistreacht Ghairmiúil in Ollscoil na hÉireann, Gaillimh.
Cáileoidh 34 múinteoir iarbhunscoile ón gcúrsa sin don scoilbhliain 2017/18. Deir Gaeloideachas nach leor an méid sin le freastal ar an éileamh atá ann ó scoileanna Gaeltachta.
“Saincheisteanna iad seo i dtaobh chur i bhfeidhm an Pholasaí agus cé go bhfáiltíonn muid roimh an Pholasaí féin, is gá soláthar cuí a dhéanamh le scoileanna a chumasú le tabhairt faoi, chun go mbraithfidh siad úinéireacht ar an bPolasaí agus go mbeidh sé mar thacaíocht seachas mar bhagairt acu.
“Tá Gaeloideachas ag súil go mór le bheith rannpháirteach sa choiste comhairleach chun go mbeidh guth na scoileanna féin le cloisteáil ag gach staid den phróiseas atá romhainn,” a dúirt Bláthnaid Ní Ghréacháin, Ardfheidhmeannach Gaeloideachas.
Mí Eanáir, ainmníodh an Dochtúir Treasa Kirk ina ceannaire ar an Aonad nua Gaeltachta sa Roinn Oideachais atá leis an bPolasaí Oideachais Gaeltachta a chur i bhfeidhm. Ainmníodh baill eile an Aonaid an mhí seo caite freisin, an Príomhoifigeach Cúnta, Roisin McCauley agus an tArdoifigeach Feidhmiúacháin, Derek Hollingsworth.
Seoladh an Polasaí Oideachais Gaeltachta ar an gCeathrú Rua i mí Dheireadh Fómhair seo caite. Caithfidh aon bhunscoil atá ag iarraidh aitheantas mar scoil Ghaeltachta feasta staonadh ó theagasc an Bhéarla sa chéad dá bhliain scolaíochta agus polasaí lán-tumoideachais a chur i bhfeidhm.
Go dtí seo b’ionann scoil Ghaeltachta agus aon scoil a bhí lonnaithe i gceantar oifigiúil Gaeltachta, ach ní hamhlaidh a bheidh níos mó agus stádas Gaeltachta ag brath feasta ar chritéir theangeolaíochta seachas ar an tíreolaíocht. Is é a bheidh i scoil Ghaeltachta ach a gcuirfear an polasaí i bhfeidhm “ná scoil a thiomnaíonn do na réimsí curaclaim agus na hábhair churaclaim uile a sholáthar trí mheán na Gaeilge” agus a oibríonn leis an bpobal trí mheán na Gaeilge.
Gealladh go gcuirfear an polasaí i bhfeidhm “de réir a chéile” ó Mheán Fómhair na bliana seo agus €1 milliún a bheidh ar fáil don obair sin an bhliain seo chugainn.
De réir an pholasaí, an chéad pholasaí dá leithéid ó bhunú an Stáit, ní hamháin go mbeidh ar an mbunscoil atá ag iarraidh aitheantas Gaeltachta a bhaint amach an tréimhse lán-tumoideachas a chur i bhfeidhm, ach beidh orthu a chinntiú chomh maith gur i nGaeilge amháin a dhéanfar gnó na scoile ar fad.
Taighde: An Leanúnachas ón mbunscoil go dtí an iar-bhunscoil lán-Ghaeilge
Feabhra 15, 2017
Tá réimse leathan taighde mar a bhaineann le hoideachas lán-Ghaeilge, tumoideachas agus eile ar fáil le híoslódáil ó chartlann Gaeloideachas, féach http://www.gaelscoileanna.ie/taighde/. Seo thíos cuid den taighde is déanaí a cuireadh leis an gcartlann:
- An Leanúnachas ón mbunscoil go dtí an iar-bhunscoil lán-Ghaeilge – cur i láthair ó Chomhdháil Oideachais 2016 (PDF, 141KB)
- Tuairisc Taighde -An Leanúnachas ón mbunscoil go dtí an iar-bhunscoil lán-Ghaeilge i bPoblacht na hÉireann (PDF, 848KB)
Imní ar scoileanna Gaeltachta maidir le ráiteas na Roinne i leith soláthar múinteoirí d’fheidhmiú an Pholasaí Oideachas Gaeltachta
Feabhra 15, 2017
D’fhógair an Roinn Oideachais & Scileanna inné nach mbeidh aon mhúinteoir breise á cheapadh faoin bPolasaí don Oideachas Gaeltachta don scoilbhliain 2017/18. Tá gealltanais shonracha tugtha sa pholasaí go mbeidh soláthar de 30 múinteoir bunscoile agus de 30 múinteoir iarbhunscoile ar fáil mar mhúinteoirí breise (ex-quota) do scoileanna Gaeltachta ó 2018/19. Ábhar oidí ó chúrsaí ar leith a bheadh i gceist leis na múinteoirí seo, ach tá baol ann, áfach, nach mbeidh na céimeanna cuí glactha in am ag an Roinn Oideachais leis an scéim seo a chur i gcrích faoin spriocdháta aitheanta. Tá sé ráite sa Polasaí don Oideachas Gaeltachta go gcuirfear tús le Clár Oiliúna Tosaigh Múinteoirí (OTM), agus go mbeidh an clár úrnua sin ag soláthar áiteanna do 30 múinteoir in aghaidh na bliana ó 2018/19. Níl an clár oiliúna sin curtha amach ar tairiscint go fóill, áfach. Ag an iarbhunleibhéal, is í an Máistreacht Ghairmiúil san Oideachas in Ollscoil na hÉireann, Gaillimh an t-aon chlár atá ann faoi láthair a chuireann oiliúint trí Ghaeilge ar fáil d’ábhar oidí iarbhunscoile. Is 34 múinteoir nua-oilte a bheidh an cúrsa sin á chur ar fáil don scoilbhliain 2017/18, agus ní leor iad le freastal ar an éileamh ó na scoileanna.
Níl aon dáta tugtha ag an Roinn ach an oiread faoin uair a bhfuil sé i gceist aici na múinteoirí breise a cheapadh, rud a fhágann scoileanna na Gaeltachta ag feidhmiú i bhfolús i láthair na huaire. “Saincheisteanna iad seo i dtaobh cur i bhfeidhm an Pholasaí” a deir Bláthnaid ní Ghréacháin, Ardfheidhmeannach Gaeloideachas, “agus cé go bhfáiltíonn muid roimh an Pholasaí féin, is gá soláthar cuí a dhéanamh le scoileanna a chumasú le tabhairt faoi, chun go mbraithfidh siad úinéireacht ar an bPolasaí agus go mbeidh sé mar thacaíocht seachas mar bhagairt dóibh. Tá Gaeloideachas ag súil go mór le bheith rannpháirteach sa choiste chomhairleach chun go mbeidh guth na scoileanna féin le cloisteáil ag gach staid den phróiseas romhainn”.
Imní san Iarthar faoin bpolasaí oideachais Gaeltachta
Feabhra 15, 2017
Tá sé tugtha le fios ag an Roinn Oideachais do Bhord Oideachais agus Oiliúna na Gaillimhe agus Ros Comáin nach mbeidh aon mhúinteoir breise á cheapadh faoin bpolasaí oideachais Gaeltachta don scoilbhliain seo chugainn.
Níl aon dáta tugtha ag an Roinn ach an oiread faoin uair a bhfuil sé i gceist an chuid seo den pholasaí a chomhlíonadh.
Dúirt baill an Bhoird inné go bhfuil imní orthu faoi cheann de na moltaí is tábhachtaí sa pholasaí a d’fhógair an Roinn ag deireadh na bliana seo caite a bheith á chur ar an méar fhada ag an Roinn cheana féin.
Dúirt stiúrthóir scoileanna an Bhoird Tomás Mac Pháidín le RTÉ Raidió na Gaeltachta go bhfuil sé iarrtha air anois cruinniú a eagrú ar bhonn práinne leis an Roinn Oideachais leis an gceist seo a phlé.
Coláiste Ghlór na Mara – Príomhoide le Ceapadh
Feabhra 15, 2017
Coláiste Ghlór na Mara
Iarbhunscoil a d’oscail i Meán Fómhair 2014 le freastal ar mhór-cheantar Bhaile Brigín, Co Átha Cliath.
Uimhir Rolla : 68082L
Is mian leis an mBord Bainistíochta a fhógairt go bhfuil
Príomhoide
le ceapadh, a rachaidh i mbun dualgais ó 20 Márta 2017.
Iarbhunscoil, dheonach, ilchreidmheach, lán-Ghaeilge do chailíní agus buachaillí is ea Coláiste Ghlór na Mara, atá faoi Iontaobhas Fhoras Pátrúnachta na Scoileanna lánGhaeilge le 124 daltaí ar rolla. Tá na daltaí seo roinnte idir an chéad, dara agus tríú bhliain. Tá foirgneamh nua-tógtha ag an scoil le spás go forbairt suas go 800 dalta.
Is féidir foirm iarratais a fháil trí ríomhphost a sheoladh chuig an gCathaoirleach ag po17cgnm@gmail.com
Ní mór foirmeacha iarratais comhlánaithe (ar pháipéar amháin) a sheoladh ar ais chuig:
Tim Ó Tuachaigh, Dollards Cottage, Drogheda Rd, Bremore, Baile Brigín, Co. Átha Cliath, K32X766 roimh 5.00 in ar an 3 Márta 2017.
Beidh na hagallaimh don phost seo ann Déardaoin 9 Márta 2017.
Is fostóir comhionannas deiseanna é Coláiste Ghlór na Mara.
Plean foilsithe ag an Aire Bruton chun aghaidh a thabhairt ar Mhíbhuntáiste Oideachais
Feabhra 15, 2017
Preasráiteas ón Roinn Oideachais & Scileanna:
108 Gníomh chun Cabhrú le gach Duine a Lánacmhainneacht a Bhaint Amach
Tacaíochtaí Breise le cur ar Fáil do thart ar 110; chun Leasa tuairim is 20,000 Dalta
Sheol an tAire Oideachais agus Scileanna, an tUas. Richard Bruton, TD, Plean DEIS (Comhionannas Deiseanna i Scoileanna a Sheachadadh) 2017 inniu, a phlean chun aghaidh a thabhairt ar mhíbhuntáiste oideachais.
Caithfidh an deis a bheith ag gach leanbh a lánacmhainneacht a bhaint amach, beag beann ar a gcúinsí. Tá cumas uathúil ag an oideachas na timthriallta míbhuntáiste a bhriseadh.
An sprioc fhoriomlán atá againn ná córas oideachais agus oiliúna na hÉireann a dhéanamh ar an gceann is fearr san Eoraip laistigh de dheich mbliana. Baineann Plean an lae inniu le bheith ar an dream is fearr chun poitéinseal an chórais oideachais a úsáid chun na timthriallta míbhuntáiste sin a bhriseadh trí thorthaí oideachais níos fearr.
Tógann an Plean ar thaithí na scoileanna DEIS atá ann cheana féin agus tarraingíonn ar dheachleachtas idirnáisiúnta. Leagtar amach ann spriocanna nua maidir le:
· Litearthacht agus uimhearthacht a fheabhsú
· Rátaí críochnaithe scoile a fheabhsú
· Dul ar aghaidh chuig ardoideachas agus breisoideachas a fheabhsú
Aithníonn an Plean níos mó ná 100 gníomh a thacaíonn le míbhuntáiste oideachais lena chinntiú gur féidir le gach duine a lánacmhainneacht a bhaint amach. Áirítear ar na gníomhartha sin iad seo a leanas:
· Múnla nua chun scoileanna a aithint ar bhealach cóir agus oibiachtúil chun acmhainní breise a chur ar fáil chun leasa tuairim is 20,000 leanbh agus thart ar 110 scoil
Beidh Scéim Leabhar ar Cíos a fheidhmiú éigeantach do scoileanna a bheidh rannpháirteach sa Chlár Tacaíochta Scoile faoi Mheán Fómhair 2017
· Beidh mar aidhm ag sraith scéimeanna píolótacha nuáil agus cruthaitheacht i scoileanna a spreagadh agus tacóidh Ciste Sármhaitheasa i Scoileanna leis na tionscnaimh sin a fhorbairt; nuáil a spreagadh trí chnuasú scoileanna
· Díriú ar thacaíochtaí do cheannairí agus múinteoirí scoile chun scileanna a thabhairt dóibh tacú le leanaí lánacmhainneacht a bhaint amach (e.g oiliúint i gceannaireacht ghairmiúil, cúrsaí ullmhachta do phríomhoidí nuacheaptha, cúrsaí meantóireachta agus cóitséala)
· Rochtain a thabhairt do gach iarbhunscoil a bheidh rannpháirteach sa Chlár Tacaíochta Scoile ar chomhairleoir gairmthreorach tiomnaithe
An t-aistriú ó réamhscoileanna go dtí scoileanna náisiúnta i bpobail a fheabhsú do leanaí, ag tógáil ar láidreacht chláir mar ABC
· Leagfaidh scoileanna amach spriocanna a bheidh sonrach, intomhaiste, inscroichte, réadúil agus am-shonrach, lena n-áirítear spriocanna do litearthacht agus uimhearthacht, Forbairt Ghairmiúil Leanúnach (FGL) agus ceannaireacht, agus meastóireacht a dhéanamh orthu gach bliain
Aonad Forbartha DEIS a bhunú sa Roinn Oideachais agus Scileanna chun tacú le cur i bhfeidhm idirghabhálacha nua agus cabhrú leis na hacmhainní riachtanacha a fháil ó na gníomhaireachtaí tacaíochta éagsúla
10 síceolaí NEPS breise a cheapadh chun tacaíochtaí chuig scoileanna DEIS a fheabhsú
Cuirfidh Boird Oideachais agus Oiliúna socruithe for-rochtana foirmiúla ar bun le scoileanna DEIS chun rochtain a spreagadh trí na bealaí oideachais atá ann cheana féin
Leathnófar an Chomhpháirtíocht Gnó Scoileanna chun freastal ar scoileanna nua san áireamh sa Chlár Tacaíochta Scoile
Dúirt an tAire Bruton:
“Caithfidh an deis a bheith ag gach leanbh a lánacmhainneacht a bhaint amach, beag beann ar a gcúinsí. Tá cumas uathúil ag an oideachas na timthriallta míbhuntáiste a bhriseadh. Is é bun-aidhm an Rialtais seo ár ndul chun cinn eacnamaíoch a chothabháil agus é a úsáid chun sochaí chóir agus chomhbhách a chruthú. Níl réimse ar bith níos tábhachtaí don fhís seo ná an t-oideachas.
“Tá an t-ádh linn in Éirinn go bhfuil gairm mhúinteoireachta chomh díograiseach agus tiomanta againn. Leanfaidh ár múinteoirí agus ceannairí scoile ar aghaidh ag imirt ról ríthábhachtach i gcabhrú le leanaí a lánacmhainneacht a bhaint amach. Caithfimid tacú lenár múinteoirí agus lenár gceannairí scoile, trí uas-sciliú, meantóireacht agus cóitseáil, ionas go mbeidh siad in ann pleanáil, feidhmiú agus tacú.
“Forbraíonn ár bplean an deachleachtas ionas gur féidir scoileanna a aithint do thacaíocht bhreise ar bhealach cóir agus oibiachtúil. Úsáidfimid cuir chuige nua ar bhonn píolótach chun nuáil agus torthaí níos fearr do leanaí a spreagadh. Is féidir sin a phríomhshruthú in imeacht ama.
“Cuirfear tacaíochtaí breise ar bun, mar shampla soláthar breise NEPS, soláthar d’fhorbairt ghairmiúil tosaíochta agus scéimeanna leabhar ar cíos.
“Cuireann ár bplean tacaíochtaí ar fáil d’fhoghlaimeoirí de gach aois. Is mian liom tuilleadh daltaí a fheiceáil ag leanúint ar aghaidh chuig ardoideachas agus breisoideachas. Caithfimid bealaí níos fearr a fhobairt dóibh.
“Is mian liom an deis seo a thapú chun buíochas a ghabháil le gach duine a chuir le forbairt an Phlean seo agus táim ag tnúth le bheith ag obair le scoileanna agus tacú leo chun a spriocanna a bhaint amach.”
“Bhí mé an-sásta cuairt a thabhairt ar Scoil Náisiúnta Our Lady Immaculate Junior National School i nDarndál inniu chun ár bplean nua maidir le haghaidh a thabhairt ar mhíbhuntáiste oideachais a sheoladh.”
Cuirfear an clár tacaíochta scoileanna DEIS i bhfeidhm ó Mheán Fómhair 2017, agus oibreofar go leanúnach le comhpháirithe oideachais agus páirtithe leasmhara eile lena chinntiú go seachadófar a chuspóirí go rathúil.
Thug an tAire Bruton cuairt ar Scoil Náisiúnta Shóisearach Muire Gan Smál i nDarndál inniu, bunscoil i dtuaisceart Bhaile Átha Cliath, chun a phleananna a leagan amach maidir le deiseanna do leanaí as limistéir faoi mhíbhuntáiste a fheabhsú.
Táthar ag tabhairt liosta de na scoileanna a gheobhaidh sochair bhreise chun críche agus foilseofar go luath é.
Tá Plean Gnímh DEIS 2017 ar fáil ag:
http://www.education.ie/en/Publications/Policy-Reports/DEIS-Plan-2017.pdf
Spriocanna faoin bPlean seo
D’fhonn na spriocanna atá leagtha amach againn a bhaint amach, agus ag tógáil ar na cúig phríomhsprioc atá leagtha amach sa Phlean Gnímh don Oideachas 2016-2019, is iad na Príomh-Spriocanna atá leagtha amach againn dúinn féin sa Phlean DEIS seo:
1. Creat measúnaithe níos láidre agus níos freagrúla a chur i bhfeidhm chun scoileanna a aithint agus leithdháileadh éifeachtach acmhainní a dhéanamh
2. Taithí foghlama agus torthaí daltaí i scoileanna DEIS a fheabhsú
3. Cumas ceannairí scoile agus múinteoirí gníomhú, pleanáil agus acmhainní a úsáid a mhéid is fearr is féidir
4. Tacú le dea-chleachtas i scoileanna agus é a chothú trí chomhoibriú idirghníomhaireachta
5. Tacú le hobair scoileanna tríd an taighde, faisnéis, meastóireacht agus aiseolas a thabhairt chun spriocanna an phlean a bhaint amach
Leagtar amach sa Phlean DEIS, a thagann in áit an Phlean Ghnímh reatha a seoladh i 2005 , ár bhfís maidir le hidirghabháil amach anseo sa réimse ríthábhachtach na cuimsitheachta sóisialta i mbeartas oideachais.
Príomhghné den Phlean ná modh níos freagrúla agus níos solúbtha chun scoileanna a aithint lena gcur san áireamh sa SSP a bhraitheann ar shonraí arna gcoinneáil go lárnach ag DES agus CSO. Ceadóidh an múnla nua do scoileanna a aithint go cruinn i dtéarmaí chúlra socheacnamaíoch an chohóirt daltaí, agus acmhainní agus riachtanas oideachais a mheaitseáil níos fearr. Cuirfidh an próiseas nua seo deireadh leis an ngá le próiseas iarratais agus mar sin laghdófar an t-ualach riaracháin ar scoileanna.
Gné thábhachtach eile ná tabhairt isteach shraith tionscadal píolótach atá dírithe ar bhearta a thabhairt isteach a léirítear go n-oibríonn siad go maith chun torthaí dhaltaí faoi mhíbhuntáiste a fheabhsú. An aidhm leis sin ná nuáil agus cruthaitheacht i scoileanna a spreagadh agus tacófar le forbairt na dtionscnamh seo trí Chiste Sármhaitheasa Scoileanna. Is iad na bearta saindírithe atá le cur san áireamh Ceannaireacht Scoile, líonrú/cnuasú Scoileanna, modheolaíochtaí teagaisc, gach tacaíocht a chomhtháthú i bpobail, úsáid níos mó a bhaint as seirbhísí HSCL.
Beidh comhoibriú agus oibriú idir-ghníomhaireachta lárnach le go n-éireoidh leis an bPlean seo agus tá roinnt gníomhartha ann lena chinntiú go dtarlóidh sin.
Athbhreithniú cuimsitheach ar an gClár DEIS reatha, deachleachtas idirnáisiúnta, agus ionchur ó Ghníomhaireachtaí agus Ranna Rialtais, comhpháirtithe oideachais agus páirtithe leasmhara eile, is cúis leis an bPlean seo.
Scoileanna le cur san áireamh:
Gheobhaidh thart ar 110 scoil tacaíochtaí breise. Tá mionsonraí faoi na scoileanna a gheobhaidh tacaíochtaí breise á gcur le chéile agus fógrófar go luath iad.
Ár bhFís
Go mbeidh an tOideachas ina bhealach cruthaithe chuig deiseanna níos fearr do dhaoine i bpobail atá i mbaol míbhuntáiste agus eisiamh sóisialta.
Ár nUaillmhian
A bheith ar an dream is fearr san Eoraip maidir leis an oideachas a thapú chun bacainní a shárú agus deireadh a chur leis an timthriall de mhíbhuntáiste idirghlúine trí fhoghlaimeoirí a chumasú a bheith rannpháirteach agus rathúil agus cur go héifeachtach leis an tsochaí i ndomhan atá ag athrú.
Ár Spriocanna
D’fhonn an fhís a bhaint amach, tá sraith spriocanna uaillmhianacha leagtha amach againn.
Preasráiteas iomlán ar www.education.ie
Eolas tábhachtach de dhíth maidir le próiseas iontrála bunscoileanna Lán-Ghaeilge & Gaeltachta
Feabhra 15, 2017
Tá comhairliúcháin ar bun ag an Roinn Oideachais & Scileanna faoi láthair maidir le ról an reiligiúin shainchreidmhigh i bpróiseas iontrála na scoileanna. Tá cheithre mholadh déanta ag an Aire maidir le cuir chuige fhéideartha le hathruithe a dhéanamh. Ba mhór le Gaeloideachas eolas a bhailiú ó na bunscoileanna lán-Ghaeilge agus Gaeltachta maidir lena gcleachtais reatha agus a rogha cur chuige, chun go mbeidh muid in ann aighneacht a dhéanamh ar a son agus cinntiú go mbeidh guth na hearnála le cloisteáil sa phróiseas.
Más príomhoide bunscoile thú, bheimis fíor-bhuíoch díot as an suirbhé a chomhlánadh roimh dheireadh an lae ar Déardaoin an 16 Feabhra. An spriocdháta le haighneachtaí a bheith faighte ag an Roinn ná an 20 Feabhra.
Is féidir teacht ar an suirbhé tríd an nasc seo: https://www.surveymonkey.com/r/reiligiun
Na cuir chuige fhéideartha atá molta ag an Aire ná:
- Scoilcheantar – laistigh de scoilcheantar ar leith, is féidir tosaíocht a thabhairt don sainchreideamh (ag tabhairt san áireamh go mbeidh díolúintí ag teastáil chun foráil a dhéanamh do scoileanna lán-Ghaeilge)
- Riail na scoile is cóngaraí – scoileanna creidimh in ann tús áite a thabhairt do leanbh creidimh ach amháin sa chás gurb í scoil is cóngaraí an linbh sin den chreideamh ar leith sin (ag tabhairt san áireamh go mbeidh díolúintí ag teastáil chun foráil a dhéanamh do scoileanna lán-Ghaeilge)
- Córas cuótaí de réir creidimh – céatadán ar leith ar fáil don sainchreideamh ar leith
- Cosc iomlán ar chreideamh agus teastais baiste a úsáid mar chritéir
Tá míniú cuimsitheach ar a mbeadh i gceist le gach rogha ar fáil sa phlécháipéis atá eisithe ag an Roinn: https://www.education.ie/ga/Tuismitheoir%C3%AD/Eolas/Roll%C3%BA-Scoile/Rol-an-reiligiuin-sa-phroiseas-iontralacha-scoile-Paipear-Comhairliuchain.pdf.
Tá lán-fháilte romhat teagmháil a dhéanamh le Clare ar 01 8535193 nó clare@gaelscoileanna.ie má tá aon cheist agat ina leith.
Fianaise i gcinntí DEIS gur scoileanna uileghabhálacha iad scoileanna lán-Ghaeilge agus Gaeltachta
Feabhra 15, 2017
Cuireann cinntí an Roinn Oideachais agus Scileanna i dtaobh scoileanna faoi mhíbhuntáiste deireadh leis an argóint gur scoileanna éilíteacha iad scoileanna lán Ghaeilge, a deir an eagraíocht Gaeloideachas. Tá 74 scoil lán-Ghaeilge agus Gaeltachta aitheanta anois mar scoileanna DEIS, sin scoil as gach cúig atá ag freastal ar thromlach daltaí a bhfuil míbhuntáiste oideachasúil orthu. Tugadh an t-aitheantas seo tríd an gcóras DEIS ag an Roinn Oideachais & Scileanna mar chuid d’fhoilsiú Plean DEIS 2017.
D’fháiltigh Yvonne Ní Mhurchú, Uachtarán an eagras Gaeloideachas, roimh an fhógra seo agus deir sí “Tá sé in am go n-aithneodh daoine go bhfuil réimse leathan scoileanna ag feidhmiú trí mheán na Gaeilge. Tá scoileanna againn i gceantracha faoi mhíbhuntáiste i gcathracha, bailte móra agus faoin dtuath i ngach cuid den tír. Anois go bhfuil an fhianaise soiléir, táimid ag éileamh go dtabharfaí cothrom na féinne d’ár scoileanna, múinteoirí, tuismitheoirí agus páistí sa phlé poiblí atá ar siúl faoi láthair i dtaobh déantús iontrála scoileanna.
Cé go raibh líon áirithe scoileanna lán-Ghaeilge agus Gaeltachta ag fáil tacaíochta ó 2006, bhí scoileanna eile ann a thit lasmuigh de na critéir in ainneoin an-chuid riachtanais ina gcuid pobail agus dá bharr, níor aithníodh iad go foirmiúil mar scoileanna DEIS. Tá na scoileanna sin aitheanta anois ag an Roinn mar scoileanna DEIS Banda 1, agus scoileanna eile a raibh aitheantas DEIS Banda 2 acu ó 2006 anois aitheanta mar DEIS Banda 1 chomh maith. Is ábhar mór sásaimh é sin mar go mbeidh na tacaíochtaí méadaithe a bheidh ar fáil dóibh anois mar chúnamh ollmhór dá ndaltaí”.
Tá scoileanna lán-Ghaeilge agus Gaeltachta ann, áfach, atá an-mhí-shásta nár bhfuair siad aitheantas mar scoil DEIS in ainneoin a gcuid iarratais a léirigh dúshláin agus riachtanais a gcuid pobail. Tá na scoileanna sin ag lorg soiléirithe ar na critéir agus na cúiseanna nár bronnadh an t-aitheantas sin orthu. Tá iontas agus díomá ar Phól Ó Ruiséal, Príomhoide Scoil Rann na Feirste, nár áiríodh an scoil mar scoil DEIS i mbliana, “Níl slat tomhais cothrom a úsáid ag an Roinn Oideachais agus iad ag roghnú scoltacha don Scéim” a dúirt sé, “táthar ag tabhairt droim lámha do scoltacha atá ag teagasc tré mheán na Gaeilge”.
Tá imní ar Ó Ruiséal nach mbeidh tuismitheoirí sásta páistí a chur go scoileanna nach bhfuil stádas DEIS acu, de dheasca an costas breise a bhéas orthu mar thuismitheoirí. Dá roghnódh tuismitheoirí scoil bunaithe ar stádas DEIS, beag beann ar shainmheon teanga na scoile, d’fheadfadh impleachtaí tromchúiseacha a bheith ann do bhuannaíocht an tsoláthair lán-Ghaeilge amach anseo.
Is scoileanna DEIS iad 22% de na scoileanna lán-Ghaeilge agus Gaeltachta anois. Deir Bláthnaid ní Ghréacháin, Ardfheidhmeannach Gaeloideachas, gur “pobail oscailte, ionchuimsitheacha agus tacúla iad na scoileanna lán-Ghaeilge agus Gaeltachta, a dhéanann freastal den scoth ar éagsúlacht. Cuireann scoileanna lán-Ghaeilge agus Gaeltachta fáilte roimh pháistí agus daoine óga ó gach cineál cúlra teangan, cultúrtha agus socheacnamaíocha. Tá sé den riachtanais go mbeadh buntáiste breise an oideachais lán-Ghaeilge ar fáil ach go háirithe dóibh siúd a bhfeadfadh míbhuntáiste oideachasúil a bheith mar bhagairt dóibh, agus go dtabharfaimis gach deis dóibh a n-acmhainneacht a bhaint amach agus bheith sona sásta agus slán ar scoil.”
Scoileanna nua-aitheanta mar scoileanna DEIS i 2017:
1. Gaelscoil Bharra
2. Gaelscoil Dara
3. Gaelscoil an Longfoirt
4. Scoil an tSeachtar Laoch (a raibh stádas DEIS Banda 2 acu roimhe)
5. Gaelscoil Bhaile Munna (a raibh stádas DEIS Banda 2 acu roimhe)
6. SN Éadan Fhionnlaoich
7. SN Cholmcille, Baile na Finne
8. SN an Ghlasáin
9. SN Mhuire, Fanaid
10. SN Inbhear
11. Gaelcholáiste Mhuire
12. Coláiste de hÍde, Tamhlacht
Scoileanna a aithníodh i 2006
Maidir leis na scoileanna a aithníodh i 2006 agus atá ag fáil tacaíocht ó shin, leanfar leis na tacaíochtaí sin a sholáthar dóibh de réir a gcuid riachtanais. Sa chás go léiríonn an creat nua go bhfuil leibhéal míbhuntáiste i scoileanna DEIS níos ísle ná scoileanna nach bhfuil faoi DEIS, déanfar measúnú amach anseo ar an bhféidearthacht ar acmhainní a ídiú ar bhonn céimiúil, chun gur féidir iad a dháileadh ar scoileanna ar mó na leibhéil míbhuntáiste iontu.
Plean DEIS 2017
Is féidir Plean DEIS 2017 a íoslódáil i nGaeilge ó shuíomh na Roinne Oideachais & Scileanna: https://www.education.ie/ga/Foilseach%C3%A1in/Tuarasc%C3%A1lacha-Beartais/Plean-DEIS-2017.pdf
Oiliúint do bhoird bainistíochta bunscoile agus iarbhunscoile maidir le Frithbhulaíocht
Feabhra 14, 2017
Cuirfidh Gaeloideachas agus An Foras Pátrúnachta módúil oiliúna ar frithbhulaíocht agus earcaíocht ar fáil do na boird bainistíochta i 2017. Tá an oiliúint seo in oiriúint do bhunscoileanna agus iarbhunscoileanna.
Iarraimid ar ionadaithe ó bhord bainistíochta na scoileanna clárú le freastal, agus fáiltonn muid roimh ceisteanna ina leith – is féidir teagmháil a dhéanamh le Clare ar 01 8535193 nó clare@gaelscoileanna.ie.
Beidh ceardlanna ar siúl ar na dátaí agus sna hionaid thíos:
Frithbhulaíocht
- Baile Átha Cliath, Coláiste Ghlór na Mara, 27 Feabhra 2017, 7pm – 9pm
- Corcaigh, Ionad Oideachais Chorcaí, 2 Márta 2017, 7pm – 9pm
- Port Láirge, Waterford Teacher Centre, 28 Feabhra 2017, 7pm – 9pm
- Gaillimh, Óstán Radisson, 28 Feabhra 2017, 7pm – 9pm
- Leitir Ceanainn, Óstán Radisson 1 Márta 2017, 7pm – 9pm
- Baile Átha Cliath, Óstán Crowne Plaza, Baile Blainséir, 2 Márta 2017, 7pm – 9pm
NB: Má tharlaíonn nach bhfuil baill ó do scoil in ann a bheith i láthair ag na hionaid thuas, táimid sásta dul chomh fada leat ach deichniúr a bhailiú go háitiúil le freastal ar sheisiún i do cheantar féin.
Oops! We could not locate your form.
